เนื่องจากในช่วงวันหยุดที่เซียงเหมี่ยงฯ กลับบ้านช่วงพักหลังจากทำงานครบหนึ่งเดือน กะต้องพาเซียงเหมี่ยงน้อยไปยามปู่กับย่าเป็นประจำทุกครั้ง ครั้งนี้เช่นเดียวกัน ออมสิน เซียงเหมี่ยงน้อยครบขวบแล้ว กะไปยามย่า กับปู่เช่นเคย พอมาฮอด เซียงเหมี่ยงน้อยหมอบออเซาะขอพรปู่สาก่อน...
แต่ว่าเที่ยวนี้ ย่าให้ เซียงเหมี่ยงฯ พาไปหมู่บ้านซ้าง บ้านตากลาง เพื่อเบิ่งหลานจัดบายสี สู่ขวัญผู้ว่า ที่มาร่วมงานประเพณี พิธีแห่นาคซ้าง ซึ่งจัดมีประจำทุกปี ปีนี้ 26-28 ครับ เซียงเหมี่ยงฯ เลยได้ทีพา ออมสินไปเบิ่งการแสดงของซ้างไปพร้อมกัน และ เซียงเหมี่ยงเอง กะบ่เคยไปเบิ่งการแสดงของซ้างเลย ทั้ง ๆ ที่อยู่ห่างจากศูนย์คชศึกษา บ่ไกลเลย บ่ถึง 20 โล ด้วยซ้ำไป ตกลงเป็นอันว่า เซียงเหมี่ยงฯ แม่ออมสิน ออมสิน ย่า ป้า ไปนำกัน ออมสินอยากไปแฮง ลุกขึ้นยืนกวักมือเอิ้น ย่า มา ๆ ย่ามาไว ๆ ออมสินอยากเบิ่งซ้าง...
ย่าบอกว่า ไป ๆ ลูกหล่า ให้ย่าอาบน้ำแต่งโต สาก่อนเด้อ ...
เพื่อบ่เป็นการเสียเวลา ออมสิน กะเลยเล่นบทซ้างน้อยกับน้องไก่ไปพลาง ๆ ก่อนครับ หม่นออกลอกเลย ฮ่า ๆ ...
ชูงวงชูงาไปตามประสา เผิ่นบ่ค่อยได้เล่นดินทรายของมักเผิ่น ฮ่า ๆ ...
พอย่าแต่งโตแล้ว บวกกับ ออมสินอาบน้ำกะเดินทางใช้เวลาจากบ้านเซียงเหมี่ยงไปฮอด หมู่บ้านซ้าง บ่เกิน 20 นาที ป้ายบ่งบอกว่าได้มาถึงแล้ว (ภาพนี้ถ่ายตอนกลับที่ฝนเริ่มตก)
เข้ามากะมีโรงซ้าง และ พี่ซ้างยืน เอาหู โบกสะบัดคล้าย ๆ กับรอต้อนรับแขกที่มาเยี่ยมเยือน
และกิจกรรมที่น้อง ๆ หลายคนสนุกสนานกันคือ ขี่ซ้าง ชมรอบ ๆ ศูนย์ คิดรอบละ 20 สำหรับน้อง ๆ ...
พอมาถึงหน้าเดิ่นที่เปิดการแสดงได้ความว่าการแสดงรอบแรกในรอบเซ่า เริ่มไปแล้วเคิ่งหนึ่ง กะเลยฟ่าวซื้อตั๋วเข้าไป ราคา 20 บาท จากตั๋วเต็มราคาที่ 50 บาท เข้าไปกะพบกับการแสดง ซ้างหย่างข้าม อาสาสมัคร เชือกแรกบ่แม่นอื่นไกล น้องน้ำเพชร ช้างน้อยที่เกิดหน้าบ้านเซียงเหมี่ยงฯ เอง อายุสองขวบ ใหญ่หลายเติบหลังจากเจอกันตอนปีที่แล้ว การหย่างข้าม น้องน้ำเพชรกะเล่นกับ อาสาหนุ่ม ๆ โดยเอามือเขี่ย ๆ หว่างขา สร้างความครึกครื้นปนเสียวกับท่านผู้ชมและ อาสา ที่ลงไปนอนกลางเดิ่น ได้เป็นอย่างดี...
Bookmarks