เขียดจะนาน้อย คอนกะต่าไปเก็บเห็ด ซุมเห็ดผอกะเฮ็ดก่นฮูหนีซ้ำ
แมงละงำลอยน้ำ ไล่หากินปลาค่อ สานกระทอเตรียมไว้ เก็บปลาข่อนอยู่ไห่นา
ซุมแมงดากะฮ้อง ขี้คร้านหลายนั่งเฝ้าไข่ ซุมโตแม่ทิ่มไว้ ให้ชายเฝ้าเบื่อแฮง
มวลหอยโข่งไส้แห้ง หากินเทากะจนจ่อย มะซ่างหลอยไปซ้ำ ลอยน้ำแล่นหนี
น้ำใต้หลี่หนีก้นต้อน จอบปลาเข็งให้โดดไส่ จักแม่นเป็นจั่งได๋ เบิ่งงูปลามาเฝ้า ถ้ากินเจ้าอยู่สู่ยาม
ปลาฉลามซ่ำได๋น้อ ซุมกุ้งฝอยโสกันเบิ่ง ได้ยินมาตั้งแต่เหิง เป็นตากินแท้บ้อ มันโตน้อยซ่ำได๋
ซุมจังไลกบแอบ ๆ นั่งจุดธูปอยู่คันแท งูดางแหกะหลบ ถ้ากินตับระวังเด้อ
แนวเอ๋อ เอ๋อปลากระเดิด เจิดหัวดมขี้ไก่โป่ พากันฮ้องปาดโธ่ คือเหม็นแท้คักหลาย
ผมบรรยายมาแล้ว อุปโลคโลกา เว้าเป็นคำผญา ให้เปรียบเปรยเอาเด้อท่าน