เฝ้าเถียงนาจอบปลา (อี่หลี่)

[ข้าวต้มมัด]

บัดนี้นางสิพรรณาสิ้น ดินดำน้ำซุ๋ม พี่น้องเอ้ย
พอให้ซุ่มพวกหมู่เจ้า คนไกลบ้านได้อ่านนำ
ตอนนางกลับไปบ้าน ได้พิจารณาอ่านบทกลอน

เหลียวเบิ่งปลาจอบบ้อน ในหนองสา เป็นบุ้น บุ่น
น้ำกะขุ่นปลาแฮ่งซ้อง ได้แต่จ้องอยู่เถียงนา
สิลงจับกะบ่กล้า บ่เคยหามาแต่ก่อน
เลยบ่แล้ว หย้อนได้ ไปชื่อเขากิน
ใจถวิลตั้งแต่กี้ มีคุณพี่จับปลาให้
ใส่เทิ่งลี่ใส่เทิงไชย ได้ปลาหลายจนเต็มข่อง
บัดนี้โตของน้อง คิดนำหลายโตอ้ายบ่าว
คิดเห็นอ้ายสิต่าว มาย่างคันนายุแถวนี้
มีบ่ตี้บ้านมหานี้ มีผุได๋สิจอบส่อง
อยากสิลองจับปลาให้ สาวหล่าได้ต้มกิน

ผักตำนินอยู่ข้างฮั้ว หมากบวบถั่วเทิ่งผักไส่
มีหัวข่า หัวตะไคร้ หัวสิงไคใบอีตู่
นางนี้ย่างดู๋แล้ว แถวแถวนี้ อยู่ในสวนข้างสระน้ำ
มีทั้งมวลต้นกล้วย ต้นหมากหุ่งเป็น แถ๊ว แถว
มีพักแพรว สระแหน่ มีต้นแคดอกเต็มพุ้น
มีเถาวัลย์หมากอื๋อน้อย ตัวข่อยเก็บบ่ไหว
ตอนนี้สิขอลาไล ไปเก็บหมากพริกน้อย
เก็บไปออยอี่แม่หล่า เพิ่นคอยท่าเบิ่ง ก่อนหน้า







ผักตำนิน(ผักตำลึง) ผักไส่(มะระขี้นก ผลเล็กๆ) หัวสิงไค(กระชาย) หมากอื๋อ(ผักทอง)

[wundee2513]

... มาตอนไหน ก็ไม่ธรรมดาเลยนะครับ อันผญานี้...สุดยอดครับ.

[สาวทองแพง]

ม่วนสุกลอนเลยน้อจ้า ผญาเอื้อยข้าวต้มมัด
เอิ่นบ่คือกันน้อจ้า ทางบ้านแพง หัวสิงไค (ตะไคร้) พะนะจ้า

[Baimon]

เอื้อนยู่ยี่สบายดีบ่จ้า นู๋เองจ้า นี่ให้ตุ๊กตาเอื้อย
เอื้อยือแต่งเก่งแท้จ้าแต่งให้น้องงนำแนจ้า (อิๆๆๆๆๆๆๆ)

[ตรี ศรีเมืองใหม่]

ตามน้องใบม่อน(ไอดิน)เข้ามาฟังกลอนผย๋าม่วนๆของน้องข้าวต้มมัด แต่งได้เยี่ยมยอดมาก อ่านแล้วคิดฮอดบ้าน คิดฮอดคนแต่งนํา คริๆๆ

[ธีระปลัด]

มาจอบอ่าน มวนครับ "เหลียวเบิ่งปลาจอบบ้อน ในหนองสา เป็นบุ้น บุ่น" ปลาคือสิโตใหญ๋น้อครับ

[หนุ่มน้อย]

สงสารเด้น้อหล่านั่งเถียงนาอยู่โจ่โข่ มัวแต่คึดอ่าวโอ้คราวพุ้นแต่เก่าหลัง เป็นตาซังเด้น้ออ้ายผู้จากไปบ่อกลับต่าว เผิ่นบ่อส่งข่าวให้นางหล้าผู้นั่งคอย แหน่บ้อน้อ หรือว่าเผิ่นไปพ้อคนใหม่อยู่ทางได๋ คือมาไลลานางห่างเหินมาลาร้าง เฮ็ดให้หัวใจหล้าคำนางอยู่ว่างเปล่า นางกะโอ๋อ่าวโอ้คอยท่าละหว่างเว
เอาจังซี่น้องหล้าอ้ายสิขันอาสามาหาปลาสิได้บ่อ รูปบ่อหล่อคือบักอ้ายพอสิได้อยู่บ้อนาง โตบางๆดำปี้ตากะตี่ผมกะยาว ยามผู้สาวได๋เห็นกะหลีกหนีไกลฮ้าง อ้ายบ่อเอาดอกค่าจ้างสิหาปูปลาในนาไฮ่ ทั้งผลหมากรากไม้มาให้เจ้าได้ต้มแกง ขอคำแพงน้องหล้ามีวาจามาเว้าต่อ อ้ายนี้คึดอยากพ้อพระนางน้องอยู่สู่เว้น แท้เด้นา

[บ่าวโจ่โล่]

มาส่องเบิ่ง ผญา แม่นางข้าวต้มมัด พะน๊า พะนะ ชื่อคนกะดาย

ได้รับความนิยม อย่างรุนแรง น้อ จกท (เจ้าของกระทู้) นี้ออกโต แรงงงงงงงง

ต้องขอติดตามผลงาน ไปเรื่อย ๆ เด้อครับ

ฝากเนื้อ ฝากหนังนำแน่ครับ

ผลงานระดับ 5 ดาว คัก ๆ เนาะครับ

[ข้าวต้มมัด]

ขอขอบคุณ ณ ที่นี้ทุกเสียงสาย บรรยายตอบ
ชอบบ่ชอบให้ติดตาม ผลงานด้านการประพันธ์
นางได้กลั่นออกจากใจ ทบทวนหลายก่อนสิผ่าน
เจรจาผญ๋าต้าน เหลี่ยมล้อต่อจะของ
อันว่าตัวน้องหล่า เว้าผญ๋าพาให้มวน
จ่ายสำนวนให้สอดคล้อง พอพี่น้องได้จ่องนำ
คำเขียนได๋ที่ล่วงล้ำ ก่ำเกินต่อคนได๋
นางขอให้อภัย ขอโทษหลาย ณ ที่นี้
คันว่าตัวสาวหล่านี้ เจรจาว่าบ่ม่วน
ชวนให้พวกพี่น้อง สับสนนั้นขออภัย อีกเทื่อเด้อค่ะ

[ข้าวต้มมัด]

เดือนสิบเอ็ดหัวลมค้อย ลมหนาววอยพัดวี่วี่
สายลมตีต้นเข่า กำลังท้องสิออกฮวง
น้ำเคยล่วงผัสมาพร่อง ปลาเคยบ้อนบืนน้ำใหม่
ปลาคอใหญ่ ขาว เข่ง ซิว ซ่อนบอนขี้ตม
แม่เพิ่นงมจับมาได้ ได้ปปลาหลายจนล้นปรี
บอกว่าคิดฮอดนิ นางน้องผุอยู่ไกล
ฟังแล้วอยากนั่งไห้ คิดแล้วแก้วสงสาร
ปฏิบัติการบ่จบสิ้น คือดั่งกรรมเวร
เห็นเป็นวัฏจักร บ่อาจยืนยาวได้
ทางเป็นไปของสัตว์โลก ต่างกะโศกโศกา
อุปมาคือเว้า ปลาเจ้าสิเน่าใน
บ่อมีคนจับไป กะสิตายถิ่มสื่อๆ
บางเทือคือบุญเจ้า มีคนเอาไปต้มกิน
วาสนายังบ่สิ้น เว้าถึงถิ่นสิไปเกิด
หากได้เกิดเป็นโภคา ผู้ทรงศิลแมนดีล้น
แมนสิรวยหรือจน บุญกุศลยังได้อยู่
เป็นของกินคนบ่อฮู้ กินแล้วผัสแห่งลืม สั่นแล้ว





โอกาสต่อไปสิลงให้อ่านต่อจากบทนี้ อุปมาวาสนาปลาคอแก้ว ค่ะ น่าติดตาม