แกงผักหวานป่าใส่ไข่มดแดง

[ติ๋ม เปอร์โย]

เข้าบ้านบ่ได้หลายมื้อเกือบใจขาดจ้าพี่น้อง...คึดฮอดพี่น้องบ้านมหาทุกคนเด้อจ้า...
ติดหิมะหลายมื้อ อาหารกะบ่ค่อยสิมีกิน งานกะยากจักว่าแนวใด๋...หละเป็นหยุ่งๆคือไหมในบุงหนี่หละ
บ่เว้าหยังหลาย เว้าไปกะปวดหัวเนาะ กินดีกว่า ไปร้านไทยมาจ้าไปหามาม่ามาไว้กิน เทือหิมะตกแฮงอีก ไผสิไปฮู้
ได้ข้าวสารจ้าวมากระสอบ20กิโลกรัม น้ำปลา พริก มาม่าอีก1ลังขาดบ่ได้จ้าอากาศแบบนี่
ไปพ้อผักหวานกับผักอิตู่ โชคดีอิหยังปานนั่น กะเลยซื้อมาแกง มาเบิ่งแกงแบบไกลบ้าน หน้าตาสิเป็นแบบใด๋

แกงใส่ไข่มดแดงพร้อม...ไข่มดแดงแช่แข็งมาขายคือเก่าหละ สดๆบ่พ้อนำบ้านเพิ่นดอก

หน้าตาผักหวานจ้า กว่าสิเดินทางมาฮอด มาฮ้อนๆมาเจอหนาวเกือบเป็นน้ำ อิอิ

เครื่องปรุงจ้า
ผักหวานป่า2กำ เด็ดเอาแต่ส่วนอ่อนๆสิได้กินง่ายๆ ล้างน้ำไว้เลยจ้า
ผักอิตู่(ใบแมงลัก)เฮ็ดคือกันกับผักหวาน
ไข่มดแดง1ถุง
พริกสดจัก3-4หน่วย ใส่เป็นลูกโดด
เห็ดเท่าที่หาซื้อได้จ้า ติ๋มใช้เห็ดกระดุม(แซมปิยอง)
ปรุงรส ปลาแดก(ปลาร้า) น้ำปลา ผงนัวนิดหน่อย คั่นมัก
พริกแกง
ตำพริกแห้งใส่เกลือ ใส่กระเทียม หอมแดง ตะไคร้หั่นจัก2ต้น ข่าหั่นจัก3แว่น ข้าวสารแช่น้ำจัก1ช้อนโต๊ะ
โขลกพอหยาบๆค่ะ บ่ต้องละเอียดหลาย แกงอีสาน
เอาน้ำใส่หม้อตั้งไฟ พอเดือดใส่เครื่องพริกแกง เอาปลาร้าใส่กระชอนใส่ลงในหม้อแกง
พอปลาแดกเหลือแต่ก้างกะถิ่มไป ปรุงรสให้พอดี แล้วใส่ไข่มดแดง สุดท้ายกะใส่ผักหวาน ผักอิตู่ ปิดไฟโลดจ้า

ตักเสริ์ฟกับนึ่งข้าวเหนียวดำ...ตำแตง ทอดปีกไก่แก้เผ็ดนำจ้า
มาเด้อพี่น้องกินข้าวนำกัน เป็นมื้อที่แซบที่สุด ในรอบหลายๆเดือน...คึดฮอดแฮงเด้อแกงผักหวาน
คึดฮอดแต่เป็นสาวส่ำน้อย พากันไปเก็บผักหวาน ม่วนแฮง ไปนำกันหลายๆคนมีทั้งผู้สาว ผู้บ่าว ผู้เฒ่า
ทุกมื้อนี่คือสิบ่มีแล้วหละเนาะบรรยากาศม่วนๆแบบนั่น

เอ้าตักแจกคนละถ้วยจ้า...ติ๋มกินแต่แกงจนเบิดถ้วย ตำแตงกะเบิดจาน แทบสิบ่กินข้าว อิ่มคักกะยังว่า....