"]...นางเอ้ย อ้ายนี้คิดฮอดน้อง เช้าค่ำ แลหา
จากกันสองสามวัน กะช่างโดนปานนี้
หรือว่าใจของอ้าย มันโดนคน มาเว้าหลอก
ตั๋วให้ฮักแล้วกะถิ่ม หนีหน้า บ่ให้เห็น
...จักแม่นเวรหยังน้อหล่า ฮักนางหลาย ย้านตายก่อน เด้น้อ
หรือบุญอ้ายบ่มี บ่ได้หอมแก้มหล่า จั่งหนีอ้ายด่วนมา
...ปีใหม่เฮาได้เล่น เกาะเกี่ยว ควงแขน
สองเฮาเดินชมงาน พร้อมเสี่ยงทาย ทำบุญพร้อม
ได้ไปลอง ยิงปืนสั้น อัดลม ลองความแม่น
อ้ายยิงเข้า ถืกเป้า ย้อนใจอ้าย นี้เที่ยงตรง จริงแหล่ว
...ส่วนว่านาง ยิงนั้น จักไป ทางได๋แหน่
หรือว่าใจ น้องหล่า บ่มีมั่น เที่ยงจริง ซั่นบ้อ
...อ้ายนี้หลิงดูน้อง สายตา เฮาเกี้ยวก่าย กันแหล่ว
อ้ายฮักน้อง น้องฮักอ้าย เฮาจาเว้า ต่อกัน
ในมื้อนั้น อ้ายได้ฝาก ของขวัญ
เป็นตุ๊กตา หมาสีทอง ยกให้นาง แทนใจอ้าย
...นางกะบายเอาแล้ว นางเทิงหอม แล้วเทิงกอด
อ้ายดีใจ มากล้น เห็นนางน้อง รับของ
...โอยนางเอ้ย อ้ายมาตรองดูแล้ว คืออิจฉา หมาแท้หน่อ
อยากตายเป็น หมาน้อยน้อย ให้นางน้อง ได้กอดดม ... เบิ่งเด้น้อ....
Bookmarks