สวัสดีพี่น้องบ้านมหาซู๋คนจ้า
ตกเดือนนี้มา ท่านนายห้างฯ เพิ่นเริ่มออกหากิน
นั่นกะคือการหาใส่เบ็ดนั่นเองจ้า
เหยื่อเบ็ดนี้ ลองมาเบิดซู่อย่าง ตั้งแต่กุ้ง ปลาหมึก หอยแครง เขียดน้อย เข่ไก่เดือน
แต่ว่ากะมาสิ้นสุดที่อยู่ที่ เนื้อหมู นั่นเอง เพราะว่าปลาค่อมากินเหยื่องสามสี่เทื่อได้แล้ว
แล้วกะตามประสาชายโสด ได้ปลามาแล้วกะจักสิเฮ็ดจั่งได๋กิน
เพิ่นกะเลยหาแนวร่วม แล้วกะผู้เฮ็ดสู่กิน ซำพางมีแม่บ้านเป็นของจะของเองพานะ
กับเมนูแรก แกงปลาค่อใส่หน่อไม้ส้ม
มื้อต่อมา กะเมนูนี้เลยจ้า แกงใส่ผักอิฮุม(มะรุม) อภินันทนาการจากเชฟ
ไปต่อยมาเองกับมือ แต่บ่สามารถบอกแหล่งที่มาได้
ย้อนว่า ย้านมีคนไปลักต่อยนำ ฮ่าๆๆ
แล้วกะต้มปลาใส่ผักกะแยง ซดน้ำฮ้อนๆ มีแฮงท้องเป็นตาหน่ายจ้า
ผักกะแยงนี้บ่ได้เกิดนำแจคันแทนาคือบ้านเฮา
แต่ว่าเกิดอยู่นำโลตัสจ้า อิอิ
...................................................................
แล้วสำหรับเมนูสุดท้าย ให้เบิ่งโตปลาจ้าพี่น้องว่าใหญ่ปานได๋
เปรียบเทียบกับมือแม่ครัว ปลาโตนี้ลงทุนซื้อเนื้อหมูไปเป็นเหยื่อล่อ 40 บาทขาดโต
ย้อนว่า มีปลาโตน้อยๆ เพิ่นตอดไปนำ อิอิ
หลังจากที่ท่านนายห้างฯ ให้ความอนุเคราะห์ จัดการกับปลาให้แล้ว
บาดทีนี้แม่ครัวกะจิเริ่มชำแหระจ้า ขออภัยถ้าภาพออกมาโหดร้ายเกินไป
เด็กอายุต่ำว่า 12 ปี ผู้ปกครองควรให้คำชี้แนะ
ผักต่างๆ บ่ว่าสิเป็น ผักชีลาว ต้นหอม ผักกะแยง ผักอิตู่ เตรียมพร้อมที่สิอ่อม
ตามคำสั่งของท่านนายห้างฯ ผู้เพิ่นหากินหมาน อิอิ
มีปลาเข็งกำพร้าติดมานำโตหนึ่ง กะเลยต้มป่นตื่มกันไป พอได้จ้ำ
ย้อนว่าท่านนายห้างฯ ได้เก็บบักเขือขื่นจากหลังที่ทำการประปามานำ
ด้วยความที่ย้านบ่คู่กันจ้ำ กะเลยลงมติว่า ให้เอาตรงท้องปลาที่มีไข่ติดนั้น
ตำตื่มกันไปนำ ย้อนว่ามีผู้ลังคนเพิ่นจ้ำป่นบ่เป็น มีแต่คุ้ย ฮ่าๆ
ผักพร้อม ป่นพร้อม และพาข้าวกะพร้อม
และเพื่อนร่วมทีมกะพร้อม เซิญแซบซะหล่าล่ะ
ตบท้ายกับข้าวปาดหวานนิดๆ หอมใบเตยจากน้องซายหล่าสมุยบอย
ขอบคุณพี่น้องทุกท่านที่แวะเวียนมายังกระทู้
ขอบคุณพื้นที่จากเว็บบ้านมหาดอทคอม
สวัสดีจ้า
Bookmarks