กำลังแสดงผล 1 ถึง 10 จากทั้งหมด 10

หัวข้อ: เสียงซอสะกดใจ (เสียงซอรำพัน 3)

  1. #1
    ศึกษาหาความรู้ สัญลักษณ์ของ ข้าวต้มมัด
    วันที่สมัคร
    Aug 2010
    กระทู้
    986

    เสียงซอสะกดใจ (เสียงซอรำพัน 3)

    อ้อน อีอี่ออ อ๋อ อ้อน ออนซอนหลายเสียงซอเศร้า
    ฟังเหงาเหงาเข้าเพลงม่วน โหยหวนหั่น จั่นจ้าวใส่เพลง
    ได้บรรเลงขึ้นแล้ว แว่ววอนในภาษา
    ฝากตามสายลมมา ส่งไปหาไทพี่น้อง
    คองสีซอบาดใจ ชายหลงไหลใจปั่นป่วน
    หวลอยากเห็นฮอดหน้า สิเป็นบ้านำคนสี แน่ถ่อน
    มนต์ดนตรีให้มาต้อง หูทั้งสองจ่องอยากเบิ่ง
    หลงระเริงเสียงออดอ้อน สีซอซ้อนได้ส่งมา
    ให้เสียงซอของผุข้า ดั่งคาถาคือเพิ่นว่า
    มีคนได้ป่วงหา ฟังวาจาวจีน้อง สีซอคล่องอ่อนหวาน
    ยามได้ฟังซอแล้ว ให้อยากแอ่วขยับหา
    ให้หลงไหลในภาษา สุดหรรษาดั่งมนต์ต้อง
    ให้เสียงซอของน้อง บาดใจหลายให้ได้ว่า
    มามวนหลายแท้เพลงนี้ สีอีกตี้อ้ายอยากฟัง พุ้นแหล่ว







    มาอีกแล้วหนึ่งผลงานค่ะ (เสียงซอรำพัน 3)
    แก้ไขครั้งสุดท้ายโดย ข้าวต้มมัด; 22-11-2010 at 16:47.

  2. #2
    ศิลปิน นักแต่งผญา สัญลักษณ์ของ หญ้านาง
    วันที่สมัคร
    Jul 2009
    กระทู้
    619
    เสียงซอหวานประสานแว่ว
    สำเนียงแนวบอกเป็นห่วง
    ทุกข์ทั้งปวงของอ้าย
    หมายไว้ต่อพะนาง....
    พะนะ
    ยามฮักจางหาทางเลิก
    เศิกหัวใจไผบ่ท่อ
    เสียงซอมาหวานล้วย
    คือคมจ้วยบาดใจ...
    .แท้น้อ
    มาเป็นกำลังใจเด้อจ้าเอื้อยข้าวต้ม

  3. #3
    ศึกษาหาความรู้ สัญลักษณ์ของ ข้าวต้มมัด
    วันที่สมัคร
    Aug 2010
    กระทู้
    986
    ขอบใจหลายเด้อน้องหล่า หญ้านางน้องพี่
    พร้อมอ้ายพีผู้โก้ มาโผล่ให้กำลังใจ
    เอื้อยมักหลายเรื่องซอนั้น รำพันไปคนบ่อ่าน
    แต่บ่อาจต้านทานได้ ในใจพี่นี้มักแฮง
    คันได้แงงเสียงซอแล้ว แมนสิเหงากะยังส่วง
    คันได้จ่วงจักบาด ดนตรีพาสหากแมนดี
    เข้าใจสีดนตรีนั้น สุดหรรษาเอื้อนเอ่ย
    ถ้อยเฉลยเป็นคำร้อง ทำนองก้องดอกม่วนหู นางเอ้ย





    แต่งไว้ตั้งหลายบทแต่คนบ่มักอ่าน (เซาลงดอกจ้า)

  4. #4
    ศิลปิน นักแต่งผญา สัญลักษณ์ของ หญ้านาง
    วันที่สมัคร
    Jul 2009
    กระทู้
    619
    สุรใสเสียงซ้อง
    ซอสายสาดส่ง
    เฮ็ดให้หลงนั่งไห้
    ฮอยฮ่วมฮักระทม
    ฟังเสียงลมตีจ้าว
    สาวนาฟังเสียงวาด
    บาดสิลงลาอ้วย
    ซอสิหล่วยอ่วยน้ำตา
    ...เด้จ้า
    บทผญาสานต้อง
    แทนหูตองค้องใจผ่าน
    ผญาหวานต่อจ้น
    คนพ้อว่าม่วนหลาย
    เสื้อผืนลายสายสร้อยพาด
    กะยังวาดว่าเป็นบ่วง
    คนทังปวงอ่านพ้อ
    บ่หยันหย้อหย่องลง.
    ...ดอกจ้าเอื้อย

  5. #5
    ฝ่ายบริหารระดับสูง สัญลักษณ์ของ ตรี ศรีเมืองใหม่
    วันที่สมัคร
    Apr 2006
    ที่อยู่
    หนุ่มอุบล คนศรีเมืองใหม่
    กระทู้
    4,490
    มาฟังเสียงซอผู้ลังคน ช่วงนี้อ้ายก็งานยุ่ง อยากบอกว่าเหนื่องจังอยากฟังเสียง อิอิ ว่างๆก็โทรมาให้ฟังเสียงแหน่ สั้นดอกหวา
    :welcome3"...ศรีเมืองใหม่แดนธรรมประเสริฐ ถิ่นกำเนิดหลวงปู่มั่น ลือลั่นสวรรค์ภูหล่น ยลสวยหินผานางคอย ลอยล่องแก่งจุการ งามตระหง่านเสาธงวงกลมใหญ่...">>>>> www.muangmai.ob.tc

  6. #6
    แบ่งปันความรู้และประสบการณ์ สัญลักษณ์ของ aobab1980
    วันที่สมัคร
    Oct 2008
    กระทู้
    111
    น้องมาลักอ่าน มาแอบชื่นชมนำได้บ่น้อจ้า แต่งนำเพิ่นบ่เป็นแต่มักๆแมะเอื้อยข้าวต้มมัด อิจฉาเอื้อยมีพรสวรรค์แต่งผญาม่วนๆเด้จ้า น้องขอเป็นกองเชียร์เป็นกำลังใจ และเป็นคนลักอ่านดอกเด้อจ้า :l-

  7. #7
    ศึกษาหาความรู้ สัญลักษณ์ของ ข้าวต้มมัด
    วันที่สมัคร
    Aug 2010
    กระทู้
    986
    ฝากเสียงซอตามลมล่อง เข้าทำนองมาถามข่าว
    นั่งสีซอปวดใจจ้าว ว่าแมนท้าวบ่ต่าวคืน
    วันและคืนเปลี่ยนไป อ้ายไปไสมาน้อพี่
    ว่าแมนไปอัดซีดี มีชื่อเสียงแล้วลืมน้อง ผู้นั่งจ่องท่าข่าวคราว
    ว่าแมนสาวค้องไป นอนหลับไหลบ่ให้ตื่น
    ฝืนเฮ็ดให้ใจอ้าย สับสนได้ไปบ่ลา
    นั่งสีซอรอท่า เทิ่งเถียงนาคือเก่า
    พอมีหมู่จาเว้า เข้าใจน้องน้องหญ้านาง
    ส่งเสียงซอฝากข้าม คิดฮอดหลายคือเก่า
    คันอ้ายเว้าจากใจ ได้ยินเสียงแท้แน่นอน อ้ายเอ้ย



    ขอบใจน้องออฟแอ๊บที่มาเป็นกำลังใจจ้า
    จักสิเฮ็ดจั่งได๋ได้ ใจมันมักเสียงซอ
    แต่งให้พอหายกระสัณท์ พอให้มันหม่มมื่อ สั่แหล่วน้องสาวเอ้ย
    แก้ไขครั้งสุดท้ายโดย ข้าวต้มมัด; 25-11-2010 at 13:59.

  8. #8
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,883
    บล็อก
    1
    ฟังเสียงซอสีเศร่า สายลมหนาวกะวีหว่อน
    สังมาคิดออนซอน ใจอาวรณ์นำเจ้า คือสิเศร่าแหม่นดั่งกัน
    โตเจ้านั่นคือไกลจากจอระลี ชายผู้เนาว์กรุงศรีหากคิดเห็นอยู่พุ้น
    คือเป็นบุญเฮาหน่อยชายพลอย จึงจำพราก ฝากแต่ใจอ้อนต้อนเทียวมาอ้อน อยู่บ่ลืม

  9. #9
    ศึกษาหาความรู้ สัญลักษณ์ของ ข้าวต้มมัด
    วันที่สมัคร
    Aug 2010
    กระทู้
    986
    ออนซอนชายฝากใจต้อน ฝากใจอ้อนมาถามข่าว
    หนาวในในหน่วงเนื้อ เมื่อโตน้องได้สีซอ
    ส่งเสียงซอยามมันเศร้า สีซอเหงาให้มันส่วง
    จ่วงซอเศร้าเข้าช่วง ไล่บรรเลง
    ส่งเป็นเพลงออกไป ใจอ้อนออดสี
    บ่าวผุดียุกรุงศรีฯ นางได้ลีไลฮ่าง
    มาอยู่ต่างประเทศ เขตแดนบ้านเพิ่น
    แก้มเปิ่นเวิ่น คิดฮอดบ้าน ทางไทยนี้ยุบ่เซา พี่เอ้ย




    ขอคุณอ้ายพีที่มาแจมจ้า

  10. #10
    ศึกษาหาความรู้ สัญลักษณ์ของ Baimon
    วันที่สมัคร
    Sep 2010
    กระทู้
    45
    :l-ดีค้าเอื้อยต้มมัดม่วนแฮงค้านู๋แต่งนำเอื้อยบ่เป็นดอกค้า แต่งเป็นตะกลอน 8 จ้า ตะนี้กะต้องเป็นอาทิตย์จังแต่งได้ค้า55

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •