ส่วงไข้แล้วหิวข้าว นอนซมบ่กินข้าวมา2มื้อแล้วหละพี่น้อง...
คึดอยากกินอิหยังเผ็ดๆเค็มๆแหน่จักหน่อย...หลังจากที่จางปากขมปากช่วงเป็นไข้นะจ้า
อันดับแรกค้นตู้เย็นก่อน ได้ผักมา3-4อย่าง ไปเบิ่งตู้แช่แข็ง มีปลาทูสดอยู่2ตัว ป่นปลากินดีกว่า
เริ่มจากหุงข้าวก่อนจ้า เอาข้าวแช่น้ำไว้จัก1ชั่วโมง แล้วจังหุง เพราะเป็นข้าวซ้อมมือจ้า ข้าวแข็งเด๋ คั่นหุงโลด
แล้วกะจัดการต้มปลาทูใส่ปลาร้า(ปลาแดก)เห็นมีหมากเขืออยู่กะต้มใส่นำกัน หมากเขือเหลืองพร้อม
ต้มจนหมากเขือเหลืองนุ่มกะใช้ได้แล้วจ้า ปลาทูแกะเอาแต่เนื้อปลา หมากเขือเหลืองลอกเปลือกถิ่มไป
ทีนี่กะหั่นหอมแดง กระเทียม คั่วใส่กระทะแห้ง ใส่พริกกระเหรี่ยงลงไปคั่วใส่นำกัน
คั่วจนพริกเปลี่ยนสีหละจ้า หอม กระเทียมกะสุก ตักออกไว้ หั่นผักชี กับผักชีฝรั่ง เตรียมไว้
ลวกผักไว้โลดจ้า ติ๋มมีแต่หน่อไม้ต้ม ผักบุ้ง บร็อกโคลี่ลวก แตงกวาหั่นๆใส่จานไว้
มาเริ่มตำป่นค่ะ ใส่พริก หอม กระเทียม เกลือลงโขลกพอแหลกใส่ปลา โขลกต่อไป
แล้วใส่มะเขือต้ม โขลกจนเข้ากัน ใส่น่ำต้มปลาร้า คนๆแล้วใส่ผักชีที่หั่นไว้ คนๆพอเข้ากัน
ชิมเบิ่ง คั่นยังบ่เตค็ม เติมน้ำปลาได้จ้า ตักใส่ถ้วย ติ๋มมักให้ออกรสส้มๆ ขอบีบหมากนาวหน่อยหนึ่งค่ะ
ตักใส่ถ้วยเสริ์ฟกับข้าวซ้อมมือหุงนุ่มๆ แซบดีจ้า กินข้าวเบิดจานเลย ผักกะเบิดจานนำ
เมนูนี่ สิว่าเพื่อสุขภาพกะได้จ้า มาเด้อพี่น้องกินข้าวนำคนป่วย ลงกระทู้แล้วง่วงพอดี
อดนอนบ่ได้เลยช่วงนี่ นอนหลายสิวกะขึ้นแก้มเม็ดทอโพนหนี่...จักยามใด๋สิส่วง...
Bookmarks