หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 11

หัวข้อ: สาวอีสานพลัดถิ่น

  1. #1
    ร่วมถ่ายทอดความรู้สู่สังคม สัญลักษณ์ของ ทิดจ่อย
    วันที่สมัคร
    Apr 2009
    กระทู้
    773

    สาวอีสานพลัดถิ่น

    สาดสายตาขึ้นแนมฟ้า ฝนสิลาฟ้าฮ้องห่วน
    โหราศาสตร์คำนวณ ว่าเหมันต์ใกล้จ้อ ฝนสิเอิ้นสั่งลา
    ฟ้าผ่าหัวปลาเป็นฮอยพร้า หัวปลาดุกเริ่มสิแก่น
    นกแจนแวนแก๊ด แก๊ดฮ้อง หาคู่(คู้ : เสียงโท) สู่สม
    สายฝนพรมแมกไม้ พฤกษชาติขจีเขียว
    ฝนสิเทียวทางกลับ นับเวลาสิเมือบ้าน
    จากทิศอีสาน ไปทางตกเฉียงใต้ หรดีก้ำบ้านเก่า
    คือจั่งเสียงอ่อยเว้า ว่าปีหน้าจั่งสิมา
    ฝูงนกกาบินจ้อ กลับฮวงฮังเป็นหมู่ๆ
    ฟังเสียงกู่กูกเอิ้น บ้างบินแส่วส่วนสน
    คึดเห็นคนผู้จากบ้าน สาวอีสานได้พลัดถิ่น
    ไปหากินคือนกน้อย คึดเถิงบ้านแหน่บ่อน้อ
    ********************
    สาวอีสานเอ้ย...(ซุคนนั้นล่ะ บ่อได้เจาะจงไผดอก)
    แหม่นเจ้าลืมแล้วบ้อ ไม้ลำปอเคยลอกเปลือก เหม็นหึ่งๆ
    ลืมกระดึงคอควาย ลืมกระสวยต่ำหูก ลืมข้าวปลูกหว่านกล้า ลืมปลาร้าแจ่วบอง
    มีคนคองถ่าเจ้าสองเขือพ่อกับแม่ เผิ่นคึดนำเจ้าแ้ท้ๆ แนมจ้องส่องทาง
    เลากะคือสิอ้างว้าง ลูกหลานห่างป๋ะหนี
    ย้อนวิถีคนละทาง ต่างสมัยไกลล้ำ
    แม่นสิทำงานจ้าง อยู่ทางใด๋กะตามส่าง
    ขอให้ซุมหมู่เจ้ารวยล้ำคู่สู่คน
    ******************
    สาวอีสานเอ้ย...............
    ย้อนควมจนจั่งห่างบ้าน ไกลสถานบ้านเกิดก่อ
    ลำบากกายเจ้าต่อสู้ หนักใจบ้างเจ้าค่อยทน
    ผุลางคนเจอนายจ้าง ที่หาทางคอยเอาเปรียบ
    ผุลางคนถืกหยามเหยียบซ้ำ ได้โฮฮ้องก่องน้ำตา
    ทำงานหนักเหนื่อยล้า ผ่องปัญหาทางชีวิต
    มลพิษเมืองใหญ่กว้าง คอยรุมเร้าอยู่บ่อเซา
    หยดน้ำตาของหมู่เจ้า ส่อยบรรเทา หัวใจกลุ้ม ให้ปลอดโปร่ง
    "แม่โขง" ฝั่งสะท้อน ยินข่าวเจ้า เขาหย่องยี
    "แม่ชี" กะซึมเศร้า ซงเหงาๆ สายน้ำขุ่น
    "แม่มูล" ไห้สะอื้น โถมถั่งคลื่น คึดนำเจ้าอยู่บ่อวาย
    *******************
    สาวอีสานเอ้ย...........
    ผู้วาสนาดีได้มีงานโก้ ตำแหน่งโตกะไคแหน่
    ผู้วาสนาย่ำแย่ ให้เพียรสู้ค่อยทน
    ผุลางคนไปไกลเยิ้น หาทำงานต่างประเทศ
    อาณาเขตใหญ่กว้าง อย่าลืมบ้านถิ่มท่งนา
    ให้เป็นคือจั่งฝนที่จากฟ้า สกุณาไกลหม่องอยู่
    มะโนราบินหนีจากซู้ กะยังได้คู่กัน
    ให้เป็นคือจั่งดวงตะวันลับเหลี่ยมโลก ราตรีได้พักผ่อน
    เดือนดาวจรจากฟ้า ทิวาแจ้ง เซ้าแจ่มใส
    คันแหม่นทุกข์ยากไฮ้ ไปหากินบ่อถืกป่อง
    ให้กลับอีสานเถาะน้อง.....เซามีแฮงแล้วจั่งค่อยไป


    ๒๐ ตุลาคม ๒๕๕๓

  2. #2
    ศิลปิน นักแต่งผญา สัญลักษณ์ของ หญ้านาง
    วันที่สมัคร
    Jul 2009
    กระทู้
    619
    สาวอีสานไกลบ้าน
    สถานเทียวทางไต่
    ไปกะไปแต่โตน้อง
    ใจยังข้องถิ่นสถาน
    มาทำงานต่างบ้าน
    เวียกการกะอิดเมื่อย
    ตกยามแลงคึดเรื่อยๆ
    อยากเมือบ้านบ่อนนอน
    จิตอาวรณ์อาวป้า
    ทางลุงอากับน้าปู่
    อยู่ทางได๋บ่คือบ้าน
    อีสานเค้าเก่าเดิม
    .....เนาะจ้า อ้ายจ่อย

  3. #3
    แบ่งปันความรู้และประสบการณ์ สัญลักษณ์ของ ม๋าน่อย
    วันที่สมัคร
    Feb 2010
    ที่อยู่
    มุกดาหาร
    กระทู้
    379
    บล็อก
    2
    อยากสิบอกไว้ว่า
    มาทำงานอยู่แดนไกล
    ภายในห้องหัวใจ
    ยังคิดฮอดแต่คำเว่า
    ซุมพ่อแม่ผุเฒ่า
    เพิ่นบอกกล่าวเอิ้นสั่ง
    ฝากความหวังกับอิหล่า
    อย่าเป็นบ้าป่วงไป
    บัดยามเจ้าได้ดีแล้ว
    อย่าลืมโค้งต่าวคืน
    พ่อแม่ผุเฒ่าเพิ่น
    ยังยืนคอยทางเจ้า
    น้องหล่าฟังคำเว่า
    จดจำเอาบ่อใหวหวั่น
    ยามเฮ็ดเวียกเฮ็ดงาน
    กะนับคืนนับวัน
    คอยทางเมือบ้าน
    ลมหนาวกายสะท้าน
    แฮ่งคึดฮอดผุเพิ่นคอย...
    ซั่นแหลว

  4. #4
    ท่องเวบ สัญลักษณ์ของ pui.lab
    วันที่สมัคร
    Jul 2006
    ที่อยู่
    โสดไม่มีใครเอา หรือว่าเราไม่เอาใคร
    กระทู้
    8,954
    บล็อก
    9
    ถึงจะพลัดถิ่นฐานบ้านเกิด แต่หัวใจก็ยังอยู่บ้านพ่นเด้ออ้ายเอ๊ย อิ อิ
    มีพ่อ มีแม่ มีพี่น้อง ที่ยังคอยอยู่ ชีวิตต้องสู้ยอมจำทน เพราะความจน
    ต้องดิ้นรนทำงานแดนไกลจ้า
    :l-:l-
    บ้านมหาดอทคอม เว็บไซต์ส่งเสริม ศิลปะ วัฒนธรรมไทย ศิลปิน ความรู้ออนไลน์
    st1: มิตรภาพและรอยยิ้ม กับดีเจคนไกลบ้าน st1:

  5. #5
    ศิลปิน นักแต่งผญา สัญลักษณ์ของ พลายแก้ว
    วันที่สมัคร
    Dec 2008
    กระทู้
    630
    สาวอิสานจำพราก เจียระจากเฮือนนอน
    จรลีหนีหาย ห่างฮามเฮือนเย้า
    เข้าสู่กรุงไกลกว้าง เมืองหลวงกว้างใหญ่
    จำจากไกลไลลา จากท่งนาที่เคยท่อง
    หวังสมปองแนวฝันไว้ พอได้ไกลไล่จนห่าง
    ฝางเส้นทางที่หวังไว้ วิไลเลิศเหลื่อมลอย
    คอยดุ๋ดันบากบั่นสู้ บุ๋บืนคนละอย่าง
    วิถีทางการต่อสู้ สุดแท้แล้วแต่ใจ
    ดวงชะตากำหนดไว้ เส้นทางไต่พรหมลิขิต
    มนุษย์เฮาทุกชีวิต เลือกเกิดเองบ่มีได้
    ความฝันไฝ่ต่างสืบสร้าง พร้อมความหวังทางสู้ต่อ
    อดสาทนบ่ย่นย้อ เอาใจสู้แข่งประชัน
    แต่..กะยังคิดฮอดบ้าน แดนอิสานบ้านเกิดเก่า
    หม่องเคยเนาว์นอนหนุน อบอุ่นใจคลายกลุ้ม
    คิดฮอดซุมพ่อลุงแม่ป้า อาวอาเทิ่งน้าบ่าว
    สาวส่ำน้อยคอยบ่าวแวง ยามมื้อแลงแงงทางเยิ้น
    เขาสิเดินมาแล้ว แซวขวยเขินสะเทินอาย
    กะสุขใจทุกๆครา นั่งหลับตากะหลงยิ้ม....


    มาแจมนำขอรับ อ้ายทิด...บ่ทันกรองซ้ำ ฟ้าวไปเฮ็ดงาน บ่ม่วนกะขออภัยเด้อขอรับ 55555
    แก้ไขครั้งสุดท้ายโดย พลายแก้ว; 24-10-2010 at 09:02.

  6. #6
    ศึกษาหาความรู้ สัญลักษณ์ของ ข้าวต้มมัด
    วันที่สมัคร
    Aug 2010
    กระทู้
    986

    จากใจสาวอีสานพลัดถิ่น

    สิตอบต้านขานต่อพี่ชาย บาคานเอ้ยมาฟังนางเว้า
    มันโหลดเหงาหัวใจ สาวอีสานพลัดถิ่น
    ไกลจากดินถิ่นตั้ง ความหลังนั้นแมนบ่ลืม
    อยากกลับมาผืนแผ่นดินก้ำ ความเก่าคราวหลัง
    หม่องเพิ่นฝังสายแห่ แลเห็นความก่อนกี้
    อันว่าตัวสาวหล่านี้ มีหลายความได้คิดฮ่ำ
    วัฒนธรรมก่อนพุ้น โบราณคุ้นพุทธรรม
    ปฏิบัติธรรมงามเลิศล้ำ ความงามเหลือจะเอ้ย
    สุขไหนเลยจะเท่า เหมือนคำเข่าแม่ป้อนมา
    มีพ่อลุงแม่ป้า อาอาวน้องพี่
    มาเยียมอยูวี่วี่ บ่ได้มีมื่เว้น ใจมันเต้นได้พบกัน
    คำรำพรรณสุขล้วน อยากสิหวนมาอยู่
    มาเป็นผู้เฮ็ดสร้าง แปลงบ้านฮุงเมือง นั้นแล้วพี่เอ้ย

  7. #7
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,949
    อ้ายเอ๋ยนางต้องพลัดพากบ้าน จากอีสานหนีไกลถิ่น

    ไกลแผ่นดินอยู่ซีกโลก ได้ลาล้างฮ่างสถาน

    มาเฮ็ดงานหาเงินได้ เอาส่งไปให้พ่อแม่

    เพินก็แก่สมควรแล้ว เลยอยากให้เพินซำบาย

    น้องหนีมาก็บอได้ สุขซำบายดอกหล่ะพี่

    อุกชีวีแทบเป็นบ้า บอลืมได้ดอกพี่เอ้ย

    ของที่เคยเก็บกินนั่น หมากตำยานกินจิ้มป่น

    ผักกระโดนยอดอ้วยซ้วย ยังเคยต้วยปลาแดกบอง

    อันว่าโตดอกของน้อง คิดแล้วหมองหัวใจหม่น

    ย้อนความจนนี่หล่ะเจ้า เปิดความเว้าผัดแฮงเห็น

    ย้อนจำเป็นจังไกลบ้าน แลนหางานมาไกลถิ่น

    ขี่เครื่องบินสุดขอบโลก ลาแล้วถิ่นอีสาน

    มาเฮ็ดงานเก็บเงินท่อน อด สาก่อนสิคืนกลับ

    นับวันเดือนสิเลือนลับ อยากกลับไปไวไวแท้

    คิดฮอดแม่คิดฮอดบ้าน ทางอีสานแท้หล่ะพี่

    ในใจนางสุมื่อนี่ บอ มีได้ว่าสิลืม ดอก อ้ายเอ้ย
    แก้ไขครั้งสุดท้ายโดย chudhancock; 26-10-2010 at 06:26.

  8. #8
    ร่วมถ่ายทอดความรู้สู่สังคม สัญลักษณ์ของ ทิดจ่อย
    วันที่สมัคร
    Apr 2009
    กระทู้
    773
    กะย้อนความคิดฮอดพี่น้องผุไกลถิ่นดินอีสาน
    ไปทำงานอยู่เมืองไกล เป็นห่วงหลายจั่งจาเว้า
    เช้าและแลงยามกินข้าว แนมหลบคืนก้ำบ้านเก่า
    คิดถึงพ่อแม่เค้า ปานนี้อยู่จั่งใด๋
    ผู้อยู่ไกลคันแม่นมีสุขแล้ว แนวสิห่วงกะเบาบาง
    ขอให้ทางสองเขือให้ห่วงโตเองบ้าง
    อย่าสิทำการสร้างหนักหลายสิไข้ป่วย
    ขออวยพรพ่อแม่เจ้า ทุกแลงเซ้าให้อยู่ดี

  9. #9
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,949
    จำใจจากพรากแล้ว จั่งงนกแซวพลัดพรากคู่
    จั่งขูลูพรากจากอั้ว ต้องมัวม้างดอกห่างลัย
    ต้องจำใจอาลัยเศร้า ฮอดถึงคราวต้องลาห่าง
    หาหนทางหาเงินใช้ พอบอได้ดอกทุกจน
    เทิงหลูตนพ่อแม่เจ้า นับมื่อเลาก็เฒ่าแก่
    มีทางเดี๋ยวพอซ่อยแก้ ให้ดีได้ดอกกว่าเดิม
    แลนมาหาเอาเงินเพิ่ม เสริมครอบครัวพ่อกับแม่
    ทางหัวใจแมนสิแย้ บอยอมแพ้สิสู้ทน
    จากมาดนก็ต้องสู้ อดส่าอยู่พอทนไหว
    คิดซ่ำได๋สิอดเอา ทางบ้านเฮาบอลืมเด้อ
    คิดเสมอบอลืมนั่น แดนอีสานบ้านเคยอยู่
    อ่อมกระปู อ่อมเขียดโม่ อยากกินแท้แมนบอลืม
    ยามมื่อได๋ฟ้ามืดครึ้ม น้องนอนซึมมันว้าเว่
    คิดฮอดเด้ คิดฮอดบ้าน อีสานนั่นอยู่บอเซา อ้ายเอ้ย

  10. #10
    ร่วมถ่ายทอดความรู้สู่สังคม
    ช่างภาพอิสระ
    สัญลักษณ์ของ ดอกมันปลา
    วันที่สมัคร
    Sep 2008
    ที่อยู่
    Roi Et City
    กระทู้
    296
    ยากมามาแชมเปิลนำยุ แต่ตอนนี้ยากเกี่ยวข้าวลม คึดหยังยังบ่ออกยุ
    เดี๋ยวจั่งสิมาจาต้านนำเด้อ ไปเกี่ยวข้าวต่อก่อน อิอิ

หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •