กำลังแสดงผล 1 ถึง 8 จากทั้งหมด 8

หัวข้อ: ไหว้ครู....ก่อน

  1. #1

    ไหว้ครู....ก่อน

    อันหมู่มวลดอกไม้ สีสัน ก้านกอง
    นางได้ลองแต่งไว้ ใส่พานนี้ ให้พี่ศรี
    ประทีปมี พร้อมพานพุ่ม ดั่งปทุมอาจ..องค์
    ลืมบ่อลง ได้เห็นแล้ว ปราณีตแพร้ว ถอดจากใจ
    เก็บพานนี้เอาไว้ ไหว้พี่อาจารย์ศรี(สะท้าน)
    ดั่งมณีมิ่งมิตร จากลูกศิษย์ หัวแก้ว
    ขอพนมมือ ไหว้วันทา อาจารย์ใหญ่
    กราบงามงาม คันพร้อมแล้ว คุณพี่ให้รับเอา
    น้องฝากโตกับเจ้า ยั่งบ่อเลา ได้ไหว้ครู
    จั่งยังดูขัดเขิน พอกะเทิน บาดยามเว้า
    พานได้เป็นของเจ้า ย้อนนางหล่า ติดตามอ่าน
    จากผลงานที่อ้าย แต่งแล้วผ่านมา
    อันว่าพาน สาวหล่า ในใจอ้าย สิฮู้อยู่
    บัดยาม ตู๋หลูน้อง นางนี้ ได้ห่างไกล
    สิขอลาจากอ้าย ชายนี้ไปสาก่อน
    มื่อใหม่เฮาจั่งย้อน โงโค้ง ต่าวมา
    แก้ไขครั้งสุดท้ายโดย ข้าวต้มมัด; 24-08-2010 at 21:07.


  2. #2
    แบ่งปันความรู้และประสบการณ์ สัญลักษณ์ของ บ่าวธนา
    วันที่สมัคร
    Apr 2010
    กระทู้
    339
    มวนยูใด๋หละครับ อิ อิ อิ ว่างๆกะไปบ่ายศรีซูขวัญให้แนเด้ครับ คือวา งัวยูบ้านมันออกลูกใหม่ครับ
    555555 (เว้าหยอกซือๆเด้อครับ มวนอีหลี ผมใส่ทำนองเบิงแล้ว)

  3. #3
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    สุ สุตตะสดับตั้ง หูฟังอันท่านกล่าว
    จิ จิตตังหน่วงน้าว จำหมั่นใคร่ครวญ
    ปุ ปุจฉาหลากล้วน กระบวนบ่อนสงสัย
    ลิ ลิขิตเขียนลงไป ใส่อักษรตอนท้าย
    สาธยายพอฮู้ วิชาครูอ้อป่อง ขอแก่นุททะนาดน้อง จำหมั่นอย่าลืม

    บัดนี้ ขอจงสวัสสะดีน้อม ดอมคุณพุทธบาท
    โลกนาถผ่านพื้น สุธากว้างส่าไกล
    อันว่าขันดอกไม้ มวลหมู่มาลา
    ที่อันควรนางหา ใส่พายอตั้ง
    เป็นวัตถังจบถ่วน บอระบวนเจ้ายอยื่น
    ศรีขอยกไหว้พื้น พระองค์เจ้าผู้ผ่านภูมิ
    ขอจงมาเกิดกุ้ม หุ่มห่อยอนาง
    อย่าได้วางแวนป๋า เปล่าแปนปงไว้
    ขอแก่จอมพระคุณไท้ มหาชัย สิทธิโชค
    อันว่าโรคพยาธิฮ้าย ให้กลายฮ้างห่างหนี
    สัพพะโสตถิ ภวันตุเตตั้ง อวยมายัง น้อยอ่อน
    จตุรพิธพร ขอจงมีแก่เจ้า ถะผองเท่าตลอดไป นั้นแหลว

  4. #4
    เดวขอไหว้ครูนำเอื้อย ข้าวต้มก่อน...

    สาธุเยอคุณครูแก้ว
    พิศนูให้มาหล่ำ
    ผญาป่องตำแป้น
    แหงนขึ้นสู่ขะหมอง
    ผญาลองจาเว้า
    ซู้บ่าวบ่หนีป๋า
    บาดสิจาทางเทิง
    บ่าวแล่นมาทางใต้...( แม่นบทไหว้ครูบ่น้อบทนี้...อิอิ)
    สามสิบสองอ้อเผิ่นมาหา
    สามสิบห้าอ้อเผิ่นมาตุ้ม
    สิขอเชิญครูเจ้าเฒ่าแก่ให้มาบัง
    ให้ปัญญาหลั่งคือสายน้ำ
    นะทีถ่วมแม่ทะเล
    เชิญเทิงครูศรีสะท้าน
    ต๋นท่านชีวิตยัง
    ให้ซ่อยมาปกบัง
    ดวงพะทัยนางน้อง....
    ..... มาเด้อ(เชิญเทิงครูเฒ่าเก่าแก่ครูพ่อแม่และอาจารย์..เด้อจ้า)

  5. #5
    ฝ่ายบริหารระดับสูง สัญลักษณ์ของ ตรี ศรีเมืองใหม่
    วันที่สมัคร
    Apr 2006
    ที่อยู่
    หนุ่มอุบล คนศรีเมืองใหม่
    กระทู้
    4,876
    สุดยอดอิหลีครับ ปราชญ์อีสาน ทั้งฝ่ายชายและฝ่ายหญิง แบบนี้ต้องขอแสดงความยินดีที่บ้านมหาเฮามีปราชญ์อีสาน ฝ่ายหญิงมาช่วยเติมแต่งคู่กับอาจารย์คําศรี

  6. #6
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,991
    บล็อก
    1
    ปาเจราจริยาโหนติ
    ผุ่ข่าขอวันทามิ ใส่กระหม่อมจอมเจ้า
    ตั้งแต่หนมาเว้า คุณครูบาผญาป่อง
    มันหากไหลหลื่นล่อง พอปานท่องถ่องนะโม
    โอมพุทโธมะโนตั้ง อะหังข้าวันทาใส่
    ทิพย์มาลาเป็นดอกไม้ หัวใจตั้งดั่งบรม
    ขอให้สมมาตรแม้ง ทุกหนแห่งคือบพิตร
    ภูมิบัณฑิตกล่าวขาน เป็นตำนานสืบส่น
    ขอให่พ้นวังวนโอฆะ อักขระลายสือให่ส่าลือดังก้อง

    *****
    สาธุเด้อผุ่ข่า คำได๋หว่าผิดพลาด
    โตกระบาทผู่น้อย อย่ากรรมต้อยต่อเวร
    ขันบักเบ็นขันธ์ห้า ขอข่ะมาผู่เป็นปิ่น
    ศาสตร์และศิลป์สู่เบื้อง จงมาเตื้องต่อกระทำ
    *****

    แก้ไขครั้งสุดท้ายโดย pcalibration; 26-08-2010 at 08:01.

  7. #7

    สู่ขวัญงัวควายให้ บ่าวธนาก่อน(ไปลี้ยุไสแล้วบุ)

    บัดนี้ สิเอิ้นขวัญวัว(ควาย) ของบาบ่าวธนาเด้อพี่น้อง
    ศรีศรี(ขึ้นคำนี้หล่ะก่อน ผู้ได๋สะท้านกะถอยไป อิอิ ) มื่อนี้แมนมื่อดี มั่นเจ้ามั่นกว่าก้อนผาแอน
    มั่นเจ้ามั่น กว่าศิลาอาสน์หินเพชร
    เฮ็ดนาเจ้าอย่าได้ช้า ให้เจ้าตั้งหน้าซื่อไปไวไว
    เจ้าอย่ามีใจโกรธกล้า หยาบช้าสามหาว
    ข่อยมักเจ้าคืออ้ายมักน้อง ไม้ล้องค้องเตาะต้อยตีไป
    กินหญ้าอย่าได้เข้าส่วน ให้เจ้าชวนกันมาแต่นาฮอดบ้าน
    ไปบ่อดีข่อยจึงได้ว่า ไปช้าข่อยจึงได้ไล่
    ให้เจ้าได้ค่ำค่ำคูนคูน มาเย้อขวัญเอ้ย








    มื่อลุนสิผูกแขนให้อาจารย์ศรีสะท้านเด้อจ้า ท่าอ่าน
    แก้ไขครั้งสุดท้ายโดย ข้าวต้มมัด; 18-09-2010 at 20:04.

  8. #8

    ไหว้พระ นำกันค่ะ

    นะโม นมัสการน้อม จิตชื่นบานต่อพุทโธ
    พระโพธิญาณตั้ง สัมมาสัมพุทธะ
    อรหันตะ ผู้หลุดพ้น ข้าขอซ่น บ่อนฮ่มโพธิ์
    เอานะโมขึ้นตั้ง พระธรรมนำต่อ
    ผู้ข้าขอกราบไหว้ พระสงฆ์เจ้า ให้ฮุ่งเฮือง
    ไปทางเหนือหรือทางใต้ อยู่ทางได๋ให้ซ่อยแน่
    บารมีธรรมเพิ่นซ่อยแก้ ปัญหาแย่ให้ห่างไกล
    กุศลได๋เคยเฮ็ดไว้ อยู่ทางได๋ให้ซ่อยส่ง
    ขอดำรงค์ความดีไว้ ในใจนั้นได้ผ่านมา
    ไตรสิกขาขอถือหมั่น ปฏิบัติกันถ้วนถี่
    บารมีธรรมซ่อยคุ้ม ขอให้หุ่มผู้ยกยอ
    ศิลห้าขอยกไว้ จำในใจหมดทุกอย่าง
    สิเสริมต่อเฮ็ดสร้าง บ่ลาล้างบ่อนกุศล
    เก็บความดีในใจตน ให้ลุดพ้นกองกิเลส
    ความอาเภทอย่ามาใกล้ ขอให้ได้พระนิพพาน แน่เด้อ....สาธุ
    แก้ไขครั้งสุดท้ายโดย ข้าวต้มมัด; 20-09-2010 at 23:34.

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •