.................หอบหัวใจไปหนุนตักแม่...............................

[บ่าวโจ่โล่]

........................................................................................................................................................
หอบหัวใจเศร้า เศร้า กลับเมือนอนหนุนตักแม่
เจ็บคักหลายแท้ แท้ ผู้สาวถิ่มอิแม่เอ๊ย
เขาเมินเชยลูกชายเจ้า ลูกขอเซานำตักแม่
ย่อนหัวใจเป็นแผล ผมผิดหวังรักร้าว.....................ปวดเจ้า เจ้า เมื่อยแฮง
ผมแสวงหารักแท้ นอกจากแม่ บ่มีไผ
ผ้อแต่คนหลายใจ เผิ่นฮักชายไว้หมายเลือก
อยากปอกเปลือกหัวใจได้ คือผ่าในบักบกเบิ่ง
ผมนี้อยากฮู้เถิง ว่าเม็ดในหัวใจนั้น......................มีสองแง่งหรือเม็ดเดียว
หมดทางเทียวน้อแม่ ใจเป็นแผล หน้าแห้งเหี่ยว
ขอบูชารักเดียว กราบแทบเท้าของแม่................. ลูกขอแพ้แล้วรักลวง
..............................................................................................................................................มั่วมาให้หมู่อ่านซื่อ ๆ ดอกครับ วิจารย์กันเอาโลด

[พอกะเทิน]

โอ้ยอ้ายซายข่อย แม่นเขียนใส่ไผน่อ หุๆๆๆๆๆๆๆ คือแทงใจดำหลายคนแท้ครับ

หอบหัวใจแพ้(แว้)เมือหาอีแม่เบิงกะน้า เผื่อเพิ่นมียาดีที่ซอยซูให้แข็งกล้า
คาเทือมีมื่อหน้ามีคนมาตั๋วลูกซายแม่ ผู้เพิ่นรอรักแท้สิได้แก้เกมรักทัน ซั่นดอก

โอ้ยหละพยายามแต่งค้ากคักดอก หังเบิดความสามารถอีหลีครับ(ซุมหัวขี้เหมี่ยง)

[บ่าววี]

อ่านบทกลอนแล้วกะเป็นตาเหลือตนเนาะครับ ปานเจ้าของบัดนิ

[สาวอิสานพลัดถิ่น]

..เมื่อกินนํ้าตา จึงรู้ค่าของคําเตือนแม่..เชื่อในรักแท้ ฝืนคําแม่หนีตามอ้ายมา..
ยอมกินก้อนเกลือ เพราะเชื่อในคําสัญญา.. ผิดหวังให้รักนําพา.. ผลออกมานํ้าตาไหลริน..

..หนีแม่มาแพ้รัก.. เขียนกลอนบ่เป็งค่าอ้่าย มาร้องเพลงให้ฟัง..

[ทองคำ]

นั่นล่ะ " บาดหนูกัดผ้าจั่งคิดเห็นคุณแมว ลูกแขนแอวจั่งคิดเห็นคุณพ่อแม่"
อ้ายบ่าวโจ่โล่ เจ้าช่างเว้า ว่าผู้สาวเขาป๋ะปล่อย นออ้าย
จนได้หอบใจล่ะห้อย คืนบ้านหาแม่เฮา
หยุดเสียใจสาเด้อเจ้า แม่ของเฮายังมีอยู่
ซาว่าหมู่ผู้ญิงนี่ บ่อได้มีตั้งแต่เขา เดียวนา
แม่เฮาถ่าอยู่บ้าน เพิ่นนั้นยังค่อยแพง เฮานา
หมู่ผู้ญิงถึงสิแกล้ง ถิ่มปล่อยกะค่อยตาม เถาะนา
ส่ำน้ำตาอย่าเสียให้ ญิงใจเลี้ยวให้เปลี่ยวใจ อ้ายเอย
มันบ่ตายดอกส่ำนี่ บ่อนานที่หาเอาไหม่
ให้มันดีกว่านั้น ประสาแท้ส่ำแม่ญิง
...........คุณสตรีอย่าเคียดเด้อ คันบ่อถืกกะของนั่น........