ตำบักหุ่ง ผัดหมี่จ้า
วันหยุดมีเวลาว่างหลายกะคิดหาแต่แนวกินเนาะคับ คิดไปคิดมาคิดอยากผัดหมี่กับตำบักหุ่งพะนะ คิดพ้อแต่กี้ดอก ยามไปเบิ่งหนังเบิ่งหมอลำ เมนูหลักกะแม่นสองอย่างนี้หละเนาะ หิวนอนเข้าหลายๆเบิ่งหมอลำกะบ่รู้เรื่องพระเอกนางเอก ต้องสั่งตำบักหุ่งเผ็ดๆกับผัดหมี่จั่งแล้ว ตาสว่าง ซอดแจ้งปั๊ด บ่เว้าหลายเนาะคับ ตามนี้หละ เครื่องปรุงกะๆเอาคับ
เตรียมเครื่องผัดหมี่ เริ่มด้วยซอยหอมแดงก่อน
น้ำปรุงผัดหมี่คับ น้ำเปล่า น้ำบักขามเปียก น้ำตาลปี๊บ ซีอิ๊วดำ น้ำปลา ผงชูรส หรือว่าไผสิใส่อี่หยังอีกกะแล้วแต่เนาะคับ แนวที่คิดว่ามันสิแซบหละ
ผมใซ้หมี่เส้นสดพะนะเลยบ่แซ่น้ำ
ตั้งกระทะเจียวหอม กระเทียมให้หอมๆจักหน่อยก่อน ระวังไหม้เด้อ
ขั้นต่อไปกะใส่น้ำปรุงที่เตรียมไว้ เคี่ยวจักหน่อย
น้ำปรุงฮ้อนแล้วเฮากะใส่เส้นหมี่ได้เลย จัดการผัดๆๆๆแล้วกะผัด แห้งกะเติมน้ำเปล่าได้ ชิมเบิ่งพร้อมเด้อ ขาดรสชาดได๋กะปรุงอีกได้ จนเฮาคิดว่าสุกแล้ว รสชาดดีแล้ว กะเทใส่หม้ออีกใบ หรือว่ากาละมังกะได้
เทถั่วงอกกับต้นหอมที่เฮาหั่นไว้ลงไปคลุกให้เข้ากัน ส่ำนี้กะได้ผัดหมี่แล้ว ต่อไปกะไปตำบักหุ่งมากินกับได้เลยคับ
ตำบักหุ่งแล้วๆ ส่วนวิธีการคือสิฮู้ทุกคนเนาะคับเนาะ เอารสจัดๆแหน่เด้อ ยามกินกับผัดหมี่จั่งบ่เปลือง
ตกลงว่ามื้อนั้นกินผัดหมี่เหมิดสองจาน อิ่มฮอดยามมื้อแลงกะยังว่า ไคแหน่อยู่คับ สำหรับไผที่เบื่อข้าว อยากเปลี่ยนเมนูอาหาร อีกโดนอยู่ดอกกว่าสิอยากกินอีกอุบอิบ
ปล.ผมตัดภาพออกหลายภาพคับ เพราะว่าเวลาเอาลง ระบบสิบอกว่าอิมเมจเกิน ให้ใส่ได้บ่เกินสิบ พะนะ รวมสัญลักษณ์แสดงอารมณ์ เลยบ่ได้ภาพครบปานได๋คับ รวมทั้งภาพฝานบักหุ่งนำ อิอิ
อ้างข้อความนี้
แซบๆๆ นำจ้า
Bookmarks