ว่าอยากถามข่าวเจ้า โฉมเฉลาศรีสะอาด
งามปานหยาดมาแต่ฟ้า สีหน้ากะผ่องใส
คิดสงสัยอยู่หลายเรื่อง อย่าฟ้าวเคืองเด้อน้องพี่
ถามว่ามีคู่ซ้อน ซอนข้างล่ะไป่นาง
คันเจ้ามีคู่สร้าง เซยซมแซมเสื่อ กะตามถ่อน
คิดสะออนนำแต่เจ้า ใจจ้องจ่องนำ
ต้านต่อคำเบิ่งดู๋หล่า เจรจามาฟังแน่
มีผู้แป๋แขข้าง หรือทางเจ้านั้นเปล่าดาย
บ่าวพี่ชาย..สิขอเฝือแฝงตุ้ม เฮียงนางสิได้บ่
เพราะหลงมักนารถน้อง ประสงค์หล่าแจ่มสมร นี้แหล่ว
พอมาเห็นหน่อแก้ว อยากสิแอ่วโอมเอา
พอได้เนาว์นั่งเฮือน เฮียงพี่ชายภายหน้า
เป็นฝั่งฝาเกลียวฝั้น พันธะนังกกกลิ้งกล่อม
พอได้พันอ้อมล้อม ซอมซ้อนผ่อนหนาว
มื้อเหงาๆ..เฝ้าคิดเห็นตั้งแต่หน้า จับปากกามาปิ้นไป่
เสียงลมไหวทางยอดพร้าว คิดนำเจ้าป่วงละเมอ
จนว่าเผลอจับด้าม ดินสอดำจ้ำกระดาษ
ฟาดเขียนลงแต่ชื่อน้อง เต็มห้องแม่นชื่อนาง
เสียงลมถั่งทางปลายไม้ สงสัยใจยามลมผ่าน
ปานนี้แก้วแก่นหล่า สิลาร้างไปจั่งลม
ที่พัดโหมกระหน่ำหน้า สัททันตาดังหวี่ หวี่
คือเจ้าหนีหน้าอ้าย ชายเคยเว้ามื้อเก่าหลัง...ปลาลืมวัง...เออะเอ่ยยยย น้อ....
Bookmarks