กำลังแสดงผล 1 ถึง 7 จากทั้งหมด 7

หัวข้อ: อ้อนอินเตอร์..มาเด้อหล่า

  1. #1
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,991
    บล็อก
    1

    อ้อนอินเตอร์..มาเด้อหล่า

    อาวรณ์เจ้า ผู่นอนเนาว์ไกลถิ่น
    จากแผ่นดินผืนเค้า หนีเข้าไปอยู่เมือง
    นับต่อเนื่อง ได้หลายแดดฝนหนาว
    ตกหว่างคราวดวงดี สิมั่งมีคืนบ้าน
    สาวอีสานหายหน้า หนีนาไปเมืองนอก
    เจ้าเคยบอกกับอ้าย หาเงินได้จั่งสิมา
    นี่กะดนแล้วหล่า หลายปีลาบ่กลับต่าว
    เลยเป็นสาวเซ็กซี่ ซอมไอทีจอบโผล่
    ออกมาโซว์ท่าเข้ม พีเอ็มอ้อนป่อนแต่คอ
    เห็นแต่หน่าพ้อว้อ เว้าจาต่อกันทางคอมฯ
    ดอกกะยอมย้านลืมดง พี่พะวงแต่นำน้อง
    เดือนสิบสองเลยเข้า สายลมหนาวจ้าวเข้าใส่
    ทางเมืองไทยกะแฮ่งวุ่น ในใจขุ่นอยู่บ่เซา
    คืนเดือนหงายอ้ายกะเฝ่า แนมเบิ่งดาวได้จอบส่อง
    คืนมาสาอี่น้อง กลับมาหม่องบ้านเก่าเฮา
    พ่อกะแก่แม่กะเฒ่า คิดเห็นเจ้าแต่ผู่เดียว
    เซาไปเทียวเร่ร่อน รอนแรมแก้มเปิ่นเหวิ่น
    เมืองอิสานยังเจิ้นเทิ่น เจริญขึ่นกั่วแต่หลัง
    อ้ายนี่ใจต่อตั้ง คิดตั้งต่อแต่รอนาง
    ยามฟ้าสางให้เจ้าหวน ด่วนคืนมาเด้อน้อง..มาเด้อน้อง
    แก้ไขครั้งสุดท้ายโดย pcalibration; 12-12-2010 at 11:58.


  2. #2
    ผะหยาอ้ายสุดยอดครับ อ่านไปกะคิดไปนำ

  3. #3
    ใจอาวรณ์อ่านกลอนเศร้า ใจเหงาเหงาคิดฮอดถิ่น
    อีสานดินถิ่นบ้าน อีสานตั้งครั้งเก่าหลัง
    ยังบ่อลืมดอกอ้าย คิดฮอดหลายคือเก่า
    คิดเห็นตั้งแต่เค้า ผู้เฒ่าเพิ่นยุเฮือน
    ได้เอาเดือนดาราจ้า แจ่มจันทรามาเป็นหมู่
    ส่งให้หมู่พวกพี่น้อง ทั้งพี่ป้าหน้าพ่อลุง
    เทคโนโลยี่เจริญรุ่ง จูงใจไขได้ว่า
    ได้เห็นกันแต่หน้า ทางคอมนั้นหากแมนดี
    ส่ำบายดียุบ้อ ได้ถามไถ่ในเวลา
    เพิ่นตอบได้ทันตา บ่ต้องท่าให้มันอยาก
    มันบ่อได้ลำบาก ติดต่อกันคืออย่างก่อน

    เพียงแต่ออน(ไลน์)กะพอแล้ว บางเทื่อแข่ว(ฟัน)ยังบ่แปรง
    ของมันแพงไปหน้า ผู้หาเงินกะหล้าหล่อย
    สิให้ถอ่ยไปอยู่บ้าน การบ่สร้างหากบ่คือ
    แมนสิไกลซุมื่อ กะตั้งต่ออดทนเอา
    ให้เฮาได้เป็นหลัก ผู้พักพิงทางพี้(เมืองไทย)
    โตน้องนี้ตั้งหลักตี้ เริ่มจากหน่อย
    เก็บจากเล็กผสมน้อย พอได้ต้อยซ่อยเมืองไทย พี่เอ้ย
    แก้ไขครั้งสุดท้ายโดย ข้าวต้มมัด; 07-12-2010 at 16:20.

  4. #4
    ศิลปิน นักแต่งเพลง สัญลักษณ์ของ ธีระปลัด
    วันที่สมัคร
    Oct 2009
    กระทู้
    561
    บล็อก
    8
    มวนครับ ใช้คำอ่านแล้วเข้าใจง่าย เห็นภาพครับผม

  5. #5
    Maximum learning
    ศิลปิน นักเขียน
    สัญลักษณ์ของ khonsurin
    วันที่สมัคร
    Apr 2008
    ที่อยู่
    ท่าตูม สุรินทร์
    กระทู้
    9,605
    บล็อก
    197
    อ้ายเอย ความจำเป็นทางบ้าน นางต้องทำงานต่างถิน
    แต่บ่ถิ่มลืมคอน ลืมบ้านดอนดอกหนา
    แต่อีสานแล้งเหลือคณา จึงต้องหางานทำ
    หาเงินส่งมาทางบ้าน มาย้ำเตือนว่าต้องสู้
    ให้โลกรู้ว่าคนอีสานแกร่ง ด้วยเรี่ยวแรงแข็งขัน
    บ่ได้ถิ่มถิ่นอัน เป็นบ้านเกิดเนาว์เฮือน
    จะกลับมาเยือนบ้าน กลับมาเยือนนา
    กลับมาหาอ้าย ที่ใจคิดฮอด
    นางเล่นแต่คอมตลอด ก็เพราะคิดฮอดบ้าน
    ด้วยบ่ฮู้จะเฮ็ดจังได๋ จึงจะหายคึดฮอดเฮือนบ่เซา
    กะได้แต่่ถามข่าวหา ได้แต่ทำตาหลอกแล็ก
    ได้แต่แกรกแกรกแกะคอม คอยถามข่าวทางบ้าน นั่นแล่ว..เด้ออ้าย





    แก้ไขครั้งสุดท้ายโดย khonsurin; 08-12-2010 at 09:47.

  6. #6
    ศิลปินแดนไกล สัญลักษณ์ของ chudhancock
    วันที่สมัคร
    Oct 2008
    ที่อยู่
    cambridge, England
    กระทู้
    1,975
    อ้ายเอ้ย เห็นอ้ายมาจ๋าเว้า บอกน้องต่าวคืนหา
    กลับบ้านนาทางอีสาน ถิ่นฐานที่เคยยั้ง
    พวมหาตั๋งอยู่เด้ออ้าย เฮ็ดงานไปจั๊กปีก่อน
    พ่อแม่พวมเดือดฮ้อน เก็บเงินก้อนก่อนสิเมือ
    แม่บอกเหลือแต่ค่าหนี้ เพินเอาที่ไปจำนอง
    ทางเจ้าของเงินเขา เร่งสิเอาไวไวนี่
    หาบอมีบอทันได้ ให้เห็นใจโตน้องแน
    มาเมืองนอกอยู่บอแพ้ แต่พวมแย้เรื่องเงิน
    อุกเหลือเกินคิดมาแล้ว มีแต่แนวสิต้องจ่าย
    เงินบอหลายที่เฮ็ดได้ แค่พอให้ไว้ซื้อกิน
    เทิ้งหนี้สินอยู่ทางบ้าน ดอกเบี้ยบานปานดอกกุ่ม
    คิดเห็นซุมพ่อแม่นั่น อยู่ทางบ้านสิอดตาย
    เงินจำนาเพินเอาไว้ ก็เบิ๊ดไปแม่บอกว่า
    เงินไถ่นาเอาส่งให้ เพินแบ่งไว้ใช้ซื้อกิน
    มันบอจบมันบอสิ้น อั่นหนี้สินก็เพิ่มตื่ม
    จั๊กสิหยืมนำไผ๋ได้ ส่งไปให้ไถ่ค่านา
    วาสนาเป็นแนวนี่ มันเต็มทีบออยากเอ่ย
    นับไว้เลยโลดอ้าย สามปีได้คงสิเห็น
    คั่นแมนเป็นไปได้ สิกลับไปไวไวอยู่
    แต่ก็ยังบอทันฮู้ น้องคงอยู่ไปอีกนาน
    ใจก็คิดฮอดบ้าน ทางอีสานจนเต็มที่
    บุญเฮามีคงได้พ้อ ให้รอน้องไปก่อนเด้อ อ้ายเอ้ย อิอิอิอิ มาแจมนำหลานพีจ้า
    แก้ไขครั้งสุดท้ายโดย chudhancock; 12-12-2010 at 16:57.

  7. #7
    ม่วนหลายจ้าอ้ายพี นางเข้ามาเป็นกำลังใจให้เด้อจ้า สุดยอดจ้า

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •