หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 15

หัวข้อ: ท้าวคำสอน นางกองสี

  1. #1
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311

    ท้าวคำสอน นางกองสี

    จากต้นฉบับเดิมจารึกด้วยอักษรธรรมและอักษรลาวเดิม(ไทน้อย)ในใบลาน ถอดความมาพิมพ์เป็นภาษาลาวปัจจุบัน โดยท่าน อาสดาจัน หมื้อลิด What prayortkeo Dhammayanaram AUSTRLIA ศรีสะท้านนำมาถอดอีกเป็นอักษรไทย บางวลีข้อความอาจสิเขียนสะกดแบบไทย บางอันอาจสะกดอย่างลาว ตามแต่เหมาะสมสำหรับการอ่าน และเพื่อความสะดวกสำหรับผู้บ่ถนัดอ่าน แต่การอ่านขอท่านจงพิจารณาพยายามอ่านให้เป็นสำเนียงลาว/อีสานเอาเด้อข้าน้อย เซิญสดับซั้นแล้วหละ


    ยังมี บ้านหนึ่งนั้น นอกเขตธานี
    ประมาณ ซาวหลังเฮือน อยู่ยายยังไว้
    ที่นั้น ยังมีคนพอยไฮ้ ผัวเมียทุกขมอด
    ข้าวขาดหม้อ เกลือก้อนบ่มี
    เขือก็ ขนขวยเลี้ยง ซีวังทุกเซ้าค่ำ คืนแล้ว
    พอสืบ วันและมื้อ บ่พอให้ท่าวตาย
    ตั้งหาก อึดอยากเยื้อน ทุกค่ำวันคืน มากแล้ว
    เฮาบ่ มีทึนหลัง ก็จึ่งเป็นคนไฮ้
    ผัวก็ ไขคำต้าน ถามเมียทุกสิ่ง
    พ่อแม่ เฮาหากทุกข์ เฮ่งฮ้ายเงินแก้วบ่มี แลนอ
    คบว่า เหิงนานได้ หลายปีแถมถ่าย มาแล้ว
    สองก็ ได้ลูกน้อย นงหน้าใหญ่มา
    เขือก็ ทำเพียรเลี้ยง บุตตาลูกอ่อน
    ทุกค่ำเซ้า ถนอมไว้อุ่นทรวง
    แล้วจึ่ง ใส่ซื่อท้าว น้อยอ่อนคำสอน
    พ่อแม่ เพิงแพงฮัก เกิ่งตาตนไว้
    ยามเมื่อ ท้าวใหญ่ขึ้น สอนบ่าวพอแวง
    ปิตา ทังมารดา ก็เล่าตายตนเสี้ยง
    ยังแต่ ซายเดียวน้อย กำพอยทุกข์ยาก
    เป็นกำพร้า ขอข้าวเพิ่นกิน
    อายุได้ สิบสี่ปีปลาย
    บาคาน ไปขอทาน แห่งสังโฆเจ้า
    เมื่อนั้น มหาเถรเถ้า อีดูบาบ่าว
    พระจึ่ง ทานทอดให้ บาท้าวซู่ประการ ฯ


    - ถ้าอ่านต่อบั้นหน้า -


  2. #2
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,990
    บล็อก
    1
    โดยขะน่อย...สดับรับแล้วฟังฮู้บูฮาน
    ..กะบาท..ขออนุญาตในสังวาสสำเนียง
    ท่านฯใส่เสียงมาลอง คือสิหองหลื่นล้น
    (แบบท่านอาจารย์ว่าต้องมีสังวาสสำเนียงถึงจะได้อรรถรสทางภาษา)

  3. #3
    ฝ่ายเทคนิคและโปรแกรม สัญลักษณ์ของ บ่าวโจ่โล่
    วันที่สมัคร
    Dec 2006
    กระทู้
    1,961


    ด้วยความนับถือครับ อาจารย์ใหญ่


  4. #4
    ศิลปิน นักร้อง นักแสดง สัญลักษณ์ของ คนพนมไพร
    วันที่สมัคร
    Jan 2009
    ที่อยู่
    สายไหม
    กระทู้
    625
    เฮ็ดจั่งได๋น้อภาษางามๆจั่งซี้จั่งสิบ่อสูญเสียถิ่ม ขอบคุณอาจารย์หลายครับ

  5. #5
    ผู้ช่วยผู้ใหญ่บ้านมหา สัญลักษณ์ของ nuzing
    วันที่สมัคร
    May 2007
    ที่อยู่
    ตกฟากอยู่อุบล เป็นคนชราบางแคแล้ว
    กระทู้
    2,549
    บล็อก
    5
    ธุจ้า ขอบคุณจ้าใหญ่ศรี ฟ่าวมาต่อไวๆ เป็นตาหลูโตนท่าวคำสอนเป็นลูกกำพร้าผ่อแหม่ตายป๋า อยากได้มาเป็นลูกเขยเด๊

  6. #6
    ร่วมถ่ายทอดความรู้สู่สังคม
    วันที่สมัคร
    Mar 2007
    กระทู้
    1,273
    ฮ่วยใหญ่คำศรี อั่นท้าวคำสอนผ่าขาด นี่ อยู่เฮียนกะบาท กะมีอยู่ผูกหนึ่งแหม๋ครับ เป็นโตไทน้อย

    แต่ว่าใบลานขาดหายไปบางลาน แต่กะยังเหลืออยู่สิบกั่วลานครับ

    เท่าที่เคยอ่านมา กะสิมีหลายสำนวน แตกต่างกันบ้างเล็กน้อย
    เคยอ่านของ พ่อใหญ่ น้อย ผิวผัน อ่านเทียบกับใบลานของผมกะต่างกัน
    แต่กะม่วนคือกันครับ


    เว่ามาแล่วกะคึดพ้อผุเพิ่นสอน
    ขอน้อมระลึกถึงครูบาอาจารย์

    พ่อใหญ่จารย์ครู บุญ วงษ์พล (เสียชีวิตแล้ว)
    พ่อใหญ่จารย์ครู บัว ศรีคราม (เสียชีวิตแล้ว) ปู่เฒ่าผม( ปู่ทวด)
    พ่อใหญ่จารย์ครู ขัน ศรีคราม (เสียชีวิตแล้ว) น้องปู่เฒ่า
    พ่อใหญ่จารย์ครู นาม ศรีคราม (เสียชีวิตแล้ว) น้องปู่เฒ่า
    พ่อใหญ่จารย์ครู บุญมี บุญเลิศ (เสียชีวิตแล้ว)

    พ่อใหญ่จารย์ซา อ่อน ศรีวรรณะ (เสียชีวิตแล้ว) พ่อใหญ่ผมเอง

    หลวงพ่อใหญ่ สุนีย์ จ่าภา (ยังมีชีวิตอยู่)


    จำได้แต่ตอนไปหางัว

    " ให่เจ้าไปหาพุ้น งัวโซโตเอิ้กด่าง มันยืนอยู่นอกคอก กินน้ำอ่างคำ"

    กับตอนไปเล่นสาว แล้วผุสาวว่าดูถูกท้าวคำสอน

    " เหลียวเบิ่งผ่าขาดส่อย ควมเว่าผั่นอยู่ดาว"


    โดยผุข่า

  7. #7
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    คอบพระคุณ และซื่นซมยินดี กับทุกท่านผู้เข้ามาอ่านพ้อ แนะนำบอกกล่าว ทุกถ้วนหน้า ข้าน้อย เซิญสดับต่อ บัดนี้


    ปุนประมาณได้ หลายปีขึ้นใหญ่ มาแล้ว
    ท้าวก็ คึดค้อยค้อย หาแก้วมิ่งเมีย
    กูนี้ ผัดแต่เป็นซายขึ้น บ่เห็นฮอยหมาแม่
    เห็นแต่ ฮอยแพ้แว้ หนูผู้หนวดยาว แท้แล้ว
    ท้าวก็ คึดอยากได้ เมียมิ่งเทียมเอิก
    ก็จึ่ง ปุนไปหา แห่งอาจารย์เจ้า
    แล้วจึ่ง ยอมือขึ้น สามทีก้มขาบ
    บนบอกเบื้อง ไขข้อต่อไป
    บัดนี้ ข้าน้อยคึดอยากได้ เมียมิ่งมาซม พระเอย
    สิได้ เป็นเฮือนซาน ต่อไปภายหน้า
    ขอแก่ อาจารย์เจ้า ไขคำบนบอก แด่ถ้อน
    ญิงใด ในโลกนี้ ผู้ประเสริฐมีบุญ พระเอย
    คันแม่น เอาเป็นเมีย ฮูบใดสิคูณค้ำ
    เมื่อนั้น เถโรเจ้า ไขคำบนบอก
    ญิงอยู่ ในโลกนี้ เหลือล้ำอเนกนอง ท้าวเอย
    อันจัก เอาเป็นเหง้า เมียขวัญกับปะทีบ
    คันว่า โสลกถีกต้อง นางนั้นก็จึ่งดี แท้ดาย
    ดีท่อ คึดอยากได้ เห็นฮูบโสมงาม ดั่งนั้น
    ภายลุนเลย เล่าขวางจริงแท้
    ญิงใด ทำกินพร้อม พอเกลือพอปลาแดก
    ญิงนั้น เป็นข้อยเพิ่น ฮ้อยซั้นควรให้ไถ่เอา เจ้าเอย
    ญิงใด เอเลท้อง ปูมหลวงอุ้มบาตร
    ญิงนั้น ท่อแต่ฮูบฮ่างฮ้าย บุญนั้นมากมี
    ซายใด ได้อยู่ซ้อน เฮียงฮ่วมป็นเมีย เมื่อใด
    ยูท่าง ทง(ทรง)ความสุข นั่งปองเป็นเจ้า
    ญิงใด ยกย่างย้าย เสียงบาทตีนหนัก
    ญิงนั้น อย่าเอามาเทียม ถ่อยคนควรเว้น
    ญิงใด หน้าผากต้อม ผัวฮักแวนถนัด
    อันว่า การญิงซาย ก็หากยังเฟือนฟ้าว
    ญิงใด ปากกล่าวต้าน เสมอดั่งเสียงซาย นั้นนา
    บาคานเอย อย่าเอามาซ้อน
    ญิงใด เกศาล้วน เดิกดำเลิงแลบ
    มีทัง ผิวบ่เศร้า งามแย้มอยู่เลิง
    ยามเมื่อ ยกย่างย้าย ไปเคี่ยมมาเสมอ
    ตาแลดู แต่พอวาด้าม
    ซายใด ได้อยู่ซ้อน เฮียงฮ่วมเป็นเมีย ก็ดี
    ยูท่าง ครองความสุข นั่งปองเป็นเจ้า
    ญิงใด ย่างบาทกว้าง ตีนข่วงธรณี นั้นนา
    ตัณหา ในสงสาร บ่มีไผเผี้ยง
    ญิงใด ขนตาเสี้ยม เหี้ยนปลายจักสะหน่อย
    ญิงนั้น ฮู้ขี้คร้าน เข็นฝ้ายมักนอน แท้ดาย
    แม่นว่า ฮูบโสมงาม ดั่งย้อยบาท้าวอย่าเอา แท้เนอ
    แม่นสิ เป็นเมียไผ ก็บ่เป็นเฮือนย้าว
    ญิงใด ผมพันส้อย ยอยหูเป็นปีก
    ญิงนั้น เงินบ่ค้าง พอเสี้ยวอยู่ถง แท้นา
    ญิงใด เป็นปานก้ำ กกขาดูหลาก
    ไผผู้ กอยกล่าวต้าน เอาได้โซคมัน แท้แล้ว
    ญิงใด จีนจิกเกล้า ผมแดงทางหน้าผาก
    ญิงนั้น คัณหาฮ้อน เคยม้างศาสนา ท้าวเอย
    ญิงใด โขโมหน้า คือซายสูงสวด
    ญิงนั้น มีใจโลภเลี้ยว มีซู้จากผัว แท้แล้ว
    ญิงใด ปลายมือห้วน ฝามือซ้ำผัดใหญ่
    ปาทาเท้า ฝาตีนเปใหญ่
    ญิงนั้น ทุกข์บ่มั้ว บาท้าวอย่าเอา แท้เนอ ฯ

  8. #8
    ร่วมถ่ายทอดความรู้สู่สังคม สัญลักษณ์ของ จำปา
    วันที่สมัคร
    Nov 2009
    กระทู้
    1,492
    ธุจ้า นับเป็นบุญแล้วค่ะ ที่อาจารย์ ถอดควมออกมาให้อ่าน ขอบคุณหลายๆค่ะ
    แต่น้อยๆกะเคยได้ยินผุเถ่าเผิ่นเว้าสอนลูกหลานยุค่ะ อย่างเช่น "ยามเมื่อ ยกย่างย้าย ไปเคี่ยมมาเสมอ"เผิ่นจะเว้ากรอกหูหลานแม่ญิง อิอิ

  9. #9
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,363
    บล็อก
    23
    คือสิเข้าใจเด้อ้าย แต่บ่เข้าใจความหมายของคำหลายๆคำจ้า คั่นถามกะสิว่าส่อเนาะ ฟังเมาะๆแมะๆแบบเด็กดีไปซั่นดอก..

  10. #10
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    กระทู้ต้นฉบับโดยคุณ mikaze
    คือสิเข้าใจเด้อ้าย แต่บ่เข้าใจความหมายของคำหลายๆคำจ้า คั่นถามกะสิว่าส่อเนาะ ฟังเมาะๆแมะๆแบบเด็กดีไปซั่นดอก..
    โอ๊ยเนาะ...คันว่าบ่เข้าใจคำใด วลีใดกะบอกมาโลดเด้อ สิอธิบายขยายความให้ หรือสิให้อธิบายแบบหล่อนแก๊กแซก กะบอกอีเมลมา สิส่งคำแปลทั้งเหมิดไปให้อ่าน ... หืย จั่งแม่นเด็กดีหลาย..หมากกอกทางเล็บซะบ้อเหอ ปอบ

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •