ระบบรักษาความปลอดภัยร้านสะดวกซื้อ

**บ่าวจอบบ้อน** · 07-07-2010, 00:38

บ่าวจอบบ้อนได่เบิ่งร้านสะดวกซื้อถืกปล้นหลายจนบางครั้งคิดว่า เจ้าของร้าน+เจ้าหน้าที่บ่มีมาตรการหรือระบบรักษาความปลอดภัยที่สิเฮ็ดให่พวกโจรย่านแนบ้อ สงสารพนักงานที่ต้องมาเฮ็ดงานด้วยความเสี่ยง พอเบิ่งข่าวและกะลองคิดหาวิธีกะเลยมามีคำถามในใจว่าเป็นหยังคือบ่จ้างพนักงานรักษาความปลอดภัย(หรือตัวย่อว่า รปภ.บ่แม่นรองปลัดอำเภอเด้อพี่น้อง...อิอิอิ)บ่าวจอบบ้อนกะเคยเห็นคือกันบางที่บางแห่งแต่เดี๋ยวนี้กะบ่มีแล่วสงสัยทางร้านสิเป็นการเพิ่มภาระทางการเงินมากเกินไปบ้อ กะเลยมาคิดไอเดียร์ได่คิดว่าความคิดนี่อาจสิเป็นประโยชน์บ่หน่อยกะหลาย บ่ต้องลำบากเจ้าหน้าที่ตำรวจคอยมาตรวจตา นั่นกะคือบริเวณหน้าร้านเซเว่นมีเครื่องออกกำลังกายเพื่อให้ลูกค้าได่มาออกกำลังกาย แต่นั่นคงบ่เป็นจุดสนใจปานได๋ บ่าวจอบบ้อนคิดต้องบ่ทำมะดาแน่นอน สมองระดับปลาร้าบองมันต้องเด็ด บ่าวจอบบ้อนมาแนมเบิ่งร้านสะดวกซื้อ24ชั่วโมงคงต้องใช้ไฟฟ้าหลายแนนอน ดังนั้นรูปแบบนี้จึงเกิดขึ้นนั่นกะคือ จักรยานปั่นไฟออกกำลังกาย แต่ขั่นสิให่ลูกค้ามาปั่นไฟออกกำลังกายมันกะยังทำมะดาไปครับพี่น้อง ขออภัยที่พิมพ์คำว่าทำมะดาบ่ได่พิมพ์ว่าธรรมดา ย้อนว่าจบประถมนั่นหล่ะ เอิ๊กๆๆๆหยอกเล่นเด้อ จบประถมอีหลีนั่นหล่ะ ตอนนี่ระบบคิดเงิน “สมาร์ทเพิร์ส” มีทุกที่ของร้านสะดวกซื้อ ขั่นตอนง่ายๆนั่นกะคือมีเครื่องสะสมแต้มติดกับจักรยานปั่นไฟออกกำลังกาย เมื่อลูกค้าสิทำการสะสมแต้มพิเศษกะเสียบบัตร“สมาร์ทเพิร์ส”เข้าไปแล้วกะปั่นจักรยานออกกำลังกาย เมื่อไฟได้ตามที่ร้านสะดวกซื้อตั้งใว่ ยอดสะสมแต้มกะสิเพิ่มเข้าไปในบัตร“สมาร์ทเพิร์ส”ร้านสะดวกซื้อกะสิได่ไฟฟ้าเก็บใว่ใช้ในร้าน ลูกค้าได่ออกกำลังกายได่สะสมแต้มเพื่อแลกซื้อสินค้า ร้านสะดวกซื้อกะได่ไฟฟ้าลดต้นทุนค่าไฟ ได่คนเฝ้าร้านโดยบ่ต้องจ้างพนักงานรักษาความปลอดภัย แถมลดโลกร้อนได่อีกต่างหาก โปรเจคบ้าๆของบ่าวจอบบ้อน ร้านสะดวกซื้อได่อ่านเขาสิว่าจั่งได๋น้อ อิอิอิ