เมนูแก้หนาว กับ ผัดเผ็ดนกเจ่า ครัวเซียงเหมี่ยง...

[เซียงเหมี่ยงเมืองสุรินทร์]

สวัสดีครับพี่น้องบ้านมหา ครัวเซียงเหมี่ยง ห่างหายจากครัวบ้านมหาพอสมควร แบบว่าช่วงนี้บ่ค่อยมีเวลาเฮ็ดกับข้าวปานได๋ งานการบ่เอื้ออำนวยส่วนหลายเป็นการสั่งกับข้าวมากินอยู่บ้านพัก แล้ว กะเสริมด้วยอาหารง่าย ๆ อย่างเจียวไข่ ทอดปลาทู ทอดเนื้อ ทอดหมู ตำน้ำพริก กะว่ากันไปเลยบ่ได้เอามานำเสนอครับ...
มื่อนี้มีโอกาสเข้าครัว นำเสนอ ผัดเผ็ดนก ครับ พอดีลูกน้องกลับชัยนาทช่วงพักเบรค กะเลยหายิงนกมาได้หลายเติบ กะมีนกเขาเกือบสิบตัว นกเจ่า (นกกระยาง) สามตัว เซียงเหมี่ยงฯ เลยอยากกินผัดเผ็ดนก บ่เคยผัดจักเถื่อ แต่คิดว่าคงบ่มีหยังพิสดาร ตามมาครับ เซียงเหมี่ยงฯ สิพาเข้าครัว ผัดเผ็ดนกเจ่า....
เซียงเหมี่ยงฯ แบ่งผัดแค่สองตัว เพราะว่ากินกันแค่สี่คน ผัดทั้งสามคนคงเกินความจำเป็นสำหรับกับข้าวคาบแลง เสียดายของหายาก เอาไว้เฮ็ดกินคาบหน้าแหน่ ฮ่า ๆ ...
นกเผิ่นจัดการเฮ็ดมาจากบ้านแล้วครับ พร้อมเฮ็ดกินได้ทันที...



จัดการสับแยกชิ้นส่วนครับ เซียงเหมี่ยงฯ มักแบบเป็นต่อนน้อย ๆ หลายกว่าการสับละเอียด ครับ สับเป็นชิ้นน้อย ๆ เพราะจากการสัมผัสกระดูกนกน่าจะกรอบผัดเสร็จคงกรุบ ๆ ได้รสชาดกว่าผัดนกสับ...



เครื่องปรุงครับ กะเครื่องปรุงผัดเผ็ดทั่วไปล่ะครับ มีพริกแกงเผ็ด กระชาย ใบกะเพรา พริกไทยอ่อน บักเขือพวง และ ลูกดีปลี เซียงเหมี่ยงฯ ลืมใบ บักกรูดครับ ฮ่า ๆ ...







ขั้นตอนครับ ตั้งกะทะ ใส่น้ำมันพืชนิดหน่อย ทุบกระเทียมเจียวไฟอ่อน ๆ ใส่ พริกแกง ผัดให้หอม จามไปสามบ้านพู้นล่ะครับจั่งได้ที่ ฮ่า ๆ ...



จากนั้นใส่เนื้อนกลงไปผัดครับ ผัดไปสักพักปรุงรสด้วยเครื่องปรุง น้ำมันหอย ซอสฝาเขียว น้ำปลา น้ำตาลทรายนิดหน่อย ซีอิ้วขาว ไผมักผงนัวกะใส่เอาครับ แต่ว่าเซียงเหมี่ยงฯ บ่ใส่ ครัวเซียงเหมี่ยง No MSG กะพอกินได้อยู่...



ผัดเนื้อนกให้สุกแล้วจั่งใส่บักเขือพวง กับดีปลี ลงไปก่อนครับ เพราะว่าสุกยากกว่าผักอย่างอื่น



ตามด้วย กระชาย กับ พริกไทยอ่อนครับ ที่จริงต้องมีใบบักกรูดฉีก แต่ว่าเซียงเหมี่ยงฯ
ลืม เฮ็ดแล้วจั่งนึกได้ครับ ฮ่า ๆ ...



ชิมรสพอได้ที่แล้ว ใส่กะเพราลงไป ปิดไฟผัดต่อนิดหน่อยเป็นอันเสร็จ...



ผัดเสร็จตักใส่จานแล้วหน้าตาเป็นแบบนี้ครับ กับข้าวกะได้ กับแกล้มกะไหวอยู่ครับ ถ้าเป็นกับแกล้มกะลดความจัดจ้านลงมาจักหน่อย เซียงเหมี่ยงฯ เฮ็ดเป็นกับเข้าเน้นเข้มข้อนหน่อยหนึ่ง กินแล้วได้รสชาดเผ็ด และ ฮ้อนของกระชาย พริกไทย และ ดีปลี แก้หนาวดีอยู่ครับ เซิญแซบนำกัน...



ขอได้รับความขอบคุณจากครัวเซียงเหมี่ยง เมนูต่อไปเป็น นกเขาเด้อครับ ขอคิดก่อนว่าสิเฮ็ดแนวได๋มานำเสนอพี่น้องครับผม...

[Boom69]

ป๊าดดดดดดดดดดด ของดีตั๊วนี่....มาชิมผู้แรกเด้อจ้า พ่อออมสิน
สุดยอดอาหารป่า จ้าแซ่บๆๆๆ

[ชัย หมอแคน]

โอย.... ทรมานใจหลาย น้ำลายแตกซวด ๆ เป็นตาแก้หนาวได้อยู่คับ แต่ถ้ามีดีกรีแถมนำ คึดว่าได้ถอดเสื้อวี คับ...

[สาวทองแพง]

มาให้กำลังใจซื่อๆดอกจ้าอ้ายเซียงเหมี่ยง
แพงบ่กล้าชิมนำดอกจ้าย้านหมดก่อนอ้ายๆได้กินแลง 555
:l-ตะแซบน้อจ้าผัดเผ็ดนก
ปล. เมนูต่อไปลาบนกเขาเด้อจ้าอ้ายเซียง คือสิแซบจ้า แต่กะระวังขะเจ้ามาไหมนำจ้า
เพราะว่านกเขา ไม่ใช่นกเรา ฮ่าๆๆๆ

[kitty]

บ่เคยกินจักเทือ คือเป็นตาแซบแท้ สิไปหากินแถว บุรีรัมย์ มีบ่น้อวันเสาร์นี่แหละค่ะ

[บ่าวจัย]

กับแกล้มชั่นยอดเลยครับอ้ายเซียง สิผัดกินคือกันละผัดแฮ้งโตที่อ้ายดุลย์เว้าให้นี้ล่ะฮ่าๆๆๆๆๆๆ

[ติ๋ม เปอร์โย]

ของป่ากินเป็นแต่เห็ดระโงก ผักหวาน ไข่มดแดงหั่นหละ น้องเซียงเอ้ยเอื้อยกะดาย แซบบ่หล่า....

[กำพร้าผีน้อย]

เป็นตะแซบแท่.แนวมักอ้ายตั๊วนี่เซียงเหมี่ยง.

อยู่ปั้มมีแฮ้งอยู่โตนึงว่าสิผัดให้บ่าวจัยกินอยู่ พอดีเลยเอาสูตรนี่หละไปเฮ็ด..55

[บ่าวข้าวจี่]

อ้างถึง..พ่อใหญ่แมว..
เป็นตะแซบแท่.แนวมักอ้ายตั๊วนี่เซียงเหมี่ยง.

อยู่ปั้มมีแฮ้งอยู่โตนึงว่าสิผัดให้บ่าวจัยกินอยู่ พอดีเลยเอาสูตรนี่หละไปเฮ็ด..55

หืยสิผัดฮอด..แฮ้ง พุ่นติ..55555

[เซียงสีผีเป้า]

สุดยอดเลยครับอ้าย เป็นตาออกฮ้อนท้องหย่าวหยี่วแท้น้อครับ

เมนุนกเขา ต้องลาบครับ ลาบนกเขาใส่ก้านกล้วย ( นกเขามันโตน่อย เอาก้านกล้วยมาฟักใส่มันจั่งได้หลาย อิอิอิ)

ขอบคุณครับ