ขอเชิญชวนหมู่เจ้ามาจาเว้าตอบผญา

[ศรีสะท้าน]

ผญามันกะมีทั้งกลอนหก กลอนแปด กลอนสิบนั้นหละหล้า อย่าไปคึดยากหลาย

[โป้ยก่าย]

อีกต่อไปทางหน้าศาสนาโหลดสิเสื่อม - สาแหล่ว
ย่อนซุมเห็นแก่ได้เป็นคนม้างศาสนา
เห็นแก่โตกะเลยก้อมคือกันกับหางฮวก
คือจั่งเซื้อไก่กุ้มหองก้อมแกงบ่เป็น - แท้แหล้ว

[ศรีสะท้าน]

ต่อแต่นี้ ฟ้าสิกลับต่าวปี้น ดินสิไหง่ไอฝน
ฝูงหมู่คนธารา สิปากจาบ่เห็นเบื้อง
คนสิเคืองหมองเศร่า เอาใจเป็นไทฝ่าย
สรรพะสนสิ่งฮ้าย สิยายม้างมอบเมือง
หนองสิกลายเป็นเขื่อง เคืองกระแสแวปั่น
อัศจรรย์เกิดก้ำ นทีกว้วงสิหล่วงไหล
คนปราชญ์ปากบ่ได้ ไขบอกบ่มีผล
สัปดนประดาสับ นับวันเวลาคล้อย
วิถีถอยซาตาต้อง ครรลองสิกลายพราก
ยากเด้นอ ยากนำเหลนหล่อนน้อย ผู้หลังคล้อยต่อมาฯ

[โป้ยก่าย]

พี่น้องเอ้ย
เพิ่นว่าความตายนี้เป็นเปิงทั้งโลก
หากแม่นเป็นแบบตั้งประจำด้าวเที่ยงจริง
อันนี้เป็นเปิงเค้ามีมาแต่เก่าก่อน
คันแม่นมาฮอดแล้วหนีได้กะบ่กราย
อันว่าความตายนี้เสมอกันโดยดั่ง
บ่ว่าข้อยและเจ้าเสมอด้ามดั่งกัน
อันว่าโลกีนี้บ่มีแนวตั้งเที่ยง
มีแต่แนวแตกม้างทลายล้มพ่ำกัน
สังขารความแตกม้างไกลกันเจียระจาก
คันบ่ม่มโอฆะกว้างสิเทียวพ้ออยู่เลิง

[spartan]

บุญบาปนี้เป็นคู่คือเงา เงานั้นไปตามเฮาซู่วันบ่มีเว้น คันเฮาพามันเล่นพามันเต้นแล่น พามันแอะแอ่นฟ้อนเงานั้นกะแอ่นนำ คั่นเฮานั่งย่องย้องเงากะนั่งลงตาม ยามเฮาเอาหลังนอนกะอ่อนลงนอนด้วย คั่นเฮาโตนลงห้วยภูเขาหลายหลั่น คั่นเฮาขึ้นต้นไม้ผาล้านด่านเขา เงาก็ติดตามเกี้ยวเกาะเกี่ยวพันธนัง บ่ได้มียามเหินห่างไกลกันได้ อันนี้ฉันใดแท้ทั้งสองบุญบาป มันหากติดตามก้นตามส้นผู้ำทำ(อันนี้กะจำเอานำเผิ่นมา)

[ศรีสะท้าน]

ยากเด้ ยากนำการงานหยุ่ง รุงรังพันธะมาก
ยากนำปากป่วนท้อง ผองเข่าเสพกิน
ยากนำดินผืนหญ่า หัวนาป่าหมากปืด
ยากนำพืชปลูกสร่าง ถางด้นก่นไถ
ยากนำไหมพวมท้อน หามอนเกือเฟือน้าวก่อง
ยากอีหยังกะบ่ท่อยากนำคึดฮอดน้อง นางน้อยผู้อ่อยความ นี้แหลว

[โป้ยก่าย]

โอ้ยท่านเอ้ยมาคือทรงสิยากหลายแท้น้อ

เพิ่นยังว่าเกิดเป็นคนต้องสู้บู๋ไปตามชาติ
แม่นสิลำบากฮ้ายให้ทนสู้ต่อไป - เด้อสหายเอ้ย
แม่นสิทุกข์ยากฮ้ายให้ได้อยู่นำกัน
กอยมันมีจั่งค่อยหามาเลี้ยง เอาหั่นเถาะ

[spartan]

ใจประสงค์สร้างกลางดงกะว่าทง ใจขี้ค้านกลางบ้านกะว่าดง