กำลังแสดงผล 1 ถึง 6 จากทั้งหมด 6

หัวข้อ: อัฐมาส..วัสสกาล

  1. #1

    อัฏฐมาส..วัสสกาล

    ตกวสันตกาลเข้า เนาว์พรรษาอัฏฐมาส
    พิรุณหยาดหยอดย้อย ไหลลงค้อยคุ่มสถาน
    อวสานกาลแล้ง เปลี่ยนแปลงเป็นจื้นซุ่ม
    ซุมหมู่มวลแมกไม้ ผลิใบก้านป่งแหนง
    ผักขะแยงเขียวอั้ว ผักสายบัวเริ่มแตกหน่อ
    ทั้งผักขอผักพาย ผักบุ้งสายอยู่แคมน้ำ
    นกไก่ดำลอยละล่อง ริมหนองคองกินเหยื่อ
    ปลาซิวเฟือเลาะฝั่งส่าง เข็งขี้ก้างเลียบฝั่งคู
    ลูกคอกหมู่ผุดผาดผ่าย ดำว่ายในนาท่ง
    คิดอยากลงเอาแหง่งส่อน เมือต้อนผู้อยู่เฮือน
    วันปีเดือนเคลื่อนย้าย ฮ้อนหายฝนวนมาใหม่
    ฤดูกาลเปลี่ยนไป ฮอดยามไถหยายข้าว ชาวนาจ้าวเร่งระงม...
    แก้ไขครั้งสุดท้ายโดย พลายแก้ว; 28-07-2010 at 08:43.


  2. #2
    Maximum learning
    ศิลปิน นักเขียน
    สัญลักษณ์ของ khonsurin
    วันที่สมัคร
    Apr 2008
    ที่อยู่
    ท่าตูม สุรินทร์
    กระทู้
    9,605
    บล็อก
    197
    พิรุณหยาดหยดย้อย ต้นไม้แผ่ก้านคึก
    เข้าพรรษาอัฏฐมาส ขอบูชาพระบาทเจ้า
    ด้วยบรมีพุทธองค์ ผู้ดำรงคุณธรรม
    ได้เล็งเห็นการเหยียบย่ำ ต้นไม้บ่งอบเงย
    กะเลยให้พระได้จำพรรษา บ่ต้องไปเยียบต้นไม้อื่น
    ทำให้แผ่นดินซะอุ่ม ด้วยพฤกษานานา
    ท้องนามีแต่ใบข้าว ท้องทุ่งมีแต่เรียวรวง
    ผักน้ำบานไสวในคันนา ผึ้งแมลงฮ้องลั่นสนั่นเมือง
    ฟูเฟื่องด้วยสีเขียวดาดตา พาให้ชุ่มเย็นตามฤดูกาล
    ซ่างเย็นอกใจไสววาด ดารดาษด้วยต้นไม้เขียวขจี


    อนุรักษ์ทรัพยากรของชาติด้วยการรักษาป่า....

  3. #3
    เมื่อฝนพรำฮำโปรยพร่าง ละอองบางละลิ่วล่อง
    ยามลมต้องตะหลบปิ้น กลิ่นดินหญ้ากล่อมละมุน
    พระพิรุณลงฮำโห่ง ท่งนาทามน้ำไหลผ่าน
    เป็นกสิกรรมสัญญาณ ว่าฮอดกาลทำนาแล้ว
    ข้าวปลูกแนวมาเตรียมไว้ นาท่งใหญ่หม่องเคยดำ
    น้ำกะมีพอสมควร ให้รีบด่วนอย่ารอช้า
    เตรียมไถนาหว่านยายข้าว ฟ้าวฝั่งแน่เด้อสู
    ก่นกะปูแถวหัวนา เอามาป่นนำเด้อท้าว
    เสียงแม่เฮาเอิ้นสั่งไว้ ว่าฟ้าวไปให้ทันเพิ่น
    อย่ามัวเพลินเดินดุ่งฟ้าว กะเลยจ้าวฟ้าวไล่ควาย
    ตะเว็นสวยแม่สิตามไปดอกหล่า สิจัดหาข้าวปลาก่อน
    ปิ้งปลาหลดกำลังฮ้อน เอาไปต้อนอยู่ท่งนา
    เจ้าอย่ามัวรอช้า ให้ฟ้าวฟั่งเร็วไว
    ให้ฟ้าวไถฟ้าวดำ บ่ายคล้อยค่ำขึ้นหลกกล้า
    ฮอดยามนาให้รีบเร่ง ให้เจ้าเหล่งให้ทันเขา
    ข้าวขึ้นเล้าคันได้หลาย แม่สิไปขอสาวให้เด้อหล่า....พะนะ..

  4. #4
    วัสสากาลมาพร่ำพร้อม
    วิรุณฝนฮนนิบาต
    อัฏฐ มาสมาฮอดแล้ว
    พิรุณแก้วหว่านกระแส
    หนองคันแทน้ำกะโห่ง
    ท่งกุลาฟ้ากะหม่น
    ดอนมดแดงน้ำกะล้น
    ฝนไหลจ้นใส่หนองหาน
    วัสสากาลเวียนมาได้
    ชีวิตใหม่กะคืนหวล
    อวลมาเทิงสายฝน
    ปนสายสุแนนน้อง
    เข็มทองผุแขนส่วย
    งัวควายกะคอยพี่
    จากไปฮอดมื้อนี้
    เกือบปีพ้นพี่บ่คืน
    .............มาขอแจมนำแหน่เด้อจ้า

  5. #5
    แบ่งปันความรู้และประสบการณ์ สัญลักษณ์ของ รอย บุญเรือง
    วันที่สมัคร
    Feb 2010
    กระทู้
    157
    บ่ได้มาโดน กะยังม่วนคือเก่าครับอ้าย
    เข้ามายามได๋คึดฮอดแต่บ้านเฮา ยังหว่า

  6. #6
    ฤดูเวียนเพียนพ้น
    ฝนกะมาฟ้ากะเปลี่ยน
    หลังคาเฮือนกะเปียกย้อย
    ฝนจ้อยหน่วงอุรา
    เหลียวเบิ่งทางไพหญ้า
    เถียงนากะเปียกชุ่ม
    เขียวอุ่มคุ่มกอไม้
    ฤดูได้หน้าเฮ็ดนา
    เหลียวเบิ่งทางลุงป้า
    อาวอากะลงท่ง
    ป้านคันแทไถถากคาด
    ฮุดฮาดเผิ่นกะไถ
    สาวพะนางน้องไท้
    นาท่งใหญ่หลกดำ
    จนหน้าก่ำตาหมอง
    บ่าวสิจองสิมีบ้อ
    ...? สนใจสาวชาวนามีแหน่บ่น้อ...อิอิ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •