กำลังแสดงผล 1 ถึง 5 จากทั้งหมด 5

หัวข้อ: เขียนจดหมายฮอดผู่สาว

  1. #1
    hot
    Guest

    เขียนจดหมายฮอดผู่สาว

    จาก ที่อุกอั่งเอ้า แสนโศกในมโน วันที่โศกาทุกข์ อั่งพระทัยฝันเพ้อ เดือนละเมอถึงเจ้าจันโทบ่ใสแจ่ม พ.ศ.แฮม " ห่างซ้อน นอนไห้ห่วงหา
    เถิง. แม่จันทนาเนื้อ หน้ามน คนคิดฮอด
    สารนี้ชื่อว่า อักษรใช้ ลายเซ็นนำส่ง . เพื่อประสงค์ข่าวข้อ ขอซ้อนฮ่วมพระมัย . ก็จึ่งแปลงสารใช้ เขียนผญาแต้มแต่ง . มาแสดงต่อน้อง ยามแค้นคลั่งกระหาย . โอน้อ?เจ้าผู้จันทนาเนื้อ แก้มอ่อนๆ ละมัยผิว เฮียมเอ้ย . ขอให้แยงผญาเถิง บ่าวพี่ชายปางนี้ . เจ้าผู้จันทจรแจ้ง พี่จงใจสมสวาท . นับแต่พ้อพบน้อง บ่มีมื้อสิหล่ายลืม ได้แหล่ว . อันแต่ในมโนอ้าย ทลายลงล้มล่าว . แสนสาวมานั่งล้อม บ่ปานน้องผู้อยู่ไกล . เทื่อนี้ พี่จึงลิขิตข้อ ขอขอดพระทัยฮัก . ขอให้กูณาผาย โผดเฮียมยามแค้น . คันสิขังมโนไว้ อกสิเพพังมุ่น เอาแหล่ว . พี่จึงปูนแต่งแต้ม กลอนแก้ข่าวสาร . ขอให้นางคราญน้อง ยอฉลองเทียมเนตร . " หลิงหล่ำสารสอดฮู้ ประสงค์แจ้งฮอดชาย แด่ท่อน
     พี่พ่องกลัด พ่องกลุ้ม หลงฮูปละเมอเถิง . ว่าสิปองเอาอวน ยอดนางมานอนซ้อน . ขอให้ดวงสมรแก้ว กลมเกลียว ฮักห่อ พี่ถ่อน . ผายโผดอ้าย ผู้โทนโท่อยู่เดียว . พี่นี่ หวังกอดเกี้ยว ผกายกอด กรกวม . ผิว่าสมความหมาย สิชื่นชมสมเยื้อน . พี่สิเพียรสมสร้าง สะพานทองเที่ยวไต่ . สองฝ่ายก้ำ ให้เป็นแป้นแผ่นเดียว . เจ้าผู้ศรีเสลียวสร้อย ยอยผมดำให้นำเลี่ยม เฮียมแม้ . พี่กะตั้งต่อน้อง หมายหมั่นชั่วชีวัง . พี่นี้ ขันอาสาตั้ง ถวายดอมเด็ดเดี่ยว . มักเพื่อสมสู่สร้าง สินสร้อยซ่อยปอง . พี่นี่ฮักฮูปน้อง นมนานสุดซั่ว จริงแหล้ว . หาสังปูนเปรียบด้าม เสมอเผี้ยงบ่มี พี่แหล่ว . ผัดแต่ลงโลกหล้า เอากำเนิดในมนุษย์ มานี้ . พี่บ่ทันเคยฮัก ผู้ได๋ปานน้อง . ผัดแต่ครองตนสร้าง พสุธาเมืองลุ่ม . บ่เคยฝักไฝ่ฝั่น กระสันดิ้นต่อไผ . เทื่อนี้ พบภาพน้อง ละเมอป่วงหลงใหล . ขอแก่สายใจอวน ฮ่ำคะนิงหวนฮู้ . เจ้าผู้ตู๋หลูต้น ทองไทยพิฑูรเทศ เฮียมเอย . อดเจ้าผายผ่อเยี่ยม กระแสสิ่งสอดสาร พี่ท่อน . พี่นี่ ฮักนาถน้อง หลงฮูปละเมอหา . ผิว์บ่สมเจตนา สิมิ่งมรณาเมี้ยน . อดให้สงสารถ่อน สายสมรเทียมเตร เฮียมเอ้ย . สงสารชายกำพร้า มาเว้าเหนี่ยววอน . พี่นี่ จรจวบน้อง มาพานพบจอมขวัญ . คือจั่ง กาดำพบ จวบนางลุนน้อย . อันว่า สมเสลาสร้อย นางลุนผัดฮักห่อ กาดำ นั่น . ยังได้เกาะกอดเกี้ยว ผสมฝั่นฮ่วมกัน . คึดเบิ่ง เงาะฮูปฮ้าย ใบ้บ้ากะทาชาย . ยังได้ชมแซมสอง รจนานางน้อย . ขอให้ สมเสลาสร้อย พิจารณ์ใจแจ้งแจบ ดูถ่อน . อย่าให้ ฮักพี่นั้น ฮามฮ้างเคิ่งทาง . โอน้อ.. ขอให้กก กอดเกี้ยว ก้านก่าย กร-กวัด . ยามเมื่อ สองเฮาพลัด พรากแฮมฮามซ้อน . พี่ขอวอนเถิงไท้ พระอินทราปองซ่อย แน่แหม๋ . ขอให้ ชักจ่องน่าว สองเฮาให้ฮ่วมกัน . พี่นี้หากตั้งต่อน้อง ตรงเที่ยงเป็นสัตย์ . ขอให้ สายแนนซัก ฮ่วมสองเสน่ห์ซ้อน . พี่จัก วอนเอาน้อง นางแพงเทียมภางค์ . ปฏิบัติแนบข้าง เตียงมุ้งม่านเดียว . เจ้าผู้ศรีเฉลียวสร้อย เสมอพรพรหมแต่ง พี่เอย . อ้ายมักใคร่ขอขอดหมั้น นำน้องชั่วชีวัง . พี่นี่ หวังสมสร้าง เสน่หาปองปลูก . ทุกข์คอบว่ามาบ่ได้ กลัวน้องบ่ปากนำ . พี่นี้ ฮักยิ่งล้ำ เสมอหินถมแผ่น . คันบ่สมเพชอ้าย อิดูหน้าหุ่นพลอย . ย้านแต่ เหลือแฮงห้าม หัวใจสิมามุ่นทะลาย แหล่ว . ขอให้ ใจน้องหล่า นางน้องซ่อยปอง แน่ถ่อน . โอน้อ..ให้ซ่อยปักซ่อยป้อง ดับโศกละลายทุกข์ พี่นี่ . อย่าได้ เมินตาเฉย บ่คะนิงหวนฮู้ . พี่ เทียมดังนาวาน้อย ลอยนทีกลางแก่ง . มีแต่ ฟองฟาดเบื้อง สิจมหมิ่งแค่วัง . ขอให้ นงนางน้อย หลิงดูยามยาก . ต้านตอบถ้อย ผอวนอ้ายผู้อยู่คอย แด่ถ้อน . พี่ กะหวังทราบข้อ ไขต่อกระแสสาร . ขอให้ ภิญโญญาณ สอดแสวงเถิงอ้าย . พี่หมาย มาเป็นข้า ทาสาแสนชาติ . ให้นาง ไขวาทเบื้อง ผญาฮู้ส่องญาณ แม่เด้อ . แยงไป ก้ำฝ่ายบ้าน ภูมิถิ่นดินสถิต . อดให้ ยอแยงคิด ใคร่กระแสสารอ้าย . อย่าให้ เสียสูญฮ้าง ฮามชมสารสวาท . พี่สิ คอยอ่านเอื้อม แยงสิ่งหล่ำสาร . เจ้าผู้ จันทร์เพ็ญแจ้ง ปุณณมีเพ็งภาคย์ . แม่นสิ ลำบากบ้าง อย่าลืมโต้ตอบสาร พี่เดอ
    โอกาสท้าย ถวายมอบความฮัก นางหากพอใจสอง อยู่ชมสมซ้อน ขอให้กูณาต้านแถลงสารตอบพี่คันบ่มีห่วงอ้ายให้บายถิ่มใส่กระโถน นั่นเน้อ


  2. #2
    Super Moderator สัญลักษณ์ของ ไก่น้อย
    วันที่สมัคร
    Aug 2006
    ที่อยู่
    นครโคราช
    กระทู้
    4,928
    บล็อก
    8

    Re: เขียนจดหมายฮอดผู่สาว

    มานั่งอ่านจดหมาย ยาวนำเพิ่น ตาลายคักๆๆ อิอิ อิ แนวจดหมายผญา ยาวอิหลี
    กระเบื้องจะฟูลอย น้ำเต้าน้อยจะถอยจม เมฆจะหล่นฟ้าปลาจะกินดาว ลาวจะครองเมือง ::)

  3. #3
    ศิลปิน นักแต่งผญา สัญลักษณ์ของ หญ้านาง
    วันที่สมัคร
    Jul 2009
    กระทู้
    619
    จดหมายนางสิส่งวาด เมืองอำนาจอิสานลุ่ม จุ่มพุ่มฮอดอ้ายเจ้า คือคำเว้าจอดผญา
    รวิเวลาเยื้อง จันทรังสินำส่ง อังคารคงฮอดอ้าย สามมื้อปรารถนา
    เดือนกุมพาสิพาเศร้า พ.ศ.เนาว์ปีเสือใหญ่ 53 มาย่างใกล้ นางค่อยได้เกี่ยวผญา
    ถึง.....เจ้าผุบาคานไท้ เทืองทองผิวเทศ เจ้าผุเกศแกมแก้ว สีนิลแล้วเหลื่อมคำ
    มาจาถามคำเว้า เรื่องควมเลาผญาส่ง อยากสิคง ถะแนบเนื้อ นวลน้องจ่องพระจันทร์
    นางกะใจมาฮนฮ้อน ย้อนคำวอนแกมถามไถ่ เลยไปไล่ฮอดเจ้า บาท้าวผุก่ำกา
    วาสนาโพธิสัตว์เจ้า จั่งได้เลาน้องเนื้ออุ่น ขาวจุ่นพุ่นแกมซาด นางลุนนาฎสายสมร
    เงาะป่าคอนกะต่าฮ้าง บุญสร้างของเนื้ออ่อน รจนาเลยได้ซ้อน ย้อนบุญต้อนแต่ก่อนหลัง
    นางมีกรรมมาบังไว้ เวรพอยวิบากพราก นางกะอยากได้คู่ซ้อน กรรมผัดต้อนไล่หนี
    อุปมาเผียบนางนี้ ไม้ด่อนคอนพะเพ็ง สังสิเล็งลงนาง กรรมผัดเผยพาล่อง
    ของนทีกะไหลท่วม ควมสิจากะเบิดบ่อน กรรมอ้ายมีคู่ซ้อน ยังส่งอ้อนอ่อยผญา
    เจ้าผุการะเวกแว่ว สุรเสียงสำเนียงอ่อน สังบ่เสพม่วนซ้อน นางฟ้าฟากสวรรค์...น้อ
    เจ้าผุคำซาวห้า วาจาอย่าตั๋วอ่อน ตั๋วให้งิ้วอ้อนต้อน ตายฮ้อนฮั่งมโน
    นางสิโสถิ่มแล้ว จ.ม.สิลงวาด ถ่าผามาทลื่นล้ำ คำเว้าบ่ม่วนหู
    อภัยดู้อิดูถ่อน ผายโผดขุณณาซ่อย อย่าให้จ่อยตายแล้ง เหี่ยวแห้งกาบโฮย.....สาถ่อนเด้อ

  4. #4
    แบ่งปันความรู้และประสบการณ์ สัญลักษณ์ของ บ่าวเมืองเดช
    วันที่สมัคร
    Sep 2007
    ที่อยู่
    เมืองเดช ครับพี่น้อง
    กระทู้
    98
    อ่านผญาซึ้งตรึงใจผู้ได้อ่าน อ่านผญาเศร้าเหงาใจผู้จอบฟังซั่นแล้ว พี่น้องเอย

  5. #5
    แบ่งปันความรู้และประสบการณ์ สัญลักษณ์ของ รอย บุญเรือง
    วันที่สมัคร
    Feb 2010
    กระทู้
    156
    แต่ละคนคักอีหลีครับ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •