แมงอีฮ้อง....คือน้องสั่ง

[ทิดจ่อย]

ใกล้เมษา มีนาคล้อย ฝนปรอยๆ ฮำช่อม่วง
พวงผกาป่งช่อ ลวงล่อหมู่แมลง
หมากสะแบงแดงเป็นปุ้ม ทั้งดอกจานบานทั่วท่ง
ดอกมันปลาเตรียมป่งก้าน ขะยอมนั้นกะดั่งกัน
รอคอยวันมื้อ ขจรไกลกระจายกลิ่น
รอมีนาสิ้นเตรียมจ้อสิเบ่งบาน

ไม้อีสานบานยามแล้ง
หอมยามแลงแดดอ่อนๆ
ออนซอนฝูงภู่เผิ่ง โลมไล้ดูดดม
พรมพรำเพลี้ยใบม่วงเป็นยางเหนียว
หัวกระเจียวหลบในดิน หลับไหลบัดยามแล้ง

กะปอมแดงอีก่าน้อย ตอดเงาเอิ้นเพรียกคู่
ฝูงหมู่กาและเอี้ยงเสียงฮ้องส่วนแซว
อยู่ตามแนวป่าไม้ กินหมากไฮ หมากม่วงหมั่ง
อยู่ตามฝั่งขอบห้วย นกยางจ้องส่องปลา

อยู่ตามนาป่าไม้ เสียงใสๆ ฟังๆ ไป แล้วใจสั่น
เสียงจักจั่นแมงอีน้อย เซ็งแซ่แล้วเปลี่ยวใจ
ฟังไกลๆ คือเสียงน้อง ฮ้องสั่งว่าลาไกล
บ่อมีวันคืนหวน อดีตกาลเคยหวานชื่น
วันคือที่ลับล่วง คือผลพวงให้ฮักห่าง
อยู่กลางท่งอ้างว้าง แมงอีฮ้อง แห่งฮ่ำฮอน

[นู๋น้อย]

:l- ปาดดด มาคิดฮอดแต่ยามน้อยๆแท้น้อ อาจารย์บาดนี้ 55555555 ไปค้องกะปอม หาต่อยแมงจักจั่น ออยยยย เข้าป่าหาหน่อไม้

[sompoi]

พาคึดฮอดแต่บ้านเนาะผญาเจ้าอ้ายทิดจ่อย ^^

[พลายแก้ว]

เสียงแมงอี..อี่ออดอ้อน สุดสะออนสะท้อนทั่ง
นอน-นั่งฟังเสียงเจื้อยแจ้ว ได้ยินแล้วให้สะหวอย
ประหนึ่งนงนารถน้อย สิพลอยพรากไปจากพี่
เสียงแมงอีคือเสียงเจ้า กำลังเว้าว่าลา..
คือดั่งฝนสิลาฟ้า ปลาสิสั่งลาหนอง
บัวทองสิลาบึง ปี่ซอซึงสิลาแอ้
สิคิดแคร์แน่บ้อน้อง สิคิดมองคืนหลังอ่วย
สิคิดช่วยยื้อชีวิต ผู้ที่คิดถึงแต่เจ้า แน่บ่น้อ
สัญญารอยังคงเค้า คือเก่าเด้อทางใจ
ยังห่วงใยและห่วงหา ทุกเวลาบ่มีเว้น
วอนคิดเห็นใจบ้าง คันแม่นนางสิป๋าปล่อย
คิดเห็นใจคนคอย ย่านสิม้อยระแม่งม้วน คันอวนเจ้าสิกล่าวลา...

[หนุ่มหน้าลาว]

ย่างเมษานากะแล้ง แดดแฮงแฮงขี่ดินไง่
กอไผ่ เหลือแต่ลำส้ายหล้าย ควายบักตู้ซ่นฮ่มฮัง
เสียงดังมาจนซาอู้ ในหูอี้แล้วอี่
เทิ่งจักจั่นแมงอี อีแล้วอีหวีดฮ้อง คือเสียงน้องเอิ้นสั่งชาย
คันบ่หมายมาเป็นซู้ เป็นสังนอคือบ่บอก แหน่น้อ
หลงคารมนางแจ่งแจ้ คือเป็นได้คิดอยากตาย เด้น้อ
แนวมารยาญิงนี้ หลายคารมโบราณบอก
ร้อยเล่มเกวียนยื่นพื้น เกินนั้นให้คึดเอา เด้อ
พออยากเซาสาซ้ำ เว้านำญิงข่อยเปิดหน่าย
เว้าให้ชายนี้ตั้งก้อ แล้วยอถิ่มบ่อี่ดู ...

:l-:l-

[ข้าวต้มมัด]

วอนวี่วอนออนซอนเจ้า แมงอี่เว้ายุในป่า
จั๊กจั่นเสียงหรรษา สกุนาเสียงซ้องก้องพนา
มวนบุพผาออกดอกย้อย อ่อยแมลงแมงบินตอม
กลิ่นดอกไม้ห๊อมหอม พวงผยอมยามหน้าแล้ง
เสียงดังแฮงจั๊กจั่นน้อย ร้องจ้อยจ้อยรำคราญเสียง
ย้อนขาดคู่มายุเคียง เลยส่งเสียงสำเนียงร้อง
มองหาคู่บ่มีแล้ว แนวเพิ่นน้อหาหม่องใหม่
จั๊กจั่นฮ้องเสียงใส พอได้ให้กะปอมน้อย
คอยเขี่ยงเอียงหูฟัง สั่นแหล่วพี่น้องเอ้ย




อิอิ จักสิฟังกันรู้เรื่องบ่ดอก จั๊กจั่นกับกะปอมว่านิ ส่อยๆๆๆ

[pcalibration]

พากันฟังแต่เสียงจักจั่นแมงอีเสียงนกเสียงหนูฮ้อง
อยากสิฟังเสียงกะปอมบ่ พี่น้อง

:,1-

[chudhancock]

มวนหลายจ้าลูกเขย ทิดจ่อยจ๋า เว้ามาแล้วกะคิดฮอดบ้าน แท้เด้ อิอิอิ

[อาวอ้วนเมืองยศ]

ม่วนแท้น้อผญาแมะ คิดฮอดบ้าน คิดฮอดตอนเป็นเด็กน้อยๆ เนาะ

[จำปา]

เสียงจักจั่น..งันพนาป่าไม้
คือใจน้อง..ฮ้องหาพี่
เสียงแมงอี..แว่วดังก้อง
คือใจน้อง..ฮ้องฮ่ำหา
อ้ายเอ้ย..ยามน้องไปไกลตา..จงฮักษาวาจาพี
วาอ้ายนี่ฮักแต่น้อง..บ่หมายข่องเกี่ยวผุได๋
แม่นสิอยู่ไกลเจ้า..ฮักสองเฮายังมั่นแก่น
คือสายแนนส่งยู้..ชูข่างบ่ห่างลา..ดอกเด้ออ้ายเอ้ย

สั่นดอกหว๋า :l-ขอมาม่วนนำค่ะ


อ่านผญาอ้ายทิดจ่อยแล้วคิดฮอด(บ้าน)หลาย