ติ๋มหละซวยคักปีนี่ ข่องขาเจ้าของล้ม(ตะคิวกิน)เจ็บขา ขาโหล่ยอีกแล้ว ไปเฮ็ดหยังนำบ้านเขากะบ่ได้...
กะเลยคลานทำความสะอาดตู้ใส่ของในครัว...ป้าดดดด มาหลายอย่างแท้ ขย๋อนว่ามานฮกดอกพี่น้อง
ไปซอกพ้อถุงแป้งข้าวเหนียว+แป้งข้าวจ้าว แล้วกะถั่วเหลือง อย่าละประมาณถ้วยหนึ่งหนี่หละ
เฮ็ดขนมบัวลอยน้ำขิงดีกว่า ไส้งาดำพร้อม หอมดี แล้วแป้งพวกนี่กะเบิดไป บ่ต้องไปซื้อมาฮกบ้านอีกเนาะ....
เฮ็ดแล้วหน้าตากะประมาณนี่หละจ้า...เป็นขนมบ่หวานจัด และมีประโยชน์ต่อร่างกายนำ
มาที่ส่วนผสม กะเอาเด้อจ้า ติ๋มบ่ชั่งบ่ตวงใด๋ แป้งมีทอใด๋ใช้เบิด...
แป้งข้าวเหนียวถ้วยใหญ่หั่นหละจ้า +แป้งข้าวจ้าวประมาณช้อนแกงหนึ่งหนี่หละ
น้ำเย็นสำหรับนวดแป้ง
ส่วนผสมไส้
ถั่วเหลืองแช่น้ำค้างคืน นำไปนึ่งให้สุก
งาขาว+งาดำล้างดีๆ เทใส่กระชอนให้สะเด็ดน้ำ นำไปคั่วให้หอมทีละอย่าง
น้ำผึ้งแท้นิดหน่อย
เนยสดประมาณ1ช้อนชา,น้ำตาลไอซิ่งประมาณ1ช้อนแกง
ส่วนที่เป็นน้ำขิง
ขิงแก่ล้างดีๆปอกเปลือกทุบพอแตก1แง่ง
น้ำตาลทรายบ่ฟอกสีประมาณ100กรัม+น้ำสำหรับต้ม
ขั้นตอนการทำ อันดับแรกต้มน้ำขิงก่อนเลยจ้า ใส่น้ำตาล ชิมเบิ่ง เติม/ลดได้ตามใจมัก
แล้วกะเฮ็ดไส้
โขลกงาขาว+งาดำ เก็บงาดำไว้นิดหน่อย เอาไว้นวดใส่แป้งบ่ต้องโขลกเบิด
พองาละเอียดใส่ถั่งเหลืองนึ่งสุกลงโขลกรวมกัน พอละเอียดแล้วกะเทใส่อ่างผสมนวดใส่น้ำผึ้ง+เนย+น้ำตาลไอซิ่ง
ปั้นเป็นก้อน น้อยใหญ่กะตามใจผู้กินหละจ้า
ที่นี่นวดแป้ง เทแป้งข้าวเหนียว+ข้าวจ้าวลงอ่างผสม..ใส่งาดำ นวดโดยการเทน้ำเย็นใส่ทีละนิด นวดไปเรื่อยๆจนแป้งนุ่ม
ปั้นเป็นก้อน นำแป้งที่ปั้นไว้แผ่ออก ใส่ไส้ ปั้นให้เป้นก้อน เฮ็ดจนหมดแป้ง และไส้ ห่อดีๆอย่าให้ไส้แตกเด้อ..อิอิ
นำหม้อมาใส่น้ำเปล่าต้มอีกใบ...พอเดือดใส่แป้งลงไปต้ม ใส่ทีละ5-6ลูกกะพอ...
ตักขึ้นแช่น้ำเย็น...ต้มไปจนเบิดแป้ง ทีนี่มากรองน้ำต้มขิง เอาขิงถิ่มไป ให้เหลือแต่น้ำต้มขิง
เวลาเสริ์ฟให้วางบัวลอยใส่ถ้วย แล้วกะตักน้ำขิงฮ้อนๆใส่...ตักเสริ์ฟผู้ละถ้วยจ้า...
Bookmarks