กำลังแสดงผล 1 ถึง 3 จากทั้งหมด 3

หัวข้อ: ข้าวรอฝน...คนรอเธอ

  1. #1

    ข้าวรอฝน...คนรอเธอ

    มองพระพายพัดใบพร้าว ตาวตาดตาลเตย
    สบัดเบยเบิกใบ โน้มกิ่งไกวกวยก้าน
    สายลมพานพัดไผ่พริ้ว หลูบเป็นทิวลิ่วละล่อง
    น้าวกกก่องก้านก้ม สายลมล่อก่อกระแส
    สอดตาแลเหลือบดูฟ้า กลางเวหาไร้เมฆหม่น
    ข้าวขาดฝนคนขาดเจ้า คนใจเศร้า ข้าวระทวย
    ฝนบ่ฮวยฮำรินให้ กอก้านใบกะเริ่มเหี่ยว
    ข้าวเคยเขียวกะเริ่มแห้ง เพราะฝนแล้งแฮ่งระทม
    มีตะลมเพยพัดจ้าว ก้อนเมฆขาวละลิ่วแล่น
    เอิดเติดแปนจ่างป่างฟ้า ก้อนขี้ฝ่ากะบ่มี
    เปรียบดั่งคนอยู่ทางพี้ คิดฮอดคนดีบ่มีหว่าง
    คิดฮอดนางบ่มีเว้น คิดเห็นหน้าอยู่เซา
    มีแต่เหงาเข้ามาหุ้ม สุมอยู่ในดวงจิต
    นั่งคิดฮอดอยู่ผุเดียว ตากะเหลียวแลแต่ฟ้า
    ใจคนถ่าสิตายแล้ง ใกล้เหมิดแฮงสิสู่ต่อ
    ได้แต่รอกับรอ คิดอยากพ้อหน้าเจ้า คือดั่งข้าวเฝ้ารอฝน..แท้นอ..



    ห่างหายไปหลายมื้อ ยังบ่ทันได้ฟิวส์ปานได๋ คันบ่ม่วนกะขออภัยหลายๆเด้อ ขอรับ..5555


  2. #2
    ถ่าสาก่อนเถาะเด้ออ้าย
    ฝากใจหมายให้ถ่าแหน่
    ขั้น..คึดฮอดน้องแท้ๆ
    ให้เบิ่งแย่แหย่กะปู
    อดสาอยู่ให้สุขหมั้น
    อีกบ่นานสิกลับต่าว
    ข้าวออกฮวงเหลืองอ้อยซ้อย
    สิคืนค้อยถิ่นอีสาน...........
    ดอกเด้อจ้า นางมาร่วมแจมนำเด้อ อิอิ

  3. #3
    เจ้าหน้าที่ประชาสัมพันธ์ สัญลักษณ์ของ วัฒนชัย หาริโร
    วันที่สมัคร
    Jan 2010
    กระทู้
    884
    ย้านข้าวเหลืองยังบ่โค้ง
    โงต่าวถิ่นอิสาน
    สุขสำราญอยุ่เมืองไกล
    ย้านบ่ไลมาบ้าน
    จากกันนานหลายปีแล้ว
    ย้านลืมทางโค้งต่าว
    ยามสายลมพัดพร้าว
    สิคึดฮอดแหน่บ่น้อ......น้องสาวเอย

    บ่ได้มาหลายมื้อบ่ลื่นหุกะอดฟังเอาเด้อครับมาเป็นกำลังใจให้อ้ายครับ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •