เฮ็ดจั่งได๋ใจคิดฮอด

**ข้าวต้มมัด** · 19-12-2010, 21:37

เกินสิหักห้ามใจ น้ำตาไหลใจสิโคน เด้น้อ
คิดฮอด ...ค...อน...คน คนคนคน ว่านี้ คิดถึงแท้พ่อแม่เอ้ย
หัวใจเอ้ย.....ปานลมปลิว ใจหวิวหวิวใจสั่นสั่น
บางวันฝันพ้อหน้า ได้จาเว้ายุผุเดียว
เหลียวเบิ่งทางย่างหวังพ้อ โอ้คนน้อ....ล้อให้จ่อย
เฮาคือจั่งบักหอยน้อย ถือคิงไข้กะพองกัน พี่เอ้ย
หนาวกะหนาวสะบั่น ปานหิมะมันสิตก
ในหัวอกสั่นระทวย อ่วยหาคนสิเว้า
เอาหมอนกกหมกกับผ้า พอเห็นหน้าให้หายป่วย
นอนระรวยอว่ยหาหม่อง บัดยามน้องน้อยสินอน ท่อนั้นแหล่ว

**พลายแก้ว** · 20-12-2010, 09:24

เอ๋า..คิดฮอดไผน้อบาดนี้ เอ่ยวจีปานคนป่วย
คิดสิช่วยเพื่อนข่อย สิออยเว้าว่าจั่งได๋
เขาไปใสแล้วละเจ้า มาซงเหงาเอาคักแน่
เป็นตะเฮาแน่แมะ อย่าขี้แยเด้อเพื่อนพ้อง อย่านอนฮ้องฮ่ำไฮ..
อดเอาใจย่อนใหญ่แล้ว คนสิแซวคนสิว่า
เฮากะมาแค่ได้ ปลอบใจเจ้าอย่าเศร้าตรม..เพื่อนเอ้ยย..

**ข้าวต้มมัด** · 20-12-2010, 14:40

ขอบใจหลายเด้อเพื่อน ที่ยังมาปลอบใจ
สิเฉลยกุญแจไข ว่าผุได๋เฮ็ดให้ซ้ำ
ป_รอบ โตหนึ่งมาอำ ทำเฮาจนว่าจ่อย
ว่าสิ คอย..ค๊อย...คอย เห็นใหม่จ้อยผัสแลนนำ
ทำเฮาแสนเจ็บซ้ำ ทั้งโทษนำจะของแน่
ย้อนใจง่ายคักแท้ มันเลยแย่แพ้เจ้าของ
บ่อขอฮ้องฮ่ำไฮ่ อีกต่อไปดอกเด้อหมู่
สิขอสู้แต่งแก้ มันมาแหมะ...สิหน่ำคอ...... ฮ่าๆๆ

**พลายแก้ว** · 20-12-2010, 16:22

ฮ่วย...มาเป็นตะย่านกะด้อ สิหย่ำคอ..ว่านิแมะ
มีปัญหาให้ค่อยแก้ แน่เด้อเพื่อนคำเตือนเฮา
โปรดอภัยให้คะเจ้า อย่าสุเอาแต่ใจโต
สิพาโซเสียหลัก ให้ฮักกันทุกวันมื้อ
อย่าฟ้าวถือคำยามฮ้าย ความบ่เข้าใจเอาไว้ก่อน
อย่าให้ทอนความรักแท้ ใจสิแย่แอระทวย
เอาความรักเป็นตัวช่วย อย่าหลงอ่วยนำโทสา..
กริ้วโกรธาให้ข่มลง ปลงระวางในทางฮ้าย
มีบ่หลายดอกเด้อเจ้า คนที่เฮาคิดว่าแม่น
คำว่าแฟนคือคนใช่ หาบ่ได้ง่ายๆเด้อ..หมู่เอ้ยย..

**ข้าวต้มมัด** · 20-12-2010, 16:51

เพื่อนคำแพงของนางเอ้ย สิเฉลยฉันเว้าเล่น
เฮ็ดบ่เป็นดอกอีหลี่ บ่เคยตีฮอดหมาพร้อม
ฮอมความสูนกะเลยเว้า พอให้เฮานี้ได้ส่วง
บ่ได้ป่วงได้บ้า ปานนั้นดอก หมู่เอ้ย
สิเฉลยความจริง เฮาเป็นหญิงมีคนฮัก
เพิ่นฮักเฮาหลายแท้ ชื้อฮอดบ้านและรถลา
บ่เคยด่าว่าให้ ซ้ำใจได้ไห่ห่ำ
บ่เคยทำเจ็บแม้แต่น้อย บ่อเคยต้อยให้เฮาฮั่ว
เพิ่นฮักแพงแท้ตั่ว พ่อทูนหัวผัวแก้ว
ได้ฮักแล้ว ฮักบ่จางดอก หมู่เอ้ย
อันได้กล่าวได้อ้าง คือกิ๊กใหม่ในบทกลอน
เพิ่นคือตัวละคร เฮ็ดให้ฉันนี้นอนซ้ำ
กรรมเวรมันสิพ้อ พอให้เฮานี้ฮู้ค่า
ว่าเฮามีบุญวาสนา ได้บุตรตาและผัวแก้ว
บ่มีอีกแล้วในโลกา เพื่อนเอ้ย

**หญ้านาง** · 22-12-2010, 12:13

เฮ็ดจั่งได๋ใจคึดฮอด
กอดหม่องได๋ใจบ่อุ่น
คึดฮอดคุณคนนั้น
หนาวสะบั้นสั่นใน
หนาวหัวอกหมกใจหล่า
หนาววาจาเคยถามไถ่
หนาวหัวใจเย็นจ้อย
จนพลอยไห้ใส่แต่หมอน.....พุ้นตริจ้าเอื้อยข้าวต้มฯ นางมาม่วนนำเด้อจ้า

**ข้าวต้มมัด** · 24-12-2010, 20:06

ส่ำบายดีบ่น้อพี่น้อง ข้าวต้มมัดขอถามข่าว
หนาวบ่น้อก้ำฝ่ายพี้ คือทางบ้านข่อยบ่น้อ
วอนลมหนาว ถามข่าวไป ปีใหม่สิมาถึง
ความเคยคึงเคียดแค้น ให้ถิ่มไปในปีเก่า
อันความเหงาความเศร้า อย่าสุเข้าให้ปล่อยวาง
ฝากถามข่าวตามลมไป กระดิ่งได้ดังเหง่งเหง่ง
เสียงเซ่งแซวดังแล้ว เสนาะสำเนียงหวาน
ฝากรักไปจากนงค์คราน ผ่านไปถึงคนอยากพ้อ
นางขออวยพรให้ จงโชคดีมีชัย คิดสิ่งได๋ได้ทุกอย่าง
อายุ วัณโณ สุขขัง พลัง
สมมาถแม้นม๋องมโน เด้อพี่น้องเอ้ย