แม่ใหญ่น้องออมสินถามว่า "ทิดเอ๊ย ข้างบ้านเผิ่นไปสระปลา ได้ปลาไหลมาหลายเติบ เอาไว้เฮ็ดกินบ่" เซียงเหมี่ยงฯ เลยให้เฒ่าแม่เผิ่นเอามาโลหนึ่ง ปิ้งให้พ่อใหญ่น้องออมสิน สองคาบเหลือไว้ให้เซียงเหมี่ยงฯ สองโต กะลังผัดแซบ ๆ ครับ...
พอได้แล้วกะจัดการ ให้เอี่ยนหยุดดิ้นให้ได้ก่อนครับ อันดับแรก บ่ซั่นซิเฮ็ดหยังบ่ได้เลย ฮ่า ๆ พอหยุดดิ้นแล้ว เซียงเหมี่ยงฯ จัดการเอาเมือกออกครับ เป็นขั้นตอนที่ ยุ่งยากพอสมควร หากล้างน้ำเปล่า ๆ บ่มีทางเมือกจะออกหมดครับ เซียงเหมี่ยงฯ ลองมาหลายวีธี การเอาเมือกปลาไหลออก ตั้งแต่ใช้เกลือรูด ใบข่อย ใบตะใคร้ ถือว่าใช้ได้ระดับหนึ่ง แต่วิธีที่ดีที่สุดคือ ขี้เถ้าครับ ขี้เถ้าไฟข้างเตาเฮานี้ล่ะครับ เอี่ยนที่หยุดดิ้นแล้ว คลุกขี้เถ้ารูดเมือกออก เฮ็ดจักสี่ห้ารอบ กะเรียบร้อยแล้วครับ ใช้เวลาน้อยกว่าวิธีอื่นหลาย และกะออกหมดเกลี้ยงดี หลังจากนั้นล้างขี้เถ้าออกให้สะอาดเด้อครับ บ่อแม่นว่าสิเฮ็ดกินเทิงขี้เถ้าแบบนั้น มัน หย่าแข่วเนาะครับ(หมายถึงระคายฟันครับ) ฮ่า ๆ ๆ ...
ได้แล้วออกมาเป็นแบบนี้ครับ
จัดการหั่นเป็นท่อน ๆ ครับ เพื่เตรียมผัด เอาท่อนแบบพอดีคำ ประมาณความยาวนิ้วหนึ่ง เซียงเหมี่ยงฯ ผัดสด ๆ ครับ บ่ทอดกรอบก่อน เพราะว่าแบบนั้นเสียรสชาดของปลาไหล ซึ่งการทอดก่อน บ่ต่างจากการได้กินผัดเผ็ดปลาดุกทอดกรอบเลย รสชาดเนื้อของปลาไหลหวาน อร่อย ห่างไกลจากปลาดุกมากครับ ที่เฮาไปสั่งกินตามร้านเพราะว่าทางร้านบ่กล้าผัดสดย่านเรื่องของการเอาเมือกออกบ่หมดคาว เสียเวลา แต่ว่าถ้าวิธีของเซียงเหมี่ยงฯ รับรองว่าเมือกหมดกลิ่นคาวบ่มีครับ...
จากนั้นเตรียมเครื่องผัดครับ เซียงเหมี่ยงฯ เอาเท่าที่หาได้ครับ ขาดพริกไทยอ่อน...
มี กระเทียมหนึ่งหัวโขลก พริดแกงประมาณสองช้อน(กะเอาครับ) ขิงซาย(กระชาย)หั่นฝอย อีตู่ไทย(กะเพรา)
บักเขือขื่น ฝานตามยาว แช่น้ำเกลือรอไว้ น้ำเกลือซ่อยบ่ให้บักเขือดำ ครับ...
ขั้นต่อมา ตั้งกระทะ น้ำมันใส่ ไฟอ่อนก่อน เจียวกระเทียมให้หอม ๆ ...
ใส่พริกแกงลงไปผัดให้หอม จามไปสามบ้านแปดบ้านเลยยิ่งดีครับ แสดงว่ามีแววแซบ ฮ่า ๆ ...
ใส่ปลาไหลลงไปผัด ปรุงรสด้วย น้ำปลา ซอส น้ำตาล ซีอิ๊วขาว ผัดต่อกะว่าให้เนื้อกึ่งๆ จะสุก...
ใส่ กระชาย ใบมะกรูดหั่น
ตามด้วยมะเขือ
พอผัดจนบักเขือเริ่มสลดแล้วใส่น้ำซุป หรือ น้ำเปล่าได้ครับ พอให้ท่วมทิ้งไว้ให้ผักสุกเนื้อเปื่อย ...
ใส่กะเพรา ชิมรส...
ตักใส่จาน ข้าวเหนียวกะได้ เซียงเหมี่ยงฯ ทานกับข้าวจ้าวครับ เฮ็ดเองกินเอง อยู่บ้านมี พ่อใหญ่น้องออมสิน กับเซียงเหมี่ยงฯ กินเอี่ยนอยู่สองคน แต่พ่อใหญ่เลากินปิ้ง บ่กินผัด...
เซียงเหมี่ยงฯ เลยเอามาสู่พี่น้องบ้านมหากินนำกัน เซิญแซบครับผม...
ขอได้รับความขอบคุณจากครัวเซียงเหมี่ยงฯ ครับผม...
Bookmarks