สวัสดีจ้า พี่น้อง เอื้อยๆ อ้ายๆ ไทบ้านมหาสู่ผู้สู่คนจ้า มื้อนี้บักขามป้อมเอาวิธีการเฮ็ดหมูกรอบมาฝากจ้า คงสิบ่แม่น สอนจรเข้ว่ายน้ำ หรือว่าเอาบักพร้าวห้าวมาขายสวนดอกน้อจ้า
ตามปกติบักขามป้อมกะกินอยู่ธรรมดาๆ นี่ล่ะจ้า อาหารการกินกะแบบอีสานบ้านเฮาทั่วๆ ไปนี่ล่ะ ขาดบ่ได้แม่นปลาแดก ก๊าก แต่มื้อวานนี้อยากกินกระเพราหมูกรอบจ้า กะเลยไปหาสูตรในเน็ต พ้ออยู่หลายสูตรอยู่จ้าแต่บักขามป้อมเลือกเอาสูตรที่ง่ายที่สุด เป็นสูตรของ
ป้านัท - ลุงวิทย์ จากครัวไกลบ้านจ้า เบิ่งวิธีการเฮ็ดแล้วกะคงสิบ่ยากเกินความสามารถปานได๋ ตัดสินใจได้แล้วกะเลยไปหาหมูสามชั้นมาซะก่อนดอก
เครื่องปรุงกะมี
- หมูสามชั้นติดหนัง
- เกลือ
- น้ำส้มสายชู
ได้หมูมาแล้วกะเอามาล้างให้สะอาด เอาน้ำใส่หม้อกะว่าพอให้ท่วมหมูจ้า ตั้งไฟให้เดือด ใส่เกลือลงไปจักช้อน ตามด้วยน้ำส้มสายชูจ้า เอาหมูใส่ลงไป ต้มให้สุกจ้า กะว่าสุกพอดีๆ บ่ต้องถึงขนาดเปื่อยเด้อจ้า
กะว่าหมูสุกแล้วตักขึ้น พักไว้จ้า เอาเกลือใส่จักหน่อย อย่าใส่หลายเด้อจ้ามันจะเค็มโพด ตามด้วยน้ำส้มสายชู กะว่าพอทั่วๆ หมูที่เฮามี เอาส้อมจิ้มๆ ให้ทั่วเลยจ้า หม่องหนังหมูพร้อมให้เครื่องปรุงได้ซึมเข้าไป แล้วกะเวลาทอด น้ำมันจะบ่กระเด็นหลายจ้า
หลังจากนั้นกะให้เอาหมูออกไปผึ่งลมข้างนอกให้มันก้ามๆ หมาดๆ จักหน่อยค่ะประมาณจัก 2 ชั่วโมงค่ะ พลิกกลับไปกลับมาแหน่เด้อจ้า
ช่วงที่ถ่าให้หมูมันได้ที่ กะขอพักกินข้าวก่อนจักหน่อยจ้า บ่ายแล้วตาลาย
กินข้าวเซามีแฮงแล้ว กะได้เวลาทอดหมูกันแล้วจ้า เอาลงกะทะทีแรกน้ำมันกระเด็นแหน่อยู่จ้า ซูมได้ซ่ำนี่ล่ะ ข้อยย้านน้ำมันกระเด็น ก๊าก
ใช้เวลาทอดบ่โดนจ้า เพราะว่าหมูมันสุกแล้วเนาะ ทอดไปลุ้นไป เป็นตาได้กินนำเพิ่นบ่น้อ กรี๊ดดดดด คืออยู่จ้าคืออยู่ ดีใจหลาย
ถ่าให้มันเย็นแล้วหั่นได้เลยจ้า เป็นจั่งได๋ หน้าตาหมูกรอบของบักขามป้อมพอสิไปวัดไปวานำเพิ่นได้บ่จ้า ลองชิมเบิ่งกะแซบอยู่จ้า เค็มๆ มัน ผู้ได๋อยากกินกับข้าวฮ้อนๆ หือสิเอาไปผัดกับคะน้ากะตามใจเด้อจ้า แต่ว่าบักขามป้อมอยากกินผัดกระเพรา ลงไปหาเก็บใบกระเพราจักบาดก่อน
ได้ใบกระเพรามาแล้ว กะล้างน้ำเด็ดใบพักไว้ เบิ่งซงเป็นตาแห้งโพด กะเลยหั่นหอมหัวใหญ่ใส่นำจักหน่อย ใส่ชูรส น้ำปลานิดหนึ่ง ซอสหอยนางรม (ผู้ได๋มักน้ำตาลกะใส่เด้อจ้า แต่บักขามป้อมบ่มักแหม) ตำพริกกับกระเทียม แล้วกะตักลงไปโปะๆ นำกันโลด เตรียมผัดจ้า
เอาน้ำมันใส่กะทะนิดหนึ่ง น้ำมันฮ้อนแล้ว เทลงไปโลด บางคนอาจเจียวกระเทียมกับพริกก่อน อันนั้นกะแล้วแต่มักแบบได๋เนาะจ้า แต่ว่าบักขามป้อมมักแบบนี้ (เห็นร้านตามสั่งคะเจ้าเฮ็ดหั่นหนา) ถ้าแห้งหลายกะเติมน้ำซุป หรือน้ำเปล่าลงไปได้เด้อจ้า
สุกแล้วจ้า มาเด้อจ้าพี่น้องมากินข้าวนำบักขามป้อมจ้า ท้ายสุดและสุดท้ายกะขอขอบคุณสูตรดีๆ จาก ป้านัท - ลุงวิทย์ จากครัวไกลบ้านจ้า ที่เฮ็ดให้บักขามป้อมมีหมูกรอบเป็นของเจ้าของ แล้วยังได้เอามาฝากพี่น้องบ้านมหาเฮานำจ้า เชิญแซบจ้า
อ้างข้อความนี้
Bookmarks