เริ่มนับถอยหลังอีกบ่จักมื่อแล้วค่ะ
สำหรับบุญประจำปีแห่พระเวสฟังเทศมหาชาติ บ้านหนองผือ
วันที่ 29 มีนาคม 2554มาเบิ่งค่ะว่าพ่อใหญ่ แม่ ป้า พ่อลุง
เพิ่นเตรียมงานฮอดใสแล้ว
แห่พระเวสฯ เข้าเมืองขาดบ่ได้ค่ะ สำหรับช้างและม้า หนองผือบ่มีช้างอีหลี
ม้าอีหลี ใช้ ช้างใช้ม้าปลอม ๆ ไปก่อนค่ะ
ฝ่ายเฮ็ดสลาก เซียมซี ให้พี่น้องผู้มาร่วมงานได้ร่วมเฮ็ดบุญแล้วเสี่ยงโชคพร้อมค่ะ
ของรางวัลค่ะ กะต้า กะบุง แล้วแต่โชคไผ๋หมานมัน พ่อใหญ่ พ่อลุง
เพิ่นซ่อยกันสานเองอยู่ในวัดเลยค่ะ
อันนี่คือ กระเชอ (ก้นบ่ฮั่วเด้อ) แล้วกะ ขะย่อง (ขันบูชาดอกไม้)
ดอกไม้ ติดเสื้อผู้มาเที่ยวงาน แต่ละบ้านเฮ็ดมาลงวัดผู้ละเล็กละน้อย
ภายในหัวแจก (ศาลาการเปรียญ) แต่ละบ้านเพิ่นกะฮ้อยดอกสะแบง ดอกฮัง ธุง ทิว มาห้อยมาแขวน
ภายนอก ปักธุง สี่แจรอบสิม (โบสถ์) กระถางน้อย ๆ
นั่นเอาไว้ใส่ข้าวพันก้อนเพิ่นจะแห่แต่เช้าตรู่ของมื่อแห่กัณฑ์หลอนค่ะ
แต่น้อย ๆ น้องเขมเคยไปแห่กับแม่ใหญ่อยู่ค่ะ
หอพระอุปคุต สำหรับงานบุญใหญ่ ๆ เพิ่นจะเชิญพระอุปคุตจากน้ำ
มาปกปักรักษางานให้เป็นไปด้วยความเรียบร้อยบ่ให้มีมารมาแผ้วพาน
ฮอดมื่องานพ่อใหญ่เพิ่นสิไปเชิญจากฝายใหญ่แต่เช้าค่ะ
แนวเสพแนวงันมื่อบุญค่ะ หมอลำหมู่คณะ “น้องใหม่เมืองชุมแพ” ค่ะ
ฮ่มมันปลาหม่องเฮาเคยนั่งฟังลำบุญเดือนสี่นำกันอ้ายยังจำได้บ่ (คริๆๆ)
ปีนี้น้องยังถ่าอ้ายมานั่งเฮียงอยู่คือเก่า (คริๆ)
เรียนเชิญพี่น้อง บ้านใกล้เรือนเคียง มากินข้าวปุ้นเอาบุญเดือนสี่ บ้านน้องเขมฯนำกันเด้อค่ะ 29 มีนาคม 2554 นี้ค่ะ
Bookmarks