ย้อนไปเบิ่งวันสมัครสมาชิกของเจ้าของ ป๊าดด ขะน้อยเป็นสมาชิกบ้านมหา มาครบ4ปี เต็มแล้ว ย่างเข้าปีที่5 โอ่ว แมเจ้า ...พลิกไปอ่าน กะทู้เก่าๆอ่านแล้วกะรู้สึกคิดฮอดความหลังเนาะ สมัยมาเล่นบ้านมหาใหม่ๆ พ้อมาหลายรสชาด ทั้งสนุก ทั้งฮ้ายกัน นินทา ตามประสาปุถุชนคนธรรมดา กะป็นอันเข้าใจเนาะ สิ่งแรกที่ประทับใจคือ ความมักในศิลปะอิสาน มักหมอลำ มักเสียงพิณ โดยเฉพาะ มาพ้อ อ้ายศรีสะท้าน ปรมาจารย์ในเรื่องสอย กับผญา บ่าวเต็ง (พ่อน้องพลอย) น้องแป้ง ตอนนี้กะแวะเวียนมาเป็นครั้งคราว บ่าวแปะ ครูโย เจ๊ปุ้ย บ่าวอุบลมิวสิค ตอนนี้เพิ่นเป็นเจ้าของบ้านลำซิ่งแล้ว บ่าวสายฟ้า ดีเจประจำโต เปิดเพลง บ่าวเม้า ดีเจหมอลำมีสุแนว โพสต์เพลงสุกันฟังยามดึกๆ อ้ายเซียงน้อยหนุ่หล่อตลอดกาล ซึ่งความมีไมตรีของอ้ายเซียงบ่ถือซาน้องนุ่ง อันนี้ประทับใจมาตลอด จนพากันเล่นตั้งคณะหมอเล่นพากันหัดลำนำอ้ายศรี ม่วนกุ๊บ ..
เวลาเปลี่ยนไปสมาชิกกะเริ่มหลายขึ้น จากกลุ่มคนน้อยๆกระจายออกเป็นกลุ่มใหญ่ กลุ่มน้อย หลายคนกะเริ่มหลายความคิดเข้ามา จากวิทยุออนไลน์ที่บ่มีดีเจ มีตะจอ ไว้ถ่าพิมพ์ขอเพลง ยามอ้ายบ่าวยุเพิ่นกะเปิดให้ ยามเลาบ่อยู่เครื่องกะเล่นออโต้ ฝากตะข้อความไว้ให้กันอ่าน กะมีความสุขอีกอย่าง
ความรู้สึกเก่าที่ประทับใจในความเป็นกันเอง แบบอิสานบ้านเฮาของเจ้าของบ้าน อ้ายบ่าวคนเดิม ซึ่งแต่ก่อนอ้ายเพิ่นสิแวะเวียนมาเล่น มาหยอกกับสมาชิกเป็นประจำ กะทู้บางกะทู้ที่อ้ายเพิ่นเขียนสะท้อนความเป็นลูกอิสาน (ไปเกียวข้าวรับจ้างนั่นนามักหลาย) เล่นขายของเฮือนน้อย จำได้ ไก่น้อยเป็นคุณนายไปจ่ายตลาด 555+
ตอนนี้บ้านมหากลายเป็นบ้านที่ใหญ่โต สมาชิกร่วมหมื่น แยกออกเป็นบ้านเล็ก บ้านน้อย (บ่แม่นเมียน้อยเด้อ 555+) หลายคนหลั่งไหลเข้ามา แยกออกไปเป็นคุ้มนั่น คุ้มนี้ ศิลปะวัฒธรรมกลายเป็นเรืองการพบปะ นัดสังสรร ซึ่งกะเป็นอีกเสน่ห์หนึ่งของบ้านมหายุคใหม่ ที่สมาชิกมีโอกาสพบปะกัน ไปมาหาสูกัน
แต่ลึกๆแล้วสิ่งที่เป็นบ้านมหาที่แท้จริง การอนุลักษณ์ศิลปะของพ่อของแม่ แบบคนอิสาน
มีการเว่าถึงน้อยลง อาจสิย้อนท่านผู้รู้ ท่านผู้เกิดได้ใหญ่ก่อนเพิ่นติดภาระกิจ หรืออันใดกะตามแต่ ไก่น้อยกะอยากฝากพี่น้องบ้านเฮา ม่วนๆกันแล้วกะอย่าลืม ศิลปะท้องถิ่น ความรู้ดีๆของคนอิสานบ้านเฮา ช่วยกันค้ำจุน อนุลักษณ์ไว้ให้ลูกหลานได้เบิ่งนำเนาะจ้า
ก้าวเข้าบ้านมหาปีที่ 5 แล้วเด้อ บาดนิไก่น้อยกะขอให้บ้านมหา เจริญยิ่งๆขึ้นไป เวบมาสเตอร์มี่เงินจ่ายค่าไฟ ค่าน้ำ รวมทั้งค่าเช่าโฮสต์ให้สุมเฮาม่วนๆตลอดไปจ้า ...อ้าว...เชียร์ :l-
Bookmarks