หน้าที่ 1 จากทั้งหมด 3 หน้า 123 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 21

หัวข้อ: คิดฮอดนาเคยเกี่ยวข้าว

  1. #1
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,975

    คิดฮอดนาเคยเกี่ยวข้าว

    พี่น้องเอ้ย สามเดือนไกล้ เกี่ยวข้าวใหม่กำพวมจวน ให่คิดหวนคำนึง
    นั่งคิดถึงแต่ทางบ้าน ไกลมานานบอลืมได้ เกี่ยวข้าวใหม่ยังซงจำ
    นาเคยดำยังบอลืม กลิ่นไอของใบกล้า หนีไกลมายังบอสิ้น
    กลิ่นนาดินถิ่นเคยอยู่ คิดฮอดเด้อยู่สุมื่อ แลงค่ำได้ฮ่ำฮอน
    ใจวิงวอนยามนอนนั่น ขอความฝันซ่อยลูกแน สาธุ เด้อ
    ให้ฝันเห็นดอกแจงแจ้ ฝันเห็นบ้านแนกะไค๊ ให้ฝันไปได้เกี่ยวข้าว
    ฝันไปยาวย๊าฟ้าวตื่น ฝันเบิ๊ดคืนจนซอดเซ้าฝันเกี่ยวข้าวกะว่าไค๊ นี่แหล่ว


  2. #2
    ศิลปิน นักร้อง นักแสดง สัญลักษณ์ของ คนพนมไพร
    วันที่สมัคร
    Jan 2009
    ที่อยู่
    สายไหม
    กระทู้
    625
    แม่ป้าเอ้ย เดือนสิบเอ็ด สิบสองค้อย หัวลม วอยหนาววี่
    ปลาลงลี่ น้ำล้นห้วย ในนาเจ้าข้าวก่องเหลือง
    คิดอดีตต่อเนื่อง ควมเก่า คราวหลัง
    คราวเมื่อยังเป็นชาวนา อยู่ป่าดอนคอนกล้า

    เจ้าจากนามาโดนแล้ว บ่อมีแววสิลืมถิ่น
    ผักอีฮีน จ้ำป่นถ้วย ข้าวเหนียวต้วยอยู่ไฮ่โพน
    ต่างประเทศหว่างโพ้น ไกลบ้านป่านาเคยเทียว
    ข้าวสีเขียวพวมมาน ก่านเหลือง พวมก้ม

    บัดหัวลมพานต้อง ตองสะแบงพวมขู๋หล่น
    ป้าอยู่ไกลให้อดทน ยามเจ้าคึดฮอดบ้าน พาทีต้านกล่าวจา
    ลูกหลานยังนั่งถ่า ฟังป้าว่าน้ำตาคลอ
    บ้านมหาเฮาน้อ ได้ส่งเสียงสำเนียงต้าน ดอกป้าเอ้ยยยยยย

  3. #3
    ร่วมถ่ายทอดความรู้สู่สังคม สัญลักษณ์ของ ทิดจ่อย
    วันที่สมัคร
    Apr 2009
    กระทู้
    773

    คึดฮอดนา

    คึดฮอดหลายน้อแม่ป้า คึดฮอดนา คึุดฮอดไห่
    คึดฮอดไก่คึดฮอดเล้า คึดฮอดเข้าอยู่นา
    สองขาก้าว มือขวากำด้ามเกี่ยว เขียวข้าวดอพอเฮ็ดเหม่า
    ยามแลงเซ้าคึดบ่อเซา ผักกะเดากินกับลาบเซาเถียงนาอยู่หม่องเก่า
    ข้าว กข. พวมมาน ผ่องออกฮวงเป็นพวงก้ม
    ยามกางเว็นงมหอยได้ ลาบปลาดุก กะปูจี่
    บักกะเสกอ่อนอยู่ต้น กินเหมี่ยงอยู่ท่งนา

    เว้ามาล่ะคึดฮอดน้อครับ

  4. #4
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,975
    หลานคนพนมไพรเอ๋ย หลานทิดจ่อยเอ๋ย
    หลานหล่า เว้าขึ้นมาน้ำตาหลั่ง เว้าความหลังตั้งแต่กี้
    สุมื่อนี่กะบอพอเด๊หล่า เว้าเรื่องนา เว้าเรื่องข้าว
    ไกล้สิหนาวข้าวพอเกี่ยว คิดฮอดเคียวเคยกำแหน่น
    เกาะก้อยต้อยใส่ฮวง น้ำตาป้ามันรินร่วง หลายปีที่กายผ่าน
    ยังคิดฮอดตั้งแต่บ้าน เลยจ๋าต้าน สู่ กันฟังซั่นดอก อิอิอิอิ

  5. #5
    แบ่งปันความรู้และประสบการณ์ สัญลักษณ์ของ ๛หนุ่มบ้านไกล๛
    วันที่สมัคร
    Apr 2009
    กระทู้
    849
    บล็อก
    8
    อยากแต่ง กลอน ผะหยา เป็นเด้ ครับ อ่านแล้ว คิดฮอดบ้าน คิดฮอดสมัยเกี่ยวข้าวรับจ้างอยู่นา คิดฮอดยามสีข้าวดึก ๆ (รถสีข้าว) คิดฮอดป่นปลาผักสะเดา ยามลงแขกเกี่ยวข้าว

  6. #6
    ฟ้าสั่งฝนมวลต้นข้าว อวบอ้วนเนาว์ครรภาแก่
    ปูปลาแซหาเลาะต้อน บุกบืนบ้อนย้อนสู่หนอง
    ข้าวต้นเขียวเดี๋ยวมานท้อง รวงสีทองใกล้สิป่ง
    ในนาท่งบ่ดนนี้ สิเหลืองกล้วยทั่วท่งนา
    ส่วนว่าทางโตข้าฯ นอนเถียงนายามลมวี่
    หลับฝันดีเห็นหน้าเจ้า ก้มเกี่ยวข้าวแม่นอยู่เฮียง
    ได้ยินเสียงคนมาเอิ้น ฝันเพลินๆกะเลยตื่น
    ลุกขึ้นยืนตามเสียงฮ้อง ที่เพิ่นร้องให้ตื่นมา
    งัวที่เลี้ยงให้กินหญ้า ลงไฮ่นากินข้าวเพิ่น
    หน่ายเหลือเกินกะเทินฟ้าว กะเลยจ้าวฟ้าวไล่งัว
    กะเทิ่งกลัวคดีแพ่ง ยามมื้อแลงบ้านผู้ใหญ่ฯ
    กะเลยไล่งัวลี้ หนีจากหั่น..หันหน้าแม่นใส่โนน...สาแหล่ว..



    อ้ายทิดจ่อย อ้ายพีฯ ป้าชุดฯ คันมีคนมาถามว่างัวไผลงกินข้าว บอกเพิ่นว่างัว อาจารย์ศรีฯเด้อครับ...55555
    แก้ไขครั้งสุดท้ายโดย พลายแก้ว; 09-09-2010 at 12:53.

  7. #7
    ร่วมถ่ายทอดความรู้สู่สังคม สัญลักษณ์ของ จำปา
    วันที่สมัคร
    Nov 2009
    กระทู้
    1,492
    คุณป้าลำซิ่งค่ะ ความฝันกับความจริง มันบ่คือกับเด้อค่ะ
    ต้องกลับไปไห้เห็นกับตา....อิอิอิ

  8. #8
    ร่วมถ่ายทอดความรู้สู่สังคม สัญลักษณ์ของ ทิดจ่อย
    วันที่สมัคร
    Apr 2009
    กระทู้
    773
    เว้าให้แม่ป้า Chudahancock เลาคึดฮอดบ้านอีกก่อน

    เดิ๊กๆ ค่อน เสียงวอนๆ นกเค้าลานงอยคอนจ่ม
    น้ำหมอกพรมดอกข้าว ฮวงก้านก่องลง
    นอนกลางท่งขุดหลุมล่อ ปลาข่อบืนคันแทกิ่ว
    ปลาซิว - เข็ง ดีดบ้อน หาหม่องป่องทาง
    โตบางๆ ปลานางเล่น ไหลลอยเลาะหลี่
    ลมวอยๆ ฝนสิหนี นอนท่งนาคึดฮอดซู้ นอนขดคู้อยู่ผู้เดียว
    เหลียวไปทางนาท่งกว้างเห็นดวงไฟไทบ้านป่า
    เลาะหาปลาตามหลี่ต้อน สะพายข่องส่องไฟ
    ดาวดวงใสแสงสะท้อน สะเก็ดดาวสะท้อนหุ่ง
    พุ่งไหวๆ ผ่านฟ้า เีถียงนาน้อยว้าเหว่หลาย
    พอตอนสายแดดส่องแสงแยงทั่วฟ้านกไก่นาบินเลาะท่ง
    ผักขะแยงบ่งดอกแล้วขาวปนแหล่ หอมห่วยห่วย
    ผักพิมพวย-ขะหน่องม้า-บัว บานแย้ม อยู่เลาะหนอง
    ตามลำคลองคนลงส่อนกุ้งฝอยลอยแพแหย่ง
    แหนงไม้ไฝ่ไกล้ฝั่นน้ำนกเต็นน้อยเฝ้าจอบปลา
    บินถลาฮ้อง แก๊ดๆๆ นกแจนแวนฮ้องหาคู่
    อยู่ผู้เดียวอ้างว้าง คือข่อยนั้นเปลี่ยวใจ....แม่ป้าเอย

    แก้ไขครั้งสุดท้ายโดย ทิดจ่อย; 09-09-2010 at 16:01.

  9. #9
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,975
    หลานจำปา หลานทิดจ่อย หลานหนุ่มบ้านไกล รวมฮอดหลานบ่าวก๋า

    ที่ได้มาดอกจ๋าต้าน ซ่อยกันสานผญาต้อน จ่ายคำกลอนต่อให่มวน

    กลอนผญาดีล้วนๆ ซวนให้ป้านี่คิดแฮง มาแถลงดอกแปลงเพิ่ม

    เติมคำเต็มแต่ละข่อ จังแมนน้อ อิอิอิ ซุมหมู่เจ้า พากันเว้าได้เก่งหลาย

    เว้าแนวได๋กะดีเลิศ เกิดก่อต่อประสาน เห็นผลงานแต่ละคน

    ป้านี่จนปัญญาแล้วอิอิอิ แนวเจ้าของสมองตื้อ เรียนหนังสือกะบอป่อง

    ปึกกว่าพี่ปึกกว่าน้อง พ้นเด้หล่าที่ว่าไป เพียงแต่คิดดอกขึ้นได้

    คิดฮอดไฮ่นาสวน มันแล้วชวนให่จิต ขีดเขียนได้เพียรพร่ำ

    คิดฮอดยามดำนาพุ้น คิดยาวไปจนได้เกี่ยว คิดฮอดหม่องหนทางเที้ยว

    เหลียวขึ้นไปเทิ้งฟ้า คิดเห็นหน่าผุ สุ คน เกี่ยวข้าวดอแตกจ้นๆ

    แต่ละคนกะเทิ้งเมื่อย นั่งอยู่เฝือยหยุดพักน้อย กินน้ำได้พักเซา

    ผุลางคนกะกินข้าว ตื่มเอาแฮงแล้วลงต่อ เกี่ยวข้าวดอในยามนั่น

    มันหากได้ดอกคิดเห็น เทิ้งพวมเย็นตะเว็นค่อย ลมวอยๆพัด พัดวี่วี

    คิดฮอดหลายตั้งแต่กี้ มาเดี๋ยวนี่กะบอลืม นี่แหล่ว
    แก้ไขครั้งสุดท้ายโดย chudhancock; 10-09-2010 at 01:20.

  10. #10
    Super Moderator
    Guide & Photographer
    สัญลักษณ์ของ เจ้าซายน้อย
    วันที่สมัคร
    Sep 2007
    ที่อยู่
    อยู่ในใจเสมอ
    กระทู้
    1,550

    พบปะพูดคุย

    แหม่นสิปวดหลังก้ม ขี่ตมแป้ดบ่ถือสา
    ซุมอีแหม่พาเฮ็ดนา ตั้งแต่เฮายังน้อย

    ตอนนี้จักสิหลกกล้าเป็นบ่บุ๊ข่อยกะดาย อิอิ

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •