กระดูกสันหลัง

[ทิดจ่อย]

หยาดเหงื่อชาวนา....น้ำตากระดูกสันหลังของชาติ

ดวงอาทิตย์ใกล้สิพ้นขอบฟ้า ทิศบูรพาฟ้าใสส่อง
แสงทองทาทาบแต้มแซมส้มใกล้โผล่มา
เสียงไก่กาขันจ้อ หนาวเดนอ เหมยหมอกย้อยเปียกซุ่ม
พออยากตุ้มห่มผ้านอนขดคู้ผ้าห่มนวม
ตัดใจลุกสวมเสื้อผ้า แขวนข้างฝาเปียกซุ่มเหื่อ
ผ่องขึ้นเกลือด่างพร้อย เทิงฮอยขาดกะผ่องกัน
เป็นชาวนาจำต้องทนอดกลั้น เป็น "กระดูกสันหลัง" ฟังแล้วโก้คักแหน่
ปั้นคันแทขุดก่นไง้ สิเจ็บไข้กะแหม่นทน
ฟ้าวนำฝนและฟ้า ฤดูเดือนปีโตแปรหนึ่ง
ดึงให้ลุกขึ้นสู้ นอนขดคู้อยู่่บ่อเป็น
เข็นชีวิตที่ต่ำต้อย หย่างนำฮอยปู่-ย่า
บ่ิอเคยเห็นดอกพิชซ่า กินปลาร้าแจ่วบอง
กินให้พออยู่ท้อง พอประทังกายได้สู้ต่อ
น้ำตาคลอหน่วยเบ้า ยามอุกเอ้าอั่งใจ
ธกส.กู้ออกมาใช้ ลงทุนไปมิดจี่หลี่
เฮ็ดนาได้ใช้แต่หนี้ บ่อมีมื้อพ้นทุกข์จน
ผลิตผลที่ทำได้ บ่อคุ้มทุนที่ใช้จ่าย
ปีน้ำหลายเผิ่นผัดท่วม ควมสิเว้ากะบ่อมี
ตกบางปีคือตอกย้ำกำขี้ดินไหง่กุ่นๆ
บุญผลาพอส่ำนี้ มีไผบ้างให้เผิ่งพา
ก้มเอาหลังสู้ฟ้า หน้าสู้ดินเส้นเอ็นจ่อง
เฮ็ดเท่าผองมื้อเฒ่า “คุณ” ของเจ้าได้ส่ำได๋
จับคัน(รถ)ไถขุดค้น บ่ออาจฝังความจนให้หนีพ้นออกห่าง
โถมอาบเหงื่อต่างน้ำ กินข้าวบ่ายน้ำตา
ข้าวที่ผองชาวนาเฮ็ดได้ ไผเป็นคนกำหนดค่า
เห็นแต่ผู้เผิ่นเป็นพ่อค้า กำหนดค้าค่าแทน
วิถีชีวิตกะอยู่แบบแร้นแค้น แสนเข็ญบ่อมีค่า
จั่งขอจำนรรจา ฝากเป็นข้อคิดไว้ คันไผได้อ่านเห็น
ก่อนสิเป็นเม็ดข้าวแต่ละคำให้ฮู้ว่า
มีน้ำตาหยาดเหงื่อย้อย ผสมข้าวคู่สู่คำ

ขอบคุณเจ้าของภาพ จากอินเตอร์เนต

[ดอกมันปลา]

ออกพรรษามาถึงแล้ว เสียงแซวๆเอิ่นกันม่วน
หนาวลมหวนจวนใจแท้ แลยามว่างใจห่างแฟน
สายลมแทนยามหนาวท้อ เกี่ยวข้าวดอรอเจ้าอยู่
หากน้องนางเจ้ารับรู้ ให้คืนบ้านแหน่ละน้าง....น้องสาวเอย

[สาวมุก]

ม่วนเด้จ้า อ้ายทิดจ่อย..ผญาอ้ายคลอดออกมายามใด๋ กะบ่เคยผิดหวังเลย ผญาอ้ายทิดจ่อยมีคุณภาพตลอดจ้า...บ่ว่าสิเป็นคำคล้องจอง ความหมาย การเรียบเรียง ...แต่งแบบนี้มาบ่อยๆเด้อจ้า น้องสาวคอยถ่าอ่านอยู่จ้า

[pcalibration]

เกียรติคุณหนุนค้ำ พินัยกรรมจากคุณปู่
ยังยืนหยัดต่อสู้ เคียงคู่อย่างทุกข์ทน
อุปสรรคหนักเหลือล้น ชาวนาจนสู้ฟันฝ่า
ศักดินาแค่เล็กน้อย คือปมด้อยอภิชน
ฮกต้องหม่นหนามสนยังต้องฝ่า สิบพ่อนาที่หว่าเยี่ยมยังแพ้เหลี่ยมคนกลาง...ซั่นแหล่วทิด..

[ทิดจ่อย]

อ้างถึง กระทู้สาวมุก
ม่วนเด้จ้า อ้ายทิดจ่อย..ผญาอ้ายคลอดออกมายามใด๋ กะบ่เคยผิดหวังเลย ผญาอ้ายทิดจ่อยมีคุณภาพตลอดจ้า...บ่ว่าสิเป็นคำคล้องจอง ความหมาย การเรียบเรียง ...แต่งแบบนี้มาบ่อยๆเด้อจ้า น้องสาวคอยถ่าอ่านอยู่จ้า

โอ้ย....อ้ายกะจ่มไปซั่นล่ะอร คิดหยังได้กะเขียนออกมาซื่อๆ ดอก
เป็นคนชอบคิดชอบเขียน บ่อได้เก่งหยังดอกครับ ขอบคุณที่ย้อง
แต่บ่อกล้ารับ อยากอายเผิ่นผู้เป็นปราชญ์อาจารย์

ขอบคุณอ้ายพีที่เข้ามาให้กำลังใจครับ

[ข้าวต้มมัด]

มวนแท้น้อ ภูมิภาคผญ๋ากาพย์
นางนี้แมนซาบซึ้ง อ่านแล้วแปวป่องเห็น
แสนลำเค็ญอีหลี่พี่ พ่อแม่ตี้เพิ่นสร้างก่อ
เฮาสิท้อกะบ่ได้ บ่มีไผ๋สิเฮ็ดแทน
บางถิ่นอาจสิแล้นแค้น กะบ่แมนไปสาเหมิด
คันแมนเฮาบ่เชิดชู คนอื่นสิดูถูกได้
บ่มีหยั่งมายู้ เฮาต้องสู้คือกันตั่ว
อย่าเป็นงัวหนีล้อมคอก คนนอกสิมาเอา
ของของเฮาดินองเฮา ต้นเข่าของมีค่า
ถึงน้ำตาชาวนาสิหยดย้อย มีแฮงน้อยต้องซ่อยกัน สั่นแล้วพี่น้องเอ้ย







อย่าสุอยากเถาะอ้ายทิดจ่อย พิซซ่า จั่งแมนข่อยเปิดแฮง กินตำหมากฮุงพุ้นสิไคยุ ไปไสกะมีแต่พิซซ่า สปาร์เกตตี้

[ทิดจ่อย]

อ้างถึง กระทู้ ข้าวต้มมัด

อย่าสุอยากเถาะอ้ายทิดจ่อย พิซซ่า จั่งแมนข่อยเปิดแฮง กินตำหมากฮุงพุ้นสิไคยุ ไปไสกะมีแต่พิซซ่า สปาร์เกตตี้

อ้ายได้ยินว่ามันเป็นอาหารขยะบ่อแม่นตี้หล่า อ้ายบ่อเคยกินดอก บ่อมักย้านอ้วน 55555
อยากแหน่แต่ลาบเทานี้หล่ะ

[จำปา]

อ่านแล้วนึกเห็นภาพชาวนาเลยค่ะ
หนิกะลูกชานาเด้อค่ะ เกิดมากะเห็นท้องทุ่งนา หาผักหาหญ้ากินตามประสา ข้าวนาปลาปิ้งกะเฮ็ดกินเอง อิอิ

[หญ้านาง]

ลูกชาวนาหน้าหม่น
สู้อดทนได้ข้าวใหม่
อาบเหื่อไคลไหลย้อย
ยอยื่นผุเผิ่นรวย
ทุกข์ระทวยงวยเงื้อ
เหื่อปานเกลือเฟือแดดเฮ่ง
ฝนตกเร่งบ่ได้ยั้ง
เหื่อแกมน้ำตาม...ฝน........