...หนึ่งชีวิตเคยฮักเจ้า คงสิเว้าว่าเฮ็ดใจ...

[บ่าวโจ่โล่]

ตั้งแต่มื้ออ้ายมีเจ้า จักความเหงาไปไสแน่ บางมื้อเหลียวเบิ่งแญ่ (แย้) ยังยิ้มแปล้เข้าไส่มัน

เดินตามฝันไปสุดฟ้า ดวงดาราปานลอยต่ำ เพลงพึมพำกะหลงเต้น สิเย็นฮ้อนอ้ายบ่แคร์

ทุกซอกแจมีหน้าเจ้า ยิ้มผ่านเงาหัวใจอิ่ม ดอกรักพิมพ์กลางใจอ้าย ชายคนนี้ที่รักเธอ

มื้อนี้เจอความเจ็บช้ำ หัวใจตำความหว้าเหว่ ได้ย่างเซวินบักหว่า คิดเห็นหน้ากะแม่นซัง

ตัวที่ยังพอยืนได้ ทางหัวใจมันสิ้นท่า เพียงน้ำตาแสดงออก บอกว่าฮักอ้ายเป็นแค่ลวง

โลกใหญ่หลวงที่เคยแจ้ง ดาวสิ้นแสงเดือนมอดมิด หนึ่งชีวิตเคยฮักเจ้า คงต้องเว้าว่าเฮ็ดใจ

[เมษา]

มันคือเศร้าแท้ อ้ายบ่าว

[ข้าวปาด]

เพลง กับ กลอน พาไปบาดนิ มว่นๆๆอ้าย

[sompoi]

อ้ายเอ๋ย..

วาสนาบ่ได่ซ้อน ใจอาวรณ์กะดายเปล่า นับตั้งแต่อ้ายส่งเว้า ไปดีเด้อเจ้าคนละทาง

ความอ้างว้างมาถามไถ่ ทางเทียวใจกะไกลเยิ้น ความที่ยังฮักเหลือเกิน แต่ปากนั่นว่าลาก่อน

ปรารถนาฮ่วมทุกข์ฮ่อน คู่เคียงคอนสู่บ่อนซาน นำหยาดน้ำสู่บาดย่าง อานิสงค์สร้างบาดบ่ไส

นางป่านไซหลังล้า ฝนบ่มาปลาบ่หลั่ง มาปักช้าล้าทีหลัง ได่นั่งเศร่าเฝ่าไซเปล่า

ความคึดฮอดจอดส่งเว้า แอบซุกเข้าใส่มโน บ่หาญโสปากได่ แต่ทางใจเฝ่าห่วงหา

เหมิดชีวาอยากฝากไว้ ขอให้อ้ายได่สุขหมั่น หนึ่งชีวิตฮักไผ๋นั่น จักสิผันลืมจั่งได๋...อ้ายเอ้ย

แฮะๆ..ส่งการบ้านเด้ออาจารย์ ..ติชมแน่เด้อจ้า ฮ่าสิได่หัดแต่งไปนำแน่เนาะ.. ฮ่าลางเทือแต่งม่วนหลายกะบ่กล้าเว่านำแหล่ว..

[พล พระยาแล]

เมื่อมีฮักเบิ่งหยังกะมีความสุขครับ ขนาดเหลียวเบิ่งแย้กะหัวได้น้อ ฮ่า ๆ ๆ

ป๊าดด บ่ธรรมดาตั๊วเนี่ย กรี๊ดดด เอาอีก ๆ ๆ


"คึดฮอดน้องต่างถิ่นแดนไกล อย่าสิไลลืมกันผูกสัมพันธ์อย่าปะม่าง
ให้สร้างทางฮักไว้ เทิงผู้อยู่แดนไกล กะมายามกันคือเก่า
ให้มาตุ้มมาเค้ากินข้าวดอกฮวมพา พะนางเอ้ย
ลาบปลาดุกยังคอยถ่า คุ้มสามเสนบ้านมหา ยังคอยส่อง
นั่งรอคอยผะนาดน้อง มาเกี่ยวข้องกินฮวมพา นางเอ้ย"

[น้องขวัญ]

เส้นทางฝันนั้นสูนสิ้น น้ำตารินกินแห้วก่อน หลับพักนอนตอนเหมื่อยล้า เวลาช่วยมื้อป่วยใจ

แสงแดดใสในมื้อหน้า ฟ้าสีครามงามคือเก่า เพียงใจเฮาเซาจากท้อ ขอฝันร้ายจากม่ายลา

ตามประสาความเจ็บช้ำ อาจเป็นกรรมทำร่วมก่อ บุญบ่พอรอซ่อยค้ำ จั่งนำพรากจากคู่กัน

ให้อ้ายหันไปทางหน้า โบกมือลาความหลังเก่า ทิ่มแสงเงาความเจ็บแค้น สิยิ้มแป้นดอกเมื่อลืม อ้ายเอ๊ย

ร่วมแจมนำแน่เด้อจ้า อ้ายบ่าว เอื้อยคนสวย จ้าาาาา

[sompoi]

ปร๊าดดด.. มีแต่ผู่คักๆบาดเนี้ยะ .. เทิ้งน้องขวัญน้องใหม่คนงามประจำบอร์ดอีกคนเนาะ.. และอ้ายพลคนดังแห่งค่ายส.สามเสนมิวสิคแม๋ะ.. มาๆ มาเว่านำกันเด้อจ้า ผญาแฮงมิดๆยุ ตั้งแต่อ้ายศรีห่างไป อ้ายโจ่โล่กะยากนำแต่ผุสาว โอ่ะ เวียกเล้าเนาะ..ฮ่าๆๆ

ปล. อ้ายพลขร๋า ..
"บ่ลืมได่ดอกเด้อเจ้า นั่งพาข้าวบ่ายลาบปลา สองอ้ายน้องยังบ่ลา สิบอกอ้ายว่า..เพิ่มเป็นหมกปลาซิว..อีกเมนูหนึ่งได่บ้ออ้าย.."

อิอิอิ.. พาแลง๓เนาะอ้ายเนาะ.เก็บค่าเครื่องอยู่จ้า..คริๆๆ

[plasak]

ม่วนหนอครับคนกะหล่อเพลงกะซึ้งครับ