อ้ายเคยเว้าตั้งแต่เค้า บ่กล้าบอกคำว่าฮัก
ย้านมันเป็นการตั๋ว บาดบ่เป็นตามความเว้า
คำนี้มันยังเหย้า เนาในใจ บ่เคยขาด
บ่วาดหวังให้น้อง มาคองถ่าฮ่วมสอง
เปิดโอกาสให้น้อง พ้อคนใหม่ทุกเวลา เด้อนาง
พ้อคนดีอ้ายยอมือ ปรารถนาดีด้วย
สิขออวยพรให้ ตอนดวงใจน้องพ้อคู่
ผุที่เหมาะเกิ่งก้ำ กับน้องอ้ายหม่อนใจ
หวังเพียงให้น้องได้ สุขส่งเสมอสอง
อ้ายคอยปองคอยแนม เฝ้าระวังให้นางน้อง
ขอปิดทองหลังองค์เจ้า บ่หวังเอาสิเข้าฮ่วม
ย้อนฮู้โตอยู่แล้ว ว่าโตอ้ายนี่ต่ำเกิน
ขอสรรเสริญความดีน้อง เปรียบดังทองบ่เคยหม่น
แม่นสิอยู่ในโคลน กะยังใสส่องจ้า ราคีเปื้อนกะบ่มี
คนดีของบักอ้าย เจ้าอย่าหน่าย แหนงซัง อ้ายเด้อ
เอาความจริงมาคุยกัน อ้ายฮักจริงเจ้าคงฮู้
แม้แต่ปลายเส้นผมน้อง บ่เคยแตะต้องไต่
ไหล่งามงาม บ่เคยแตะต่อยต้อง ให้นางน้องเสื่อมศรี
เท่าชีวีรักษาน้อง บ่ให้คนได้มอง ราศีน้องบ่ให้หม่น
แม่นว่าคนบ่ฮู้ เทวาท่านเพิ่นส่องเห็น
พร้อมเทิงกับตัวน้อง คงเห็นจริงใจแน่
บ่เคยแซเลี่ยงล้ำ เกินคำเว้าที่เอ่ยจา จริงแหล่ว
..
Bookmarks