อันว่าชื่อในสมัยก่อนนั้นผู้เฒ่าเพิ่นกะตั้งให้ตามกะเหยิมเนาะ เพราะเพิ่นบ่ได้ไปฝากท้องคือสุมื่อนี้เนาะค่ะ เพิ่นกะเลยบ่ฮู้ว่าเด็กน้อยในท้องแม่นั้นเป็นผู้ชายหรือผู้หญิง เพิ่นกะเลยบ่ได้เตรียมตั้งชื่อไว้ท่า พอลูกคลอดออกมา หมอตำแยเอิ่นบอกว่าได้ลูกผู้ชายหรือผู้หญิงเด้อทอนั้นละ ผู้เป็นพ่อกะงวกซ้ายงวกขวา เห็นอิหยังเป็นตาตั้งเป็นชื่อ เพิ่นกะเอามาตั้งให้โลดตั่ว นับตั้งแต่ของกินไปจนฮอดของใช้เนาะค่ะ บ่ว่าซิเป็น บักต้องแลง บักแขง บักเขือ บักพริก บักหนาว บักแตงโม บักน้ำเต้า บักเงาะ บักสีดา มีฮอดชื่อผักชื่อหญ้ากะว่ากันไปเนาะค่ะแล้วแต่เพิ่นซิแนมไปเห็นอิหยังในตอนนั้นว่าซั่นเถาะ หมู เห็ด เป็ด ไก่ ปู ปลา นา น้ำ กบ เขียด หอย กะว่าไปที่ไล่มานี้ชื่อคนเด้อค่ะ บาดนี้พวกของใช้กะซิมีชื่อว่า หมอน หวี ช้อน แปง แป้ง โอ้ยไล่ไปบ่เบิ่ดดอกเนาะค่ะกะแค่ยกโตอย่างมาเล่าสู่กันฟังทอนั้นละ แต่ผู้ข้ากะบ่ฮู้ว่าขเจ้าตั้งเป็นชื่อเล่นฮือว่าชื่ออิหลีเพราะว่ากะยังมีให้ได้ยินยุ แต่ว่าคนสุมื้อนี้ส่วนใหญ่เพิ่นกะเอามาตั้งเป็นชื่อเล่นซะมากกว่าและกะเติมคำนำหน้าให้มันฟังเบิ่งสุภาพขึ้นกว่าเก่า คือจังคำว่าน้องแตงโม น้องบักขาม น้องพริก น้องปู น้องปลา กะว่าไปเนาะค่ะ อีกอย่างเด็กน้อยสุมื้อนี้พากันนิยมชื่อฝรั่งพู้นตั่ว ชื่อพวกนี้เพิ่นว่าเชยรับบ่ได้พะนะ โตผู้ข้าเองกะมีหมู่ชื่อ จิ๋ม เำิ่พิ่นกะจ่มเช้าจ่มแลงอยู่คือกันว่า จักพ่อแม่ตั้งมาได้จังได๋ เพิ่นว่าคันนั่งรถเข้าไปในเมืองในนา อย่าเอิ่นชื่อเฮาเด้อ "อายคนวะ"ว่าซั่นเพิ่นว่า แต่กะเว้าไปแล้วชื่อที่พ่อแม่เฮาเพิ่นตั้งให้นั้น บ่อว่าซิชื่อเล่นฮือชื่ออิหลีมันกะดีเบิ่ดนั้นละเนาะพี่น้องแม้นบ้อค่ะ...
Bookmarks