มื้อนี่ได้หยุดพักผ่อน1วันจ้า หลังจากทำงานยาวนานมาหลายมื้อ บ่เฮ็ดหยังหลาย พักผ่อน นอนเว็น
เฮ็ดกับข้าว,ขนม ทำความสะอาดบ้าน ซักผ้า ไปฟิตเนสช่วงแลง1ชั่วโมง เลี้ยงหมาเลี้ยงแมวไปตามประสาเนาะจ้า
ขนมที่เฮ็ดมื้อนี่ง่ายๆจ้า บ่ต้องใช้เตาอบ...นั่นคือ แพนเค้กแบบเดนิชเนาะจ้า สิแตกต่างจากสูตรทางอเมริกาเพิ่นแหน่จักหน่อย
เอาสูตรมาฝากตามเคยเนาะ
ไข่ไก่4ฟอง
แป้งเอนกประสงค์250กรัม
น้ำตาลทราย1ช้อนโต๊ะ
นมสดรสจืดครึ่งลิตร
เนยสดสำหรับทากระทะนิดหน่อยจ้า
เตรียมอ่างผสมมา ใส่น้ำตาล+ไข่ไก่ ปั่นให้ฟู แล้วใส่แป้งปั่นสลับกับใส่นม ปั่นไปเรื่อยๆจนเบิดแป้ง+นม
นำเข้าไปพักไว้ในตู้เย็น30นาที..
เคิ่งชั่วโมงผ่านไปกะเอาออกมากวนด้วยพายไม้ พายยางกะได้
กระทะตั้งไฟ ใส่เนยทากระทะนิดเดียวจ้า พอกระทะฮ้อนกะตักแป้งลงใส่ ทอดแบบกลับด้านจ้า
เฝ้าเบิ่งเอาสีเหลืองๆกะสุกแล้วจ้า ง่ายๆ
เวลาเสริ์ฟกะแล้วแต่ผู้ใด๋สิมีไอเดียร์ดีๆหละจ้า ตามใจ ติ๋มกะเอาของที่มีติดบ้านอยู่แล้วหละมาใส่
อย่างเช่น ไอติม,แยม,น้ำผึ้ง,น้ำตาลไอซิ่ง...เอาไปเฮ็ดแบบเครปเค้กงามๆกะได้จ้า
ขอให้สนุกกับการได้ทำในสิ่งที่ชอบทุกๆท่านจ้า...สำหรับติ๋มคั่นหยุดอยู่บ้านได้เฮ็ดในสิ่งที่มัก ทอนี่กะมีความสุขแล้วจ้า
การที่เฮาบ่อยู่ว่างๆกะซ่อยให้ลืมปัญหาไปได้แหน่ พอบ่เหงา บ่เศร้าใจจนเกินไปเนาะจ้า
ฮัก ห่วงคนอื่นมากๆแล้วกะอย่าลืมฮัก ห่วงโตเจ้าของให้มากๆคือกันเด้อจ้า...
อย่าไปหวังว่าคนที่เฮาฮัก...เขาสิมาฮักมาห่วงเฮาคือจังเฮาไปฮักเขา...คึดมากอีกแล้ว เซาเขียนดีกว่า....
Bookmarks