เซิ้น เซิ่นไป คือนกไส่ติดปีกบิน
หูผัสไปได้ยิน ตาซอนแลนเห็นคำเว้า
อ้าวอ้าวอ้าว มีผุบ่าวสิอกหัก
เป็นจั่งใดน้อความรัก บ่อฮู้จักเด้ทางนี้
อันว่าตัวของพี่ มีแฟนแล้วละไป่
นางสิได้ ขอเข้ามาทักทาย อิอิ
คิดฮอดหลายแท้บ้ออ้าย ฮักส่ำได๋น้อได้ว่า
จ่ายผญ๋าหาคนเว้า นางหลงเข้ามาอ่านนำ
บ่ต้องใจระกำ คำนางสิได้ว่า
เจรจาหวานจ้อย ผญ๋าน้อยสิซอ่ยตอบ เด้บัดนี้
หนาวบ่ลวงบ่แล้ว เป็นแนวใด๋น้ออากาศ
มีทั้งหยาดฝนแต้มตกเรื่อยซุ่มเหิง
คนเมืองเทิงหนาวน้ำค้าง คนเมืองล่างหนาวฝนตก
มาสงสาร บ่าวบ่มีสาวกก สิป่วยตายปานไก่น้อย
เห็นแต่ฮอยผุสาวเจ้า เหลียวนำทางมิดซีลี
เหมิดหน้าหนาวปีนี้ บ่มีได้อุ่นคิง พี่น้องครับ
หนาวโดนคักปีนี้ หนาวตั้งแต่ปลายปี จนว่าฮอดเดือนสี่
มีทั้งหยาดฝนพร้อม มาซ้ำปนหนาว
เดี๋ยวจักคราวกะฮ้อน จักหว่างกะหนาว
มาประสมปนเป โลกเปลี่ยนแปรไปแล้ว
แนวบ่เคยพานพ้อ กะมาพบประสบเห็น
หรือแม่นกรรมคราวเวร ได้จ่องนำกรรมต้อน
เหลียวเบิ่งแหน่ เหลียวเบิ่งเกลียวลอนคลื่น ไหลทะเลมาซัดซาด
ฟาดเอาเมืองญี่ปุ่นพุ้น พังระลอกแผ่นดินไหว
ทางเมืองไทยพั่นแฮงซ้ำ ทางฝนซัดกระหน่ำ
ทั้งน้ำท่วมภาคใต้ ทางเหนือ อิสานพุ้นพั่นว่าหนาว
ตกฮอดคราวฤดูแล้ง ลมมาแฮงหนาวสะบั้น
แต่ก่อนนั้นผัดว่าฮ้อน มาตอนนี้ผัดว่าหนาว
คันว่าหนาวเป็นแบบนี่ เถิงปลายปีเห็นของแปลก แท้แหล่ว
หิมะตกจากฟ้า เมืองไทยนั่นห่อนสิมี
เทิ่งสิดีสิร้าย สิมีมาเป็นคู่
ดีย้อนอยู่กะได้ บายก้อนต่อนหิมะ นั่นแหล่ว
แต่หากหนาวปานนั่น สิเฮ็ดกันจั่งใด๋อยู่ พี่น้อง
ตั้งแต่หนาวซำนี่ บ่มีว่างสิห่างไฟ
สุดยอดเลยมีแต่ระดับปรมาจารย์เนาะ บ่ต้องห่วงว่าภูมิปัญญาอีสานสิสูญหายแล่วล่ะ
กฎการส่งข้อความ
อ้างข้อความนี้
Bookmarks