พี่น้อง.. เคยมีประสบการณ์เรื่องทางนี้บ่อจ้า อั่นพอดีไปอ่านมาหลายๆหม่อง กะเลยเกิดกระเทือนตุ่มเอ้ะ(สงสัย)ขึ้นมาว่า..ผี หรือวิญาณมีจริงอยู่บ่อ..
ล่าสุดกะได่อ่านข่าวว่าทางอังกฤษหือได๋นิล่ะ ว่ากล้องที่ติดตั้งไว่ได่ถ่ายเจอวิญญาณพะนะ ตรวจสอบหลายๆครั้งแล้วโดยผู้ชำนาญกะลงความเห็นคือกันว่า เป็นวิญาณคักๆ พะนะ..จนหน่วยงานนั่นๆ ยอมพึ่งเอิ้นหน่วยงานที่ชำนาญด้านวิญญาณมาส่อย..ปร๊าดด..ขนาดเมืองเจริญแล้วป่านนั่นยังคิดว่าเป็นวิญญาณอิหลี..แล่วมันยังมีเรื่องชาติหน้า เรื่องบาป บุญ คุณโทษ เข้ามารบกวนคลื่นหยักสมองของขะน้อยอีก.. มาฮอดตรงนี้ทางตันเลยจ้า..คึดต่อบ่อออก..
เพราะจากที่ได่รับรู้และรําเรียนมา มันขัดกับหม่องนี้หลาย จะของกะพยายามทำใจเพื่อการดำรงชีวิตให้เข้ากับความเป็นจริงของโลกปัจจุบัน คือบ่มีผี หือวิญญาณในโลกแน่ๆ มันเป็นแค่อากาศ ธาตุ ตามทางวิทยาศาสตร์แบบที่เฮาเคยเรียนมาในห้องเรียนท่อนั่น ยิ่งกับลูกสาวนิกะบ่เคยสอนเรื่องย่านผี หือเรื่องจำพวกนี้เลย บ่เอ่ยถึง หือบ่เว่าให่เขาย่าน ยามสิบอก หือสิสอนอิหยัง เพื่อให้เขาเสื่อฟังเพราะย่านผีเลย. (เพราะว่าย่านเขาเป็นคือจะของ คือเป็นโรคเครซี่ผีสุดๆ ทั้งๆที่บอกเจ้าของว่าบ่เสื่อๆเรื่องนี้ จนป่านนิกะยัง งง เจ้าของว่า ตกลงเธอเสื่อ หือ บ่เสื่อหว๋านิแม่ะ ฮ่าๆๆ )
(.. เพราะอาจสิมีผลมาแต่ตอนน้อยๆ ส่วนมากขะน้อยสินอนคนเดียว เพราะต้องอยู่แต่บ้านเรียนหนังสือ พ่อและแม่เพิ่นไปอยู่บ้านที่สร้างอยู่ใกล้นา เพื่อทำนาและสวน พวกพี่ๆที่เพิ่นเรียนจบประถมหกแล้วเพิ่นกะไปอยู่นำ.น้องน้อยๆกะยังอยู่กะพ่อแม่ มีจะของนิล่ะ เฝ้าบ้านส่วนหลาย นากะบ่เคยเฮ็ด ลูกชาวนาแต่บ่เคยปลูกข้าวเลย หน่ายจะของข้อนี้ล่ะ จำได่ยุแต่ว่า เคยได่เกี่ยวข้าวอยู่เทือ สองเทือนิล่ะ ม่วนตะหน่าย อิพ่อเพิ่นจ่มให้วะซั่น ไปเหยียบต้นข้าวเพิ่นเหมิด คาสะออนนำแต่แมงปอกับแมงหยังบุ แล่นคุบวะซั่น กับตัดลำข้าวมาเป่าเฮ็ดปี่เป่าเล่น เฮ็ดยังบ่เก่งจนป่านนิ บาดพวกอ้ายๆเอื้อยๆเล้าเฮ็ดเป่าเสียงดีวะซั่น หาย่าดนำแต่ของเพิ่นมาเป่า เป่าบ่ทันดนกะบุปซํา อยู่จั่งสิล่ะ..สรุป บ่ได่เกี่ยวฮอดข้าว สำพอเพิ่นส่งไปเรียนนาฏศิลป์อ่ะล่ะแม๋ะ ฮ่าๆๆ ตอนแต่น้อยๆ ได่ให้อิพ่ออิแม่ อ้ายเอื้อย เพิ่นเฮ็ดนาเลี้ยงจะของเรียนหนังสือ บาดนิถึงคิวจะของแหล่วพี่น้องเอ้ย ได่เลี้ยงพวกเพิ่นเกือบเหมิดบ้านพี่น้องแม๋ะ..ฮ่าๆๆ.. )
ฮอดใสแล่วล่ะ..บาดนิพอดี เรื่องเกิดขึ่นกะเจ้าของเอง มีอยู่มื้อนึง ไปดื่มกับหมู่พวกมา เมาได่ที่คือกัน กลับกะดึกคัก ราวๆตีสาม คนนอนกันเหมิดแล้ว จังหวะที่สิย่างเข้าลิฟท์ ลิฟท์ได่เลื่อนลงมาตรงจังหวะต่อหน่าพอดี ยังบ่ท่อนั่น แถมเปิดให้อิกต่างหาก เจ้าของกะบ่ทันคึดหยัง คาแต่เมาย่างเข้าไปยืนเส้ย จนลิฟท์ขึ่นมาฮอดชั้นหม่องอยู่ โดยที่เจ้าของกดแค่ ชั้น๑๓ ท่อนั่น ..
พอมาฮอดห้อง กะอาบน้ามไปคึดไป เลยอึ้งกิ่มกี่ ประกอบกับความย่านแล่นมาสุมกุ้มทันที อาบน้ามไปเงียบๆผุเดียว บ่ปากบ่เว่า ในอาการที่หนาวๆคือขนคิงลุกไปนำ ฮ่าๆๆ
สรุป เมื่อกิ แม่นไผ๋เป็นคนกดลิฟท์ลงมาให้ อันนิคั่นคึดว่าอาจสิมีคนยังบ่นอน แล้วเพิ่งขึ้นไปก่อนหน่านิ แล้วกะอาจสิหวังดี กดลิฟท์ลงมาชั้นหนึ่งไว่ให้กะได่ (คึดในแนวหาข้อมาหักล้างได่เนาะค่ะ แต่ว่าแม่นไผ๋สิมาหวังดี คึดนำเฮาตอนตีสามหน่อ เหอๆ) อิกอย่าง ลิฟท์มาตรงหน่าได่จังหวะจะโคน พอดีเป้ะขนาดนั่น แสดงว่า คนกดลิฟท์นิ คั่นบ่ได่เฝ้ายืนถ่าเบิ่งเฮาย่างเข้าลิฟท์จากด้านบน เพื่อสิกะจังหวะให้ได่ คั่นซั่นลิฟท์สิบ่เลื่อนลงมาได่พอดีเป้ะขนาดนั่นเด้อพี่น้อง จะของแฮงคึดไป แฮงขนลุกไป.. ที่สำคัญกว่านั่น ..เปิดประตูให้อิกแม๋ะ..ปกติลิฟท์นั่นต้องมีคนกดปุ่มเปิดประตูจากด้านในก่อน ประตูมันถึงสิเปิดออก นั่นหมายถึงต้องมีคนอยู่ข้างในนั่น แต่นี่บ่มีไผ๋เลย ว่างป่าวแม๋ะพี่น้อง จะแม่นบริการให้ดีดอก..(ทีหลังมะต๊องงง .. )
สรุป เลยบ่อยากคึดจ้า ว่ามันคืออิหยัง พยายามหาเหตุผลมาหักล้างเอา เช่น ระบบลิฟท์อาจค้างตอนนั่นพอดี ๆ..มันเป็นไปได่น่า ในโลกเครื่องจักรกลเนาะ....พยายามปลอบใจจะของไปซั่นแหล่ว..ดีป่านได๋ตั้ว เพิ่นมาคอยดูแลให้ป่านนั่นเนาะ..แสดงว่าเป็นคนดี น่ารัก(ษา)ในระดับนึงตั้วล่ะ จะของกะดาย..บุ๋ยยย..พักนี้ไผ๋คือจูดยางแถวนี้ดู๋แท่ะหน่อ..ฮ่าๆๆๆๆ..
<object width="445" height="364"><param name="movie" value="http://www.youtube.com/v/DmLpCcmhPAg&hl=en&fs=1&border=1"></param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/DmLpCcmhPAg&hl=en&fs=1&border=1" type="application/x-shockwave-flash" allowscriptaccess="always" allowfullscreen="true" width="445" height="364"></embed></object>
ตัวอย่างภาพผีในลิฟท์ จากกล้องวงจรปิดครับ (ขออนุญาตเอาภาพมาประกอบเด้อมิกเด้อ)
Bookmarks