ใบไม้ฯนอนเล่นอยู่อู่แปลใต้ต้นบักม่วงเขียวเสวยข้างบ้านเอื้อย ตากะแหนมเห็นบักม่วงหลายๆ ตาแซบคัก ดกกะดกจ้า กะเลยต่อยลงมากินจักสามสี่หน่วยกับหลานผู้ไปขวยกุ๊ดขี่นั่นแหละจ้า
กินบักม่วงอิ่มแล้ว ตาก็ยังดีแนมไปเห็นฮังไข่มดแดง ก็เลยอยากกินอีกล่ะทีนี้
โชคดีหลาย พี่อ้ายเราย่างมาพอดี เลยบอกว่าเพิ่นเลี้ยงมดแดงไว้เทิ่งต้นบักม่วงสองสามต้นนี่ เดี๋ยวสิแหย่ไข่ให้เบิ่งเพิ่นว่า ว่าแล้วพี่อ้ายเลากะหากระต่ากับไม้ส่าวมามัดใส่กัน เอาน้ำใส่คุถังมาตั้งไว้ข้างๆ ผู้น้องบัดนั่งเบิ่งและถ่ายรูป บ่คิดสิใกล้เลย ย่อนย่านมดแดง อิอิ
หย่าวๆเลย พี่อ้าย จัดการเลย แหย่เลย เอาปลายไม้ส่าวซุตรงฮังมดแดง กะให้ไข่ตกใส่กระต่าพอดี
มาแล้วจ้าผลงาน พอได้อยู่ตั๊วล่ะจ้า
เคาะกะต่าลงพื้นจั๊กหน่อย พอให้มดแดงออกจากฮังจ้า เดี๋ยวมดแดงกัดล่ะเจ็บแสบแท้ๆจ้า
เคาะแล้วก็เอาเทลงคุถังที่ใส่น้ำไว้แล้วจ้า
เคาะแม่มดแดงออกแล้ว ทีนี้ก็แหย่ใหม่อีกจ้า
มื่อนั้นแหย่แค่สามฮังกะพอกินแล้วจ้า ได้สองถ้วยบักใหญ่พู้นแล้วจ้า แย่แล้วก็เอาเศษผ้ามาแกว่งๆหมุนๆในคุถัง ให้แม่มดแดงติดออกมานำเศษผ้า แล้วพี่อ้ายกะเอามดแดงไปไว้เทิ่งต้นบักม่วงคือเก่า นี่บ๊อมดแดงเลี้ยง อิอิ
นี่ค่ะคือผลงาน ได้ซำนี่สองถ้วยจ้า เอื้อยเลาเอาไปให้แม่ย่าเลาถ้วยหนึ่ง อยู่บ้านใหญ่ถ้วยหนึ่ง
สรุปว่ามื่อนั้น มีแนวกินแลง เป็นก้อยไข่มดแดง ไข่เป็ดเจียวใส่ไข่มดแดง ต้มปลานิลใส่สายบัวใส่แม่มดแดง ใบไม้บ่ค่อยได้ถ่ายรูปอาหารปานใดจ้า คาแต่กิน อิอิ
มาเด้อจ้า เชิญแซบจ้า
อ้างข้อความนี้
Bookmarks