กราบสวัสดีพี่น้องบ้านมหาซู่คนจ้า เหตุที่ตั้งกระทู้นี้ขึ้นมากะย้อนว่า ช่วงต้นเดือนก่อนขามป้อมได้เมือบ้าน แล้วกะได้เห็นเฒ่าพ่อเพิ่นนั่งสาน "กะป่อม" อยู่ ซึ่งกะเป็นภาพที่ชินตา มาตะน้อยเท่าใหญ่แล้วล่ะจ้า ว่าเฒ่าพ่อเลาสะบ่ค่อยอยู่ซื่อๆ ยามว่างจากเฮ็ดไฮ่เฮ็ดนา เพิ่นกะสะสานแห สานสะหวิงแหน่ สานข่องสานกะป่อมไปจั่งซี้ล่ะจ้า
แต่พอมาถึงมื้อนี้ ขามป้อมกะย้านภาพนั้นมันเลือนหายไปจากความทรงจำ แล้วกะอยากอนุรักษ์สิ่งดีๆ แบบนี้ไว้ กะเลยได้ถ่ายรูปเอามาฝากพี่น้องบ้านมหาเฮานี่ล่ะจ้า แต่ว่าแต่ละท้องถิ่นกะอาจสะเอิ้นบ่คือกันเนาะจ้า บางบ้านกะอาจเอิ้น "ข้องลอย"
กะป่อมนี้ เฮ็ดมาจากไม้ไผ่จ้า บ่แม่นเครื่องมือหาปลา แต่เป็นแนวใส่ปลาหรือสัตว์น้ำทุกชนิดที่หาได้ การใช้งานคล้ายๆข้องจ้า แต่ทางบ้านขามป้อมมักสะใส่ทุ่นลอยน้ำนำ สะได้เอาลงไปน้ำนำได้จ้า เพราะว่าอยู่บ้าน น้ำแก่งท่วมทุกปี
ขามป้อมกะเลยอยากฮู้ว่า พี่น้องในบ้านมหาเฮานี่ พากันเอิ้นว่าจั่งได๋แหน่จ้า
อันนี้เบื้องหลังเฒ่าพ่อจ้า :l- แอบถ่ายย้านเลาอยากอาย ทีแรกบ่ทันคึดพ้อจ้าว่าต้องถ่ายรูปมาลงกระทู้ กะเลยบ่ทันตอนเฒ่าพ่อเลาขึ้นลายทีแรก ยังคึดเจ็บใจตะของอยู่ ว่าน่าสะถ่ายรูปตะตอนเลาเริ่มจักตอก 555555555
:l- เริ่มเป็นรูปเป็นร่างแล้วจ้า ตอนนี้นายแบบเริ่มรู้โตล่ะ เพราะว่าลูกสาวเพิ่นลักถ่ายรูปอยู่ไกลๆ บ่ถนัด 555
เสร็จไปแล้วจ้า เอาไปตากแดดก่อนจ้า เพราะว่าตอนเก็บรายละเอียดหม่องปากมัน เฒ่าพ่อเลาอมน้ำพ่นไปนำ 5555555555 เลาว่าเฮ็ดให้ตอกอ่อนๆ ค่อยดัดง่ายจ้า ทีนี้กะเสริมความแข็งแรงให้ก้นกะป่อมก่อนจ้า
มาฮอดขั้นตอนใส่ตาข่ายให้ปากของกะป่อมแล้วจ้า
เสร็จสมบูรณ์แล้วจ้า เตรียมพร้อมสะลงห้วยลงหนองได้ล่ะ :l-
Bookmarks