ฮักอ้ายคือไถหัก

[ทิดจ่อย]

ฮักอ้ายคือไถหัก

ไถฮากไม้ขะยูงคันนี้ เคยได้ไถขุดค้น ได้ไถโพน ไถนาฮุด
ดุดนำฮอยควายบักตู้บู๋หม่น ก่นดิน
เป็นทรัพย์สินที่สูงค่า คุณค่าหากมีหลาย
คราวปู่ย่าตายาย บรรพบุรุษชาวนา ได้ค้นคิดประดิษฐ์ไว้
เฮ็ดนา-ไห่ เลี้ยง ประชาไทยทั้งประเทศ
มูลเหตุแห่งความก้าวหน้า ไถไม้ได้เหล่าหาย
ผุพังหักกองถิ่มไว้ ให้ปลวกกินสูญสิ้นค่า
รถไถนาต่างประเทศ ได้นำเข้าใช้ต่างไถ
อเนกประสงค์ของการใช้ รถไถนาเผิ่นดีลื่น
ของแต่เก่าได้ถืกคลื่น เทคโนโลยี สาดซัดหาย

เปรียบคือความฮักในใจอ้าย มอบให้นางบ่อเหลือค้างให้คนอื่น
อดีตฮักที่หวานชื่น ว่าแม่นสิกลืนกินได้ คือน้ำเผิ่งพุ้นตั่วนาง
บ่อทันโดนได้เหล่าฮ้าง คือบุพ(พัง)เพ ได้ดึงจ่อง
แผลงศรใส่ใจน้อง ดึงเขานั้นหย่างเข้ามา
ระยะทางพิสูจน์ม้า กาลเวลาพิสูจน์ใจ คนเฮาได้คือเผิ่นว่า
ถ่านไฟเก่าบ่อเหลือความแกร่งกล้า เหลือเพียงเถ้า ขี่เถ่าไฟ
คือแอก-ไถ-ข่าว คล้อง ได้เหินห่างคอควาย
บักสบไถ-หัวหมู ได้ห่างคองไถแล้ว
หนังต่องแอกขาดเป็นแป้ว ผุพังไร้ค่า
คนที่มาแทนโตอ้ายเขาดีพร้อมคู่สู่อัน

ฮักอ้ายจำต้องหักสะบั้น คือคันไถอันเก่าแก่
ขอรับความพ่ายแพ้ ให้น้องนั่งหน้าเบิดแท้แล้ นำเขาพุ้น ขี่รถไถ

ขอขอบคุณภาพจาก พิพิธภัณฑ์เทคโนโลยีไทยโบราณครับ

[เจ้าซายน้อย]

คำว่าอกหักนี้ ใผใด้ยินยืนบ่อยู่
หัวใจอันน้อยๆ ใหลลงใด้แม่นปลายขา
ย้อนว่าฮักว่าแพงเจ้า อดเอาอีหยังอยาก
บาดว่าหมาอยู่ข้าง เอากินจ้อยง่ายดาย
ย้อนว่าฮักว่าหลงเจ้า แงงเงาอยู่บ่อห่าง
เอาใจเจ้าสู่มื้อ คือสิใด้ฮ่วมเฮียน
อยากใด้หยังสั่งมาโลด อ้ายสิขันอาสา
ดาวเดือนเหมิดเทิงฟ้า อ้ายสิหามาให่
พอเผิ่นใด้เบิดแล้ว เผิ่นหละเป็นแนวไหม่
บอกว่าพอซำนี้ เฮาเลิกต่อกัน
คันแม่ฮู้จั่งสี้สิบ่ออดมันจักแนว
สิย่องให้มุ่นปานฮำ สิเต๋ะให้มุ่นปานเห็ด
สิเทียว...เทียว...หม่อมพะนางให่...เว้อออ พะนะ


...เติมคำในช่องว่าง

[chudhancock]

โอ้ยน้ออ้ายเอ้ย จั๊กจ่มหยังหล่ะน้ออ้าย เอา คันไถมาเอื้อนเอ่ย
ว่าเปรียบเปรย เว้าให้น้องมาคือคล่อง แท้หล่ะน้อ
น้องบอเคยลืมอ้าย บอลืมไถคันเก่าๆ อย่าหูเบาฟังชาวบ้าน
แมนไผ๋นั่นซ่างว่าเป็น ใจเย็น ๆหย้าฟ้าวฮ้อน ทุกสิ่งอย่างอ้ายมาจ๋า
เรื่องปัญหาทางหัวใจ มาเว้าไปให่อายบ้าน บอสงสารน้องบออ้าย
หาเว้าไปใส่ร้ายจ่ม คนที่น้องนี่เมาะสม มีเพียงเจ้าเท่านั่น
บอต้องย้านดอกพี่เอ้ย อิอิอิอิอิ

[sompoi]

อ้างถึง ซายน้อย/ ฮ่าๆๆๆๆๆๆๆ โอ่ยยย น้อ ปรอบทื้นคนเอ้ย เนาะ ผญาเพิ่นละเริ่มต้นมาเข้าท่าแท้ๆ .. บาดได๋จะของมาแต่งแถออกข้างทางไปจ่างซ้านน..เตะก้นคนจักบาดเด้เนาะ..
ปล. อดสาอ่านเอาแน่ะเด้อจ้าคุณป้าชุด ..ผญาเด็กแนวเด้อจ้า ฮ่าๆๆ

[chudhancock]

อิอิอิ จ้าหลานมิกาเซ่จ๋า ผญาเด็ก แนว ป้าก็ต้องอ่านแบบแนวๆเนาะจ้า คือว่า แนวอ่านยากนั่นน้า ฮ่าฮ่าฮ่า

[หญ้านาง]

นางนี้มักไถแท้
แต่มาแพ้รถญี่ปุ่น
ไถขี้ฝุ่นไหง่กุ้ม
เหล่ากว้างกะบ่หัก
ไถเทิงโพนเทิงนาหล่ม
เทิงขี้ตมเทิงหินแห่
ไถคันแทและไฮ่อ้อย
ควายน้อยกะบ่ปาน...... มาเว้าให้เจ็บใจเด้อจ้า อ้ายทิดจ่อย อิอิ

[ทิดจ่อย]

อ้างถึง
นางนี้มักไถแท้
แต่มาแพ้รถญี่ปุ่น
ไถขี้ฝุ่นไหง่กุ้ม
เหล่ากว้างกะบ่หัก
ไถเทิงโพนเทิงนาหล่ม
เทิงขี้ตมเทิงหินแห่
ไถคันแทและไฮ่อ้อย
ควายน้อยกะบ่ปาน...... มาเว้าให้เจ็บใจเด้อจ้า อ้ายทิดจ่อย อิอิ

พอได้ฟังคำต้านปานใจถืกฟ้าผ่า
น้องหญ้านางส่างมาหัวเยาะเย้ยลืมควายเฒ่าคราดและไถ
ไปหลงไหลทางเขาพุ้นควายญี่ปุ่นทันสมัย
สิไปไสล่ะคำนางอ้ายขอไปนำแน่เด้อน้อง....อิ อิ อิ ลงได้ส่ำนี้หล่ะ

[ข้าวต้มมัด]

โอน้อ พี่น้องเอ่ย ฟังเพิ่นเผยวาจาต้าน
ฮักอ้ายคือไถ่หัก หย่อนว่าแฟนเพิ่นไปมัก
หนุ่มรถไถ่นาน้อย เบิ่งหน้าเฮ็ดส้อยล่อย
บ่เห็นฮอยสิโค้งต่าว เขาผัสก้าวไปหน้า
ควมล้ำหน้ารถอีแต่น บ่ออยากให้เคียดแค้น
ต้องเปลี่ยนแผนสั่นตั๋วพี่ รถรุ่นใหม่ทุกมื่อนี้
สีส้มนัีนจั่งแมนดีหลาย
ราคาบ่อมากมาย ขี่ส่ำบายนำตั่วพี่
เขาเปลี่ยนบ้าง เจ้าเปลี่ยนบ้าง ขีไปอ้าง สุย สุย
ให้มันลุยขี้ตมให้มันสมความแค้น
เฮ็ดมันให้แข่นแข่น เขาอุกแน่นในอุรา
ให้เขาได้ฮ้องว่า พี่จ่อยจ๋า...ไปนำแน่ ฮ่าๆๆ.....คักบ่อ

[ทิดจ่อย]

สูนให้คนสื่อๆ ดอกหล่าข้าวต้มมัด
อย่าให้มีเงินซื้อรถไถนาเด้อ
สิไปแก่เอาผุสาวมาเกี่ยวข้าวส่อยเบิ่ง อิ อิ อิ