เดือนอ้าย หรือเดือนหนึ่ง พี่น้องชาวนา
ต่างเก็บเกี่ยวผลผลิต เก็บขึ้นยุ้ง ขึ้นเล้าเน๊าะค่ะน้องหลินมีโอกาสได้ไป ซ่อย (กิน) งาน
นวดข้าวนาพ่อลุงทางท่งนาห้วยหว้า เลยมีบรรยากาศ มาฝาก เอื้อย อ้ายผู้อยู่ไกลบ้านค่ะ
รถนวดข้าวมานอนอยู่ลานเพิ่นเลยค่ะ ประมาณตี 4 กะตั้งเครื่องสีข้าวแต่เช้ามืด
เพราะว่ามื่อนี่เป็นวันดี แต่ละคนกะต่างอยากเอาข้าวขึ้นเล้ากัน ได้คิวแรกเลยค่ะ
การช่วยเหลือซึ่งกันและกันยังมีให้เห็นอยู่ค่ะ การมาซ่อยแบบบ่ต้องจ้างต้องวาน
แล้วเจ้าของลานกะกลับไปซ่อยตอบ
ส่วนมากงานแบกหามยกหนัก ทางลอมข้าวเป็นหน้าที่ของสุภาพบุรุษค่ะ
แม้แต่แผนกมัดสอบข้าวกะเป็นงานของเพิ่นค่ะ
ส่วนงานของสุภาพสตรีจะอยู่ในครัวค่ะ แม่ครัวเป็นแผนกที่ต้องตื่นแต่เช้ากว่าหมู่ค่ะ
ตื่นมานึ่งข้าว เตรียมกับข้าวเลี้ยงคนที่มาซ่อยเวียก เป็นการแสดงน้ำใจที่ดีต่อกัน
อาหารการกินกะบ่ได้ซื้อดอกค่ะ เป็ดไก่ที่เลี้ยงไว้แต่ยามเดือนหก หั่นล่ะค่ะ
ลานนี้มีต้มเป็ด ลาบเป็ดค่ะ ต้มใส่กะทะทองแดงหม้อใหญ่
"สุมฟืนเร่งไฟเข้า เพิ่นใกล้แล้วล่ะ สิบ่ทันกิน"
ตะเว็นขึ้นงานนวดข้าวกะแล้วค่ะ งานสุดท้ายคือเก็บข้าวปัดลาน สมัยนี้เพิ่นบ่ได้ใช้
ขี้ควายทาลานคือเก่าแล้วค่ะ เลยกลายเป็นข้าวท้อนแหง่งแทน
ข้าวกะพร้อมขึ้นเล้าแล้วค่ะ รถขับเคลื่อนล้อหน้าที่เจ้าของเอามาซ่อยแบบบ่คิดค่าน้ำมัน
งานอยู่ลอมข้าวแล้ว งานในครัวกะแล้วคือกันค่ะ เตรียมหาพาข้าว
มื่อนั่นอากาศเย็นแฮงค่ะ หมอกกะแฮงพร้อม น้องหลินอยู่แผนกจก (ข้าว) ใส่จาน
งานแล้วกะร่วมวงกันกินข้าว เว้านัวหัวม่วน
อั่นนี่กะตื่นมาแต่เช้า แต่บ่ได้ประโยชน์ดอกค่ะ นอกจากกวน
Bookmarks