ก้อยปลานิลไทอำนาจ............

[บ่าวทิพย์คนอำนาจเจริญ]

หว่าสิโพสแต่มื้อวาน เวบฝากรูปมีปัญหาเลยบ่ได้โพสซ้ำ::) ไปหัดฝากอยู่เวบเขียดตะปาด ซามสิเฮ็ดเป็นจนคร้านพี่น้อง มื้อก่อนกะบ่ได้เฮ็ดโอครับ(คร้าน อิอิ)ย้อนหว่าหมู่ชวนไปกินก้อยปลา(อีกแล้ว) ไปตลาดใกล้บ้านครับพี่น้อง ได้ปลานิลโตละโลมา 2 โต
เริ่มเฮ็ดเลยน้อครับ เดี๋ยวเหล้าสิเบิดก่อน::)::)

ขอดเกล็ดลอกหนังออกครับ แล่เอาแต่เนื้อ หั่นตามยาวแล้วหั่นขวางให้เป็นชิ้นบางๆครับ

ไปฮอดค่ำโพดครับ เลยบ่ได้ไปเอามดแดงในสวน กะใช้บักนาวนี้หละครับ บีบลงไปจัก 10 หน่วย คนให้เข้ากันครับ เสร็จแล้วปั้นน้ำออก (น้ำที่ปั้นออกอย่าถิ่มเด้อครับ เอาไว้ใส่ต้มหัวปลา)

สำหรับหัวปลากะตั้งหม้อใส่เครื่องต้ม ต้มเลยครับพี่น้อง แนวส้มบ่ต้องใส่เด้อ เอาน้ำที่คั้นออกจากปลานั่นหละครับใส่ลงไป ขาดบ่ได้คือยอดใบหม่อนอ่อนครับ อิอิ

ไส้ปลาอย่าถิ่มเด้อครับ ตัดพุงถิ่มอย่างเดียวเพราะว่าเป็นปลาเลี้ยง ล้างดีๆครับ เอาใส่หม้อ ใส่ผักอีตู่-ผงนัว เอาตั้งไฟให้สุก เอาไว้เฮ็ดแจ่วขมจ้ำครับ อิอิ

แนวกินกับก้อยปลาครับ ยอดสะเดาอ่อน สิกินดิบเลยกะได้แต่มันบ่หอม เอาไปเผาไฟก่อนครับ เผาไฟพอลวกบ่ต้องให้ไหม้ กินกับก้อยปลาหรือลาบปลาเข้ากันปานหยัง สำหรับเนื้อปลาที่บีบน้ำบักนาวออกแล้ว เอาทัพพีบี้ให้แตกครับ เสร้จแล้วกะปรุงเครื่องเลยครับตามใจชอบ

เสร็จแล้วครับพี่น้อง มา มา ไส้ปลาที่เอาะไว้ กะเอามาปรุงแจ่วเลยครับ ขมอ่ำหล่ำดีปานหยัง กินข้าวนำกันครับ
คำเตือน=การบริโภคอาหารสุกๆดิบๆอาจทำให้เกิดโรคพยาธิ
กะซั้นอย่ากินเด้อครับแบบพอสำได๋ส่ำหนึ่ง ต้องกินคือบ่าวทิพย์นี้ครับ อิอิ ดิบกะดิบคือก้อยปลา สุกกะสุกคือต้มปลา จั่งบ่เป็นพยาธิ อิอิ