อีสานคืนถิ่น

[หนุ่มหน้าลาว]

ฝนลงมาไฮ่นาฮ่ง หญ้ากะป่งเขียวขจี
จากสีเหลืองกลายเป็นเขียว ให้ซื่นเย็นในใจอ้าย
ควายอีหลอยมานท้อง สิบเดือนเถิงคราวคลอด
ก่อนสิลงฮุดไว้ นาเหี้ย ก่อนสิดำ
ขอลำนำคำร้อย เรียงสำนวน พอได้ม่วน
เป็นสำนวนบ้านบ้าน ผญาพื้นคู่อีสาน
ชีวิตของชาวบ้าน กะหมุนเปลี่ยนไปตามกาล
หากินไปตามวาระ ฤกษ์ยามสิพาเอื้อ
บ้างเตรียมเฮือไว้ลงแก้ง รอชลาสิล้นเอ่อ
เตรียม ตุ้ม ไซ ลอบ สะดุ้ง ไว้คอยท่าใส่ปลา
คันนาได๋หม่องมันจ้อม ฮอมฮอมคอดกิ่ว
ต้องฟ้าวจกฟ้าวป้าน ให้ดินแน่นก่อนสิพัง
เทิงระวังหม่องบ่ฮู้ ฮูหนูมันขุดก่น
ฝนลงมา น้ำสิกัดกร่อนร้าว คันแทม้างมุ่นทะลาย
ญิงซายซุมไทบ้าน พากันขึ้นโคก
เก็บเอาฟืนง่าไม้แห้ง มาเก็บไว้ท่าก่อไฟ
โดนกว่านี้บ่ได้ฟืนสิเปียก ติดยากบาดยามสุม
ต้องเก็บดีหนีไอฝน ใต้ทูบคิงไฟลี้
บางคนลีลาฟ้าว ตรวจเบิ่งถงข้าวปลูก
มอดบ่กัดหนูบ่หย่ำ จั่งพอได้เฮ็ดแนว
ใกล้สิเถิงหน้านาแล้ว สาวเอ้ย ให้ฟ้าวอ่วย มาเด้อ
ซ่อยพ่อแก่แม่เฒ่า ให้เลาได้ผ่อนแฮง
กำใบแดงคืนมาบ้าน อีสานเฮามาซ่อยแม่
เหมิดหน้านาแล้วจั่งแล หางานอื่นค่อยค้ำ สาน้อง อ้ายเหนี่ยววอน..หล่าเอ้ย
:l-:l-:l-

[loongporn]

เยี่ยม ขอลองอีกซักกลอนได้ไหมครับ คุณหนุ่มหน้าลาว ขอยาวกว่นี้อีกนิดนึงครับ ขอบคุณครับ