ฮักของเฮา คันแม่นมันสิล่ม จมลงแม่น้ำแก่ง กะตามถ้อน หล่าเอ้ย
อ้ายสุดฮักสุดแพง มีเพียงเจ้าท่อนั้น อย่าฝันถ่อน ว่าสิลืม
อ้ายนี่แสนสุดปลื้ม ฮักห่อปานดวงใจ
บ่มีไลลืมหลง ห่วงหา อาวรณ์เจ้า
ถึงเมื่อยามกินข้าว ยังเหลียวหา คำแพงพี่
เหลียวงวกพุ้น งวกพี้ อยากมีน้อง มาฮ่วมภาช์น
ยามนิทราฝันหาน้อง ว่าสองเฮาได้ครอง สนิทแน่นเฮียงบ่อน
ตื่นบ่อนมาล้างหน้า ยังเห็นน้อง อยู่แอ่งสรง
ยามอ้ายลงกระไดบ้าน ปานได้จูง แขนนงคราญ ไปทำงาน พร้อมกับพี่
ทั้งทิวาราตรี บ่มีห่างจากน้อง ปานนอนห้อง ฮ่วมหอ
ใจบ่มีทางท้อ ย้อนมีอุ่น กำลังใจ
สู้ฝ่าฟันเพื่อความฮัก บาดเทื่อบุญผลาค้ำ
สิจำคำของน้อง ว่ามีพี่ที่นางปอง เอาไว้ท่าเคียงคู่
แม่นมีซู้หมื่นซั้น อย่าฝันถ่อน สิปล่อยป๋ะ
พั้วเอ้ยพั้วดอกหว้า สาวซ่า อยู่ทางไกล
อย่าได้ไลลืมหลง ให้พี่ซายนี่หลงเก้อ
ขอมีเธอในใจอ้าย บ่มีวาย หล้ายห่าง
ขอมีนาง เป็นกำลังใจให้บักอ้าย แม่นตายถิ่ม กะบ่แหนง หล่าเอ้ย
:,1-:,1-:,1-
Bookmarks