เที่ยวเขื่อนน้ำงึม เมืองลาวจ้า

[สาวเมืองกะสิน]

มื่อนี้สิชวนพี่น้องบ้านมหาข้ามไปยามพี่น้องทางเมืองลาวจ้า พอดีมีพี่น้องอยู่ทางฝั่งพู้น ปกติกะไปมาหาสู่กันเป็นประจำอยู่จ้า เพราะว่าอา(น่องสาวพ่อ)เลาไปมีครอบครัวอยู่ทางพู้น แต่ว่าครั้งนี้พิเศษเพราะว่าสิพาไปชมเขื่อนเก็บน้ำที่ใหญ่ทีสุดของเมืองลาวจ้า ชื่อว่า "เขื่อนน้ำงึม" เป็นเขื่อนที่ผลิตกระแสไฟฟ้าให้พี่น้องเฮาทางอิสานเหนือได้ใช้ไฟฟ้านำจ้า อาว(น้องเขยอีพ่อ)เลาเป็นหัวหน้านายช่างอยู่นั่นจ้า กะเลยได้มีโอกาสได้ไปเที่ยวชมเขื่อนกัน

ก่อนอื่นอธิบายการเดินทางก่อนเด้อจ้า เดินทางไปเที่ยวเมืองลาวทุกมื่อนี่สะดวกสบายหลายจ้า ไปทางรถทัวร์กะได่ มีรถทัวร์ออกจากขอนแก่น เที่ยว 8.30 โมง ไปฮอดเวียงจันทน์ประมาณ 11.30โมงจ้า จากนั้นก็ต่อรถไปที่เขื่อนได้เลยจ้า แต่กะต้องทำพาสปอร์ตก่อนเด้อจ้า ถ้าไปหลายมื่อ แต่ว่าไปลาวครั้งนี้ เลือกขับรถไปเองจ้า อ้ายเป็นคนขับ เอารถไปจอดฝากไว้ที่หนองคาย จ่ายค่าที่จอดวันละ 90 บาท(หม่องรับจอดรถสะดวกปลอดภัยดี) จากนั้นก็นั่งรถข้ามไปจ้า พอไปถึงอากะมารับ แล้วกะเดินทางไปเขื่อนกันเลย ถนนหนทางก็สะดวกสบายจ้า มาๆๆเบิ่งกันเลย


ข้ามไปฝั่งลาวทางหนองคาย ก็จะได้เห็นศูนย์การค้าปลอดภาษีจ้า มีสินค้าให้ช้อปหลายอย่างจ้า เช่น กระเป๋า รองเท้า สวยๆทั้งนั้น แต่ว่าครั้งนี้บ่ได่แวะจ้า กะเลยได่แต่ภาพภายนอกมาฝากจ้า






ไปถึงเวียงจันทน์ตอนเช้า นั่งรถผ่านฮ้านข้าวจี่ลาว (ขนมปังฝรั่งเศส เอามาย่างไฟอ่อนๆ ให้ขนมปังหอมๆ แล้วผ่ากลางใส่มะเขือเทศ ซอส แตงกวา ผักกาดหอม หมูยอ) กินกับกาแฟลาว (คล้ายโอเลี้ยงบ้านเฮา) ตอนเช้าๆ โอ๊ยแซ่บหลายจ้า ไปเมืองลาวจะเห็นฮ้านอาหารเช้าแบบนี้จ้า



วิวก่อนถึงเขื่อนน้ำงึมจ้า



ฮอดแล้วสันเขื่อน จอดรถไว้ ย่างขึ้นไปชมวิวจ้า มาๆตามมา[IMG][/IMG]



[IMG][/IMG]




ตัวเขื่อน




เลาะเขื่อนเมือยแล้ว กะสิพาแวะบ้านกินข้าว กินปลา เด้อจ้า ปลาอยู่เขื่อนน้ำงึม ขึ้นชื่อว่า รสชาดแซ่บหลาย ไผ๋ไปเที่ยวอย่าลืมสั่งมากินเด้อจ้า



พาข้าววงใหญ่ รวมญาติลูกๆหลานทางเมืองลาว มาเด้อกินข้าวนำกัน แซ่บขนาดได๋กะเบิ่งอีพ่อเลาโลด(เสื้อกล้ามสีขาว) กินอิ่มยิ้มออกจ้า





อยากไปกินปลาแซ่บๆ บรรยากาศดีๆ อากาศเย็นสบายๆ สูดอากาศบริสุทธิ์เต็มๆปอด เขื่อนน้ำงึมเมืองลาวยินดีต้อนรับจ้า
พักผ่อนจักหน่อยก่อน เดี๋ยวสิเอาบรรยากาศ งานสงกรานต์ในเขื่อน เน้นในเขือนเด้อจ้ามาให้เบิ่ง โปรดติด่ตามตอนต่อไปจ้า

[ไก่น้อย]

ตามมาเที่ยวเขื่อนนำงึมนำสาวกะสิน บ้านเพิ่นเป็นตาฝนดีเนาะจ้า

[สาวเมืองกะสิน]

ฟ้าฝนทางบ้านเพิ่นกะตกดีอยู่จ้าเอื้อยไก่น้อยไปช่วงสงกรานต์กะพ้อฝนจ้า
ยิ่งขึ้นไปทางเขื่อนยิ่งอากาศดีหลาย และถ้าไผ๋อยากไปกินอาหารป่า ก็ต้องสั่งไว้ล่วงหน้า จังสิบ่ผิดหวังจ้า
ถ้าว่างกะไปเที่ยวเด้อจ้า

[ไผ่หวาน]

พึ่งฮู้ว่ามีรถจากขอนแก่นไปฮอดเวียงจันทน์ ขอบใจจ้าที่ให้ข้อมูล
สิได้ไปเฮ็ดพาสปอร์ตไว้ถ่าข้ามไปเที่ยวลาวกะน้า

[บุรุษไร้ใจ]

c06: ครับ..เป็นจังได๋แนในการเดินทาง

เข่าไปประเทศเขา...มันสิกลับออกมาได้บ่อ..

[บักขามป้อม]

ขอบคุณจ้าพี่สาวเมืองกะสิน ที่เอาฮูปงามๆ มาฝาก บ่ทันเคยไปลาวจักเทื่อคือกันจ้า ขนาดบ่อยู่ไกลปานได๋กะดาย บ้านหลังหลังสีโอโรสนั้นเป็นบ้านญาติพี่สาวบ่จ้า บริเวณบ้านร่มรื่นเป็นตาอยู่ดีเนาะจ้า บรรยากาศกะเป็นตาอบอุ่นหลายจ้าในวงพาข้าวแมะ

[สาวมุก]

เป็นตาอยากไปเที่ยวแท้จ้าสาวกะสิน สาวมุกดาหารอยู่ใกล้ปานนี่กะยังบ่มีโอกาสได้ไปเลย ย่อนว่าคาตะยากเวียก เคยไปแต่หลวงพระบาง แต่ว่านานแล้วล่ะจ้า เดี๋ยวเที่ยวหน้าสิไปอยู่จ้า ว่าสิไปทางสะพานมิตรภาพแห่งที่2 ที่มุกดาหาร บ้านเจ้าของนิแหล่ะ ไผสิไปนำ..ยกมือขึ้นเด้อจ้า..กลางคืนกะนอนเฮือนสาวมุก ค่าที่พักบ่ต้องเสีย ส่วนเรื่องของกินกะไปหาซื้อเอาแถวตลาดก่อนกลับ หรือว่าสิให้แม่สาวมุก หากบหาเขียดไว้รอถ่า กะได้เด้อจ้า..

[ฅนภูค่าว]

เห็นฮูปภาพแล้ว กะเป็นตาข่ามฝั่งไปเที่ยวนำอยู่ตั๊วะละเนาะ ไคอยู่ดอกพู่เพิ้นมีพี่น้องอยู่ฝั่งพุ้น กะสิไปงายมางาย เห็นโตเขื่อนแล้ว จังได๋กะใหญ่ก่อเขื่อนลำปาวบ้านเฮาคักคัก มันกะแม่นหละเบ้ย(โคกก่อง)

[หนุ่มเหงาคนไกลบ้าน]

บ้านพี่เมืองน้องน้อครับบ่อไกลกันหม่องเที่ยวกะหลายบรรยากาศดีกินข้าวฮ่วมพาร่วมญาติเห็นเเล้วอบอุ่นดีครับ

[บ่าวน้อยยโส]

มักธรรมชาติเมืองลาวที่ยังคงอยู่ย่อนว่าความเจริญทางวัตถุยังหน่อย บรรยากาศดีหลายๆ