ฮ่ำฮี่ฮ่ำฮอน.คองคอยท่า จนข้าวใหม่มาเถิง คองคอยเหิ่ง จนข้าวปลา นาแล้ว
คอยยอดแก้ว คอยไป บ่มีค่า คอยจนว่า ข้อยเฒ่า ตัวเจ้าไปอยู่ไส
คอยอยู่ไฮ่ เจ้ากะบ่มา คอยอยู่นา เจ้ากะบ่อ่วย คอยอยู่ห้วย ทะเลกว้าง กะบ่เห็น
หรือเจ้าไปหาเล่น นอนเว็นนำผู้บ่าว จั่งบ่ต่าวสู่บ้าน คืนหาอ้ายผู้อยู่คอย
หรือใจลอยไปนำชู้ ให้เขาถูลูบคลำเบิ่ง อ้ายคอยเหิ่ง จนควายด่อน ออกลูกน้อย คอยแล้วกะบ่มี
หรือเจ้าหนีไปหาเล่น หลงป่าดงหนา จั่งบ่กลับมาหาบ่าวพี่ชายอยู่ทางพี้
หรือผีมันจับหัวไว้ บ่ให้ไปในทางอื่น คอยเหมิดคืนจนซอดแจ้ง ตะเว็นขึ้นกะบ่มา
อ้ายไปก่อนเด้อหล่า ชาติสิมาเจอกันใหม่ ชาตินี้คงบ่ได้ ไปเอาพุ้นชาติสิมา เด้อนางเอย