ความอุ่นใจที่ได้จากบ้านมหา

[เขมราฐ]

ตอนแรกน้องเขมว่าสิให้ห้องไดอารี่กลับสู่สภาพเดิมก่อนจั่งสิบันทึก

แต่น้องเขมกะอดบ่ได้ค่ะ มีภาระกิจมากมายจนห่างหายไปดน กลับมาอีกเทื่อ

อ้าวไดอารี่ที่รักคือเป็นแนวนี้น้อ... บ่เป็นหยัง

มื่อวานนี้ค่ะ 10 พ.ค. 2552 น้องเขมมีโอกาสไปทำบุญขึ้นบ้านใหม่อ้ายธนิตย์

(คนพนมไพร) เจ้าของบ้านเพิ่นบอกว่าหาเรื่องพ้อกันซื่อ ๆ ดอกหล่า

อาหารการกินกะเฮ็ดกันเองโลดหล่า... เดินทางไปถึงบ้านเพิ่นเกือบเที่ยงแล้วค่ะ

ไปฮอดอ้ายบ่าวโจ่โล่เฝ้าบ้านอยู่ผู้เดียว น้องเขมไปพร้อมกับอ้ายบ่าวจัย

อ้ายเอ๋(คนตระการ) พอแต่ไปฮอดอ้ายบ่าวโจ่โล่ กะไล่เข้าครัวไปหย่องหมากตาล

เฮ็ดบุ้นหมากตาลเลย ยืนเก้ ๆ กัง อยู่คราวหนึ่ง เอาว่ะมันคงสิบ่ยากปานได๋ดอกติ๊

ปอกเปลือกหมากตาลได้หน่วยหนึ่ง มีสมาชิกมาเพิ่ม อ้ายพล พญาแล อ้ายต่วง

อ้ายคำบัง เอื้อยมันฑนา มีคนซ่อยแล้ว พี่กล์อฟมาแล้ว หย่องหมากตาลซ่อยกัน

บุ้นหมากตาลแล้วประมาณเที่ยง พงศ์น้อย ส กาสิน กะมาค่ะฝ่ายท่านชายเริ่ม

สนทนากัน น้องเขมกับเอื้อยมันฑนา อ้ายบ่าวโจ่โล่ ไปตลาดหาเสบียง ตอนแรกกะ

คึดยากพี่หน่อยแม่ครัวประจำคุ้มสามเสนบ่มานำ จั่งได๋้น้อขายหน้าซะน้อ แนวเฮ็ดกับข้าว

บ่เป็นเนาะค่ะ เมนูกะบ่มีหยังหลายค่ะ ข้าวปุ้นน้ำยาป่า บุ้นหมากตาล มีปลานึ่งมะนาว

ระหว่างเฮ็ดกับข้าวอยู่นั่น อ้ายชายน้อยกะนั่งแท็กซี่สีชมพูอ่องต่องมาสมทบ

เฮ็ดกับข้าว กินข้าวแล้วเจ้าของบ้านเพิ่นกะยังบ่ทันมา

ย่อนเพิ่นไปเก็บของจากอีกบ้านค่ะ ระหว่างกินข้าวอยู่นั่นกะได้ต้อนรับสมาชิกอีกคนค่ะ

สะใภ้อีสาน (พี่นิ) มาสมทบอีกบรรยากาศครึกครื้นขึ้นมาอีกค่ะ พอรถขนของมาถึง

อ้าย ๆ เพิ่นกะซ่อยกันยกของเข้าบ้านน้องเขมเห็นบรรยากาศแห่งการช่วยเหลือ

มิตรภาพที่น่าทึ่งแล้วกะรู้สึกดีค่ะ บ่คิดว่าในโลกไซเบอร์สิมีมิตรภาพแบบนี้อีหลี

รักบ้านมหาค่ะ รักพี่น้องบ้านมหา ขอบคุณทุกสิ่งอย่างที่เฮ็ดให้เฮามาพ้อกัน

ขอบคุณผลบุญที่เคยเฮ็ดร่วมกันมา น้องเขมสิอยู่หม่องได๋ มุมได๋้น้องเขมกะสิ

บ่ลืมค่ะ