ช่วงนี้เป็นช่วงที่หมากตาลกำลังสุกเน๊าะค่ะ หยุดยาวตั้ง
4 มื่อจักจะเฮ็ดหยังแหน่ กิจกรรมวันหยุดของสาวภูธร
หลายคักค่ะ บ่จักสิหลกหญ้าข้าว ซ่ามข้าวหว่าน เอาหุ่นมัน
แล้วกะกิจกรรมสร้างกินค่ะ หนึ่งในเมนูวันหยุดอาทิตย์นี้ได้แก่
แท่นแทนแท๊น... "ขนมตาล" จะดุเดือด จนครัวระเบิดซ่ำได๋ต้องมาเบิ่งค่ะ
**ก่อนอื่นต้องออกโตก่อนเด้อค่ะ ว่าบ่แม่นแม่ครัวโดยอาชีพวิธีเฮ็ดอาจติ๊งต๊องไปแหน่
อาจจะบ่ถูกสูตรที่มืออาชีพเพิ่นเฮ็ดกัน แต่กะกินได้อยู่ค่ะเบิดพร้อม
ส่วนผสมค่ะ**ได้ของครบแล้วมาเบิ่งวิธีเฮ็ดค่ะบาดนี่ บางช่วงบางตอนอาจบ่มีรูปเด้อค่ะ
1. หมากตาลสุก
2. น้ำตาล
3. น้ำกะทิ
4. แป้งข้าวจ้าว
5. เกลือนิดหน่อยตอนคั้นกะทิ
6. ผงฟู
ย่อนว่าน้องเขมเป็นเทิงแม่ครัวเทิงตากล้อง ใช้น้องชายมันกะว่า "เป็นบ้าติ"
อันดับแรกหย่องหมากตาลก่อนค่ะ ได้หมากตาลสุกมาล้างให้สะอาด
ปอกเปลือกเอาไส้อยู่แกนกลางออก จั่งบ่ฮึน(ขมขั้นเทพ)
หย่องใส่น้ำฝนสะอาด กรองเอาเส้นใยออก แล้วเทใส่ผ้าบาง
เอาไปแขวนโอ่นโต่นไว้ขางเฮือนแนวนี่ค่ะ
เพื่อแยกเนื้อหมากตาลกับน้ำที่หย่องออกจากกันเฮาจะ
ใช้แต่เนื้อตาลสีเหลือทองอร่ามค่ะ....
ระหว่างที่รอให้เนื้อหมากตาลสะเด็ดน้ำ เพื่อบ่ให้เสียเวลา
เฮากะมาเย็บกระทงน้อยใส่ขนมตาลค่ะ น้องเขมจะใช้กระทงใบเตยค่ะ
หน้าฝนใบเตยงามฮกสวนตัดมาหลาย ๆ ค่ะ ล้าง เช็ดให้สะอาด
แล้วเย็บเป็นกระทงสี่เหลี่ยม..แบบนี่ค่ะ
เย็บกระทงแล้ว หมากตาลกะสะเด็ดน้ำพอดี จัดการผสมตั่วค่ะบาดนี่
คั้นเนื้อหมากตาลใส่กับแป้งข้าวจ้าวก่อนค่ะ
แล้วใส่น้ำตาลก่อนเลยน้ำตาลจะละลายเป็นน้ำต้องใส่ก่อนค่ะ
เฮาจั่งจะได้ใส่น้ำกะทิถูกเพื่อบ่ให้แป้งแหลวโพดยามตักใส่กระทง
จะไหลลงไปอยู่หม้อนึ่งเบิดค่ะ
แล้วใส่น้ำกะทิ เกลือ ผงฟูตามลำดับค่ะ จะได้แป้งหน้าตาแบบนี้ค่ะ
ยังนึ่งตอนนี้บ่ได้เด้อค่ะ พักไว้จัก 2-3 ชั่วโมงหรือดนกว่านั้นกะได้ค่ะ
เพื่อให้ผงฟูเฮ็ดปฎิกิริยาทางเคมี (เบิ๋ย...) กับแป้งซะก่อนค่ะ
ยามนึ่งจั่งฟูอย่างสวยงาม น้องเขมฯ ทิ้มไว้ข้ามคืนเลยค่ะ
ลุกมานึ่งยามเช้าเอา
เช้าแล้ว..ตักแป้งที่ผสมแล้วใส่กระทงแบบนี้ค่ะ
ตั้งหม้อซึงให้เดือด นึ่งประมาณ 5 นาทีกะสุกแล้วค่ะ
ผ่านไป 5 นาทีเปิดเบิ่ง แท่นแทนแท๊น....ว้าว..:,1-ขนมตาลสีทองอร่าม
แถมฟูขึ้นหน้า แตกสวยงาม หวาน มัน แซ่บ
หอมหมากตาล + ใบเตยฮ่วย ๆ เอาไปถวายพระได้บุญกันถ้วนหน้า.....
แล้วจะมาเว้าเรื่องขำขันของขนมตาลบันลือโลกต่ออีกค่ะ
หัวเราะจนน้ำหูน้ำตาไหล
ขอบคุณพื้นที่การแบ่งปัน
ขอบคุณท่านผู้ชม ขอบคุณค่ะ ธุจ้า
Bookmarks