บทสนทนาบางตอนของศิลปินเติมฝันปั้นดาว

[พล พระยาแล]

ทิดรส มักเมี่ยน : อ้ายเป็นลิบซิ่งอ้ายบ่าวแมนบ่ คือมานั่งเฮ็ดหยังอยู่นี่ มันฮอดคิวแล้วเด้นี่ เพลงต่อไปนี่เด้

พล พญานาค : อ้าว เฮ้ย หือ มันแมนบ่ มาคือสิฮอดเร็วแถะ บ่แมนน๊า

(ซงสีวิน ๆ น้ำส้มกับน้ำบักนาวคุ้มทะเลใต้ ข่อยว่าสิกินน้ำส้มกับน้ำบักนาว นึกว่าเป็นน้ำผลไม้ หิวน้ำหลาย กินไปแก้วสองแก้วคือเป็นสีพะอืดพะอมแถะหือ ฮ่วย ลุกจากเก้าอี้คือเป็นสีวิน ๆ ซงสิฮากน้อบาดเนี่ย)

ทิดรส มักเมี่ยน: บ่แมนจั่งใด๋กะเบิ่งแนตี๊เนี่ย ๆ ๆ ๆ ๆ (ทิดรสใช้นิ้วจิ้มกระดาษคิวจนสิขาด สงสัยสิสูน บ่ได้กินข้าวแลงจั่งใด๋บุ)

พล พญานาค : ฮ่วย ถ้าขึ้นตอนนี้บ่ทันดอกซั่น ขอผ่านเด้อ ให้เลาขึ้นก่อนโลด อ้ายเตียมโตบ่ทันดอก

ทิดรส มักเมี่ยน : โอ้ยยยย (หย่างไปเวทีต่อ ข่อยกะหย่างนำไปจ้อ ๆ)

พล พญานาค : ถ้าขึ้นตอนนี้บ่ทันดอกน้อง อ้ายยังบ่ทันได้เตียมโตเลย ขึ้นไปก่อนโลดเด้อ

ชาญน้อย เมียงอุบล : บ่เป็นหยังอ้าย ผมให้ดีเจลูกหินขึ้นไปขัดตาทัพไว้แล้ว ฟ่าวไปเฮ็ดตามแผนโลด

ข่อยฟ่าวพายกระเป๋าเครื่องแต่งโตของข่อยหย่างไปหลังเวทีทางทิศเหนือ เทิงเหยียบน้ำ เทิงเหยียบขี่ตม หรือเหยียบขี่คนนำกะบ่จัก หลอยไปหลบอยู่คอกหมูน้อยบ่าวข้าวจี่ ย่านคนเห็น ถอดเสื้อถอดกางเกงออก ทันบ่น้อ ๆ ๆ ๆ พะนะในใจกะดาย ฟ้าวหลาย ๆ ๆ ๆ

พอแล้วแล่ว ข่อยกะหย่างลุยน้ำไปข้างเวทีหม่องควบคุมเสียง โต๊ะพิเศษ (แอลซีดี.. โอ๊ะ.. วีไอพี) ข้างเวทีกะพากันเบิ่งปานข่อยเป็นโตประหลาด ซุมเฮาที่ควบคุมเสียงบางคนกะจำได้ ...ฮ่วยข่อยลืมแว่นดำ

พล พญานาค : หน่อยมีแว่นบ่ ไปหามาให้อ้ายใส่แน อ้ายลืม

สาวผุฮ้าย (ดอกฟ้า เพชรประทาน) : ของหน่อยกะมีอ้าย สิแลนไปเอาให้ ทันบ่ล่ะหือ (เมรีวิ่งร้อยเมตร สักพักกะไปฮอดและกลับมาเร็วปานนักวิ่งทีมชาติ....เสียงหันใจเส่าฮาบ ๆ)

ป้าแดง : ต่อไปนี้สิได้พ้อกับหนุ่มหล่อเมียงอุบล เจ้าของเสียงเพลง "ผุบ่าวคนเดิม" ชาญน้อย เมียงอุบล เสียงคนตบมือแตกซวด ๆ

ข่อยก้าวขึ้นเวทีแนมกะบ่ค่อยเห็นย่อนใส่แว่นดำ บันไดขึ้นกะน้อยคักโพด และแล้วบ่าวคนเดิมโตปลอมกะขึ้นไป ท่ามกลางความตะลึงพึงเพิดของคนเบิ่ง บางคนกะจำข่อยได้อยู่ดอก เพราะบ่มีไผบ้าคือข่อยดอกเบิ่งซง

ข่อยได้ยินเสียงคนโห่ป่า ไล่ข่อยหน้าเวที "ออกไป ๆ ๆ ๆ ๆ ไม่เอา ๆ ๆ" ปานเขาประท้วงกันซือ ๆ บางคนกะจ่ม "ฮ่วย อ้ายบ่าวคือจั่งเฮ็ดจั่งซี่ คือบ่กล้าขึ้นพะนะ" (เพิ่นบ่รับมุข อุตส่าห์เตรียมเงินแบ้งค์พันไว้ถ่า..555)

พอโตจริงขึ้นไป ทั้งพวงมาลัย ทั้งแบงค์เต็มคออ๊ากลาก บ่าวคนเดิมโตปลอมกะหงอยรับประทาน โตนฮ้านจุ๊ดมา ปานนั้นกะมีคนหุ้มล้อมขอถ่ายรูปนำพะนะ คือสิพากันมักของแปลกตี๊เบิ่งซง 55555

โอ้ยย รูปข่อยคือเป็นจั่งซี่ สงสัยเว็บตรากบเฮ็ดเส้นอีกแล้ว