บอร์ด เงี๊ยบ เงียบ หรือว่า หนูคิดไปเองป่าวนิ
สวัสดีท่านอาจารย์ทุกท่าน....กับทั่งผู้ใหญ่บ้านพร้อมไพร่พล...
ทุกสิ่งเริ่มแรกต้น..... ขอกล่าวคำจา ....เด้อญาอ้ายเอ้ย....
เบิ่งคนบ้าน(มหา)นี้
เป็นคนมีศิลแท้รักษาธรรมเป็นใหญ่
เหลียวเบิ่งไผ๋มีแต่ผู้โก้ๆ สมเจ้าผู้ดี
ด้วยเหตุนี้ ย้อนว่ามีผู้นำพา
ศาสนาทางวัดช่อชูดูค้ำ
เป็นผู้นำสอนให้ทำใจส่อง
ผู้ที่สองต้องเป็นผู้ใหญ่บ้าน
เหลียวเบิ่งคือกันเบิ๊ดสู่แนวดีแท้
.
.
.
ขอไปแบบสำมะแจะ เด้อค่าอาจารย์ คำได๋ บ่ควร กะลบ เด้อค่า
สมัยสู่มื้อนี้ คนซั่วเป็นคนดี
คนกาลี ได้นั่งปองเป็นเจ้า
คนชรา คนเฒ่า หัวขาวแข่วหล่อน
อ่อนนำผู้หนุ่มน้อย บ่หาญกล้าลื่นเขา
คนของเฮา ความดีอยู่หม่อ ๆ
ไผ๋สอพลอ คดเลี้ยว แปลงลิ้นอวยเป็น
ไผ๋ฮู้จักแล่นเต้น ลูบแข่งเลียขา
ไผ๋ผู้มีปัญญา ปากดังฟังก้อง
บ่อึดซุมคนย้อง สรรเสริญ เดินใส่
มีแต่ผู้อยากได้เป็นเพื่อนมิตสหาย
พอปานพรามชูชกกะว่าสวยรวยแบงค์
มีคนแยง คนหย่อง คนมอง คนหล่ำ
ดำคือกาขี่หลี่ ผีเป้า กะหว่าขาว
ซุมผู้หญิง แข็งกล้า มารยาบ่เคยอ่อน
ตั้งแต่กี้แต่ก่อน ซุมผู้หญิงโง่แท้..
...บ่แหลมเซื่อมท่อซาย...
สู่มื้อนี้เปลี่ยนย้าย..หมุนกิ้วเป็นเกียว
หนทางเทียวคราวไกล กะหย่อมาเป็นไกล้
พวกผู้สาว ผู้แส่ ผิดกันแท้กว่าแต่หนหลัง
คือดั่งสังขะเจ้า ถือฮีตบ่คือกัน
มันกะเป็นตามยุค ทุกข์ทวีไปหน่า
จบแนว สำมะแจะ ค่า :em01)
น้อมขอบคุณ.....
บิดา มารดรผู้สอนความรู้
พร้อมทั้งครูสอนให้ โรงเรียนเขียนอ่าน
สอนลูกหลาน ให้ฮู้ศึกษาได้อย่างดี
มีเกียรติ มีศรี สง่า ดีล้น
ให้สมกับเป็นไท...อุบลเมืองคนนักปราชญ์...
......น้อมรำลึกถึง ตา เทียม บุญโสม ผู้เป็นทั้งตาและอาจารย์ แต่งกลอนลำให้หลานได้หัดอ่าน หัดเขียน และจะสืบทอดเอาไว้ให้ลูกหลานได้ศึกษาต่อไป เช่นกัน......
Bookmarks