บอกใจ..ให้ฮู้แน่..

[พลายแก้ว]

แสนสิคิดอ้ำล่ำ นำนางบ่มีส่วง
เป็นเหงาง่วงป่วงเซ่อ ละเมอเอิ้นโอ่หา
นับแต่มื้อพ้อหน้า ได้เว้าจาผ่านบอร์ด
เทียวคิดฮอดตั้งแต่เธอ อยู่เสมอบ่มีเว้น
มาส่างเป็นไปได้ ใจจมคารมหว่าน
คำหวานๆว่า..คิดฮอด ที่เธอหยอดเอ่ยมา
ให้คิดนำแท้น้อหล่า กับคำจาที่เอิ้อนเอ่ย
อยากสิเผยเปิดแก้ ใจสิแน่จั่งคำ บ่น้อ..
เจ้าผู้น้ำส่างกว้าง ใสจืดกินดี
พี่อยากวนเวียนตัก หากย่านหมื่นเซล้ม
ย่านพ้อขมกลางสวนเจ้า ผักกะเดามาบังเกิด
ย่านแต่เหมิดบั้งน้ำอ้อย หมากนาวน้อยสิปล่อยไป
อยากสิจกเอาไส้ หัวใจนางออกกางแผ่
ว่าสิขมหวานแท้ หรือสิเค็มจางฝาด
พี่อยากปาดออกได้ หัวใจน้องออกหล่ำแยง
ย่านแถลงแปลงคำต้าน กกหวานแต่ปลายจืด
อดสาปืดบอกอ้าย ชายพี่ผู้ฮักจริง แน่ถ่อน
เจ้าสิหลิงล่ำอ้าย ว่าพี่ชายรูปบ่หล่อ
ผู้มาขอขอดหมั่น พันเกี้ยวเกี่ยวมะโน
เจ้าสิบ่โสดาด้วย ดอมซิ้นเงี่ยนกา แน่ฤๅ
เจ้าสิบ่โสดาด้วย ดอมปลาเงี่ยนนาค
บาดว่าปาดต่อนคั่ว บาดว่าคัวต่อนต้ม แกงส้มสิว่านัว..อยู่เด่ะ...

:l-:l-:l-

[ข้าวต้มมัด]

มักสาวได๋อีกละน้อบาดนิเพื่อนเอ้ย เขามาเสยเตยเว้ยปานลมพัดก้อนหินแท้ละน้อปาดนิ แม่นชื่อหยั่งหืออ สิไปเอิ้นมาให้จ้า อิอิ

[พลายแก้ว]

ฮ่าๆๆๆๆ ขอบคุณครับ ข้าวต้มมัด เพื่อนรักที่มาแจม..

บ่ทันมีไผ๋ดอกเจ้า เฮาเว้าล่ายตามประสา
ส่วนดาราโตแสดง แค่แกล้งยกยอเล่น
สมมติเป็นพระเอกบ้าง มาพ้อนางผู้งามหล่ำ
เลยวาทคำถามคะเจ้า สิจาเว้าว่าจั่งได๋
อยากถามไถ่ให้ฮู้แน่ เพิ่นสิแคร์หรือแน่บ่
เพิ่นสิหย่อหย่องคั้น หรือสิต้านว่าหยัง
อยากสิฟังคำเว้า ของผุสาวลองเบิ่ง
ในชั้นเชิงกล่าวแก้ ว่าสิแน่เที่ยงจริง ส่ำได๋
ย่านผู้หญิงมาตัวะต้ม ปั้นคารมมาล่ออ่อย
ตัวะพระเอกน้อยๆ ของข่อยสะหม่อยตาย..บ่น้อ สั่นเด่ะ..

[นู๋น้อย]

ต่อไปบ่เป็น แดวขอเวลาคึดก่อนเด้ออาจารย์ :b-b:b-b

[ดอกมันปลา]

ฮ่วย.....อ้ายบี คันบ่จริงอ้ายอย่าเว้า คันบ่เอาอ้ายอย่าว่า เด้อ
อย่าเฮ็ดคือตอกมัดกล้า ดำนาแล้วเหยียบใส่ตม เด้
เรื่องใจนี่ มันสิหวานหรือส้ม ขมเค็มแซบอร่อย มันสิหวานแซบซ้อย หรือได๋แท้ ว่าบ่เห็น แหล่ว
คันอยากเห็นใจน้อง เอาใจจริงของอ้าย มาเผยให้ฮู้ก่อน ซั่นตั้ว บ่แม่นมาเว้าเล่น หยดอ้อยอ่อยมดแดง เด้อ้าย
แนวผุชายหลายลิ้น คำจามักปลิ้นปลอก หลอกให้หลงเชื่อแล้ว กะป๋าฮ้างหล้ายหนี
ตั๋วสับหลับสี่หลี่ ดีอยู่แต่ยามเห็น ยามเฮาหนีไกลกัน ฮอดบ่มีคำเอื้อ
อย่าเชื่อเด้อชายแนวนี้ หวังกินฟรีแล้วป๋าปล่อย จงระวังแท้แท้ มวลเพื่อนหมู่ผุญิงเฮาเด้อ....

[พลายแก้ว]

อะแฮ่มมมม ...หึยยย ฮ่าๆๆๆๆๆ

ว่าแม่นไผ๋มาจาต้าน ขานคำคมมาถมใส่
บัดได๋แท้น้องหล่า มันปลาเจ้าเอ่ยควม
พวมอกหักสั่นบ้อน้อง ผญาล่องใส่ลายขม
ถืกคารมบ่าวตัวะ เลยเสียหัวสั่นบ้อเจ้า
หรือถืกเขาเว้าล่อ จั่งหน้างอมาใส่พี่
คำตัวะสับหลับลี้ ชายพี่แม่นบ่เคย
เห็นน้องเปรยอยากซ่อยแก้ แต่อ่อนแอประสปการณ์
อ้ายบ่ทันฮู้ตัวะคน กะเลยจนใจเอาฮ้าย
ถามแน่ชายคนๆนั้น รูปพรรณสัณฐานเพิ่น
คนมาเดินเลาะหน้าบ้าน นามขานเอิ้นว่า..ยาวๆ นั้นติหล่า..

อิอิ บอกผิดคนแล้ว หลินเอ้ยยย บอกลังคนพุ้นหล่า 5555

[ดอกมันปลา]

อย่าลามหลายอ้ายบีน้องเว้าแทนผุอื่นเด้อ:l-:l-:l-

[ศรีสะท้าน]

ป๊าด..สังมาคักแท้หล้า คำผญาอันเจ้ากล่าว
ซุมผู้สาวจนนั่งไห้ ไหลย้อยหย่าวน้ำตา
นับประสาผู้ญิงเว้า อย่าไปเอา หูฟังเซื่อ
ยาพิษเบื่อหมู่ง้วน พวนท้องท่าวตาย
คำเว้าหลายสับส้อ ออหลอปากปิ่น
หัวใจหมุนติ้นลิ่น ลวงล่อหากหม่อคำ..แท้แล้ว

[ดอกมันปลา]

ธุจ้าธุจ้าธุจ้า ป้าด... ขอคาระวะท่านนักปราชญ์ใหญ่ของไทเฮือน มหาน้อ
ช่างเป็นบุญเหลือหลาย ที่ได้เจอคำท่าน
คึดบ่เถิง ว่าท่าน อาจารย์ศรี คอยแนมเบิ่ง อยู่ซั่นดอก
พวกลูกเด็กเล็กน้อย พากันแต้มแต่งผญา ใส่กันแหล่ว
อาจารย์ศรี คันคำจา หม่องได๋มันบ่คล้อง บ่คล่องให้คอยติ ให้แหน่เด้อ
ขออาศัยใบบุญ คอบอยากเฮียนเอาไว้
บัดห่าโดนไปหน้า ผญาเฮาขาดคนสืบ
เสียของดีแต่เค้า เสียดายแท้ค่ามัน ซั่นดอก อาจารย์...ธุจ้าธุจ้าธุจ้า

[มะเหมี่ยว]

:l-:l-:l-:l- ป๊าดดดดดดดดดน้องกับอ้ายข่อย ซะมาคารมคมแท่น้อ แม่นเนาะน้องหล่า อันว่าพ่อซายนี่เซือบ่ได้อิหลีเนาะ(แม่นบ่อ้ายบ่าวบี)